港人北上度周末，並越玩越北，由深圳、廣州等鄰近地區去到廣東省以外，湖南長沙高鐵車程僅三小時，近期亦成為港人新蒲點。睇返長沙市文旅廣電局數據，單計今年首季，已錄得逾四萬八千港澳遊客，按年飆升兩倍，佔入境遊客總量三成。事實上，長沙市政府近年積極發展為「網紅城市」，如優化旅遊名勝、開發文旅景點、推動夜經濟等。為吸引更多香港客源，當地更喺今個農曆新年來港宣傳，啟動「萬名港人遊長沙」交流活動，推廣當地特色旅遊線路。
長沙柏悅酒店總經理康堅白（右）、長沙柏悅酒店行政總廚張雯雯（左）。
投資方面，港資係長沙外資最大來源地，佔外資總額超過五成。筆者今個月初快閃長沙度長周末，發覺市內的確不乏港資蹤影，其中位於黃金地段芙蓉區嘅長沙國金中心（IFS）屬九龍倉集團（4），總樓面面積逾一百萬平方米，總投資超過二百億元（人民幣，下同），一號塔樓高四百五十二米，係湖南省最高建築；而整個綜合體包括商場、甲級寫字樓同酒店。
當地旅遊熱度急升，九倉亦加強酒店布局，繼二○一八年推出尼依格羅（Niccolo）酒店後，過去兩年先後開設瑪珂酒店（Maqo）同柏悅酒店（Park Hyatt），三者均坐落長沙IFS。為方便出入，我今次入住與地鐵一、二號線相連嘅柏悅酒店，步行可去到五一廣場、天心閣、杜甫江閣等景點。
柏悅係凱悅集團子品牌，整體設計豪華而帶藝術感，入到大堂見到一幅五點六米高嘅藝術品《彩絲線影》，酒店職員介紹係由金絲銅線交織而成，代表湖南湘繡。客房空間感十足，望出去更可見湘江全景。凱悅旗下餐飲向來有質素保證，長沙柏悅主打湘菜，由年輕女主厨張雯雯坐鎮。本以為湖南菜一定辣到飛起，點知菜式都啱港人口味，其中東安富貴雞用三黃雞以泡薑泡椒同東安米醋醃好，放入雞形麵包模內焗，係酒店招牌菜之一，當然必試。
對上一次到訪長沙已經係五年前，今次嚟到確實不乏港人身影，市道比幾年前更興旺。事實上，長沙經濟發展迅速，當地政府推出唔少政策優化營商環境，去年長沙GDP錄得一萬五千億元，為湖南省第一；城鎮居民人均可支配收入逾六萬九千元，並先後獲評中國投資熱點城市、中國最具投資吸引力城市。
一座城市嘅吸引力，除咗經濟實力穩紮、文化底蘊深厚，交通基建發展亦係關鍵之一，特別跨市路網可以將相鄰城市連結起嚟，發揮經濟協同效應。近年長沙高速發展，長株高速公路可謂功不可沒，公路由越秀交通基建（1052）營運，全長約四十一公里，連接長沙、株洲兩大核心城市，係區域重要交通通道，兼具貨運物流同市民出行功能，大大強化區域聯通效率。
