全球房地產顧問萊坊發布《財富報告2025》，去年全球高淨值人士（資產淨值超過一千萬美元）人數增加百分之四點四至約二百三十四萬人，其中美國佔三成九，位居榜首；香港亦榜上有名，佔全球份額百分之一點八，排列第十。港人荷包持續膨脹，加上近年環球經濟充滿不確定性，本地財富管理需求有增無減。
中信銀行（國際）個人及商務銀行業務總監袁妙齡（右）。
財富管理向來係各銀行兵家必爭之地，其中中信銀行（國際）近年力攻高端客戶同財管服務，去年更帶動全年收入創歷史新高。業績理想，信銀國際個人及商務銀行業務總監袁妙齡（Wendy）功不可沒。佢本身喺恒生銀行（0011）任職逾廿六年，由MT做起，其後曾任多個管理崗位。期間佢搞過多場大小投資講座，有搵我做主持和講者，記憶最深係一場七千人嘅講座，創咗投資講座人數紀錄，至今仍係一項珍貴嘅回憶同紀錄。當時年紀輕輕嘅Wendy辦事幹練高效，已顯大將之風。三年前Wendy轉戰信銀國際，我已經想搵佢傾下偈，早前終於有機會請佢到我節目分享業務發展。
信銀國際去年零售業務經營收入按年升三成一；今年首季再升近四成，其中財管收入按年躍升約六成，外匯網上交易收入更增逾七成，保險收入則升逾五成。Wendy認為銀行產品多元兼客制化，有助財管業務吸客。佢解釋，財管服務要突圍而出，前提必須了解客戶所需，除管理資產外，更由生活圈理念出發，例如客戶去旅行或仔女海外留學，諗下佢會有乜嘢需要，為佢提供相應嘅外幣投資或外匯保險等服務。
另一方面，數碼銀行應用越趨普及，信銀國際早期已積極發展手機銀行。旗下「inMotion動感銀行」今年首季每月活躍用戶人數按年升兩成。Wendy指，目前銀行七成新客喺手機開戶，網上理財交易佔總交易量超過八成，以外匯、存款、基金、股票為主。為進一步提高客戶黏度，銀行繼續優化手機銀行服務，例如可自定個人化頁面背景、自選功能排序等。
現時信銀大部分銀行服務都可以喺app搞掂，銀行內部亦着力推動科技應用，但Wendy覺得科技只係輔助人嘅工作，可助改善流程減省工序，提升客戶體驗和加強後台效率，至於複雜理財方案仍需靠前線人員處理。目前信銀國際零售銀行員工總數約一千人，整體人手近幾年持平，銷售人員數目去年更增約一成。
至於分行網絡，過去兩三年信銀國際加快分行升級轉型同整合，現時香港分行數目二十三間，預計短期內唔會有大幅調整。為發揮分行價值，近年銀行積極推動綠色金融轉型，將四間分行升級為ESG主題，尖沙咀旗艦分行外牆更採用太陽能玻璃，為分行供應電力。另德輔道中旗艦分行更瞄準高端及跨境客戶，將一樓改建為CITICdiamond 中心，提升高增值客戶服務能力。
