目前全球仍有超過八億人口正在捱餓，但諷刺嘅係，卻有超過四成食物遭浪費。根據美國環保局統計，全美有近三分之一食物未食用就被直接丟棄；聯合國糧食浪費指數報告亦指出，全球每年浪費近十億噸食物，單計剩食所產生嘅溫室氣體，已佔全球排放量達一成。至於香港情況亦同樣嚴峻，日均棄置超過三千公噸廚餘，佔都市固體廢物近三成。
Green Price創始人韓駿謙（右）。
唔少港人對過期產品都避之則吉，不過「此期不同彼期」，食物標籤中的「此日期前最佳（Best Before）」同「此日期或之前食用（Use By）」，分別代表品質和食物安全，前者過期仍可食用，後者則不可。為「拯救」呢類瀕臨被棄置嘅商品，幾位港大師弟早於九年前創立綠惜超市Green Price，以低價售賣臨期或過咗Best Before日期食品、日用品、化妝品等，務求「變廢為寶」。公司由概念變成可行業務，近年發展越加蓬勃，分店逾十間。
早前Green Price創始人韓駿謙（Terence）向我解密，亦順道分享未來綠惜大計。呢個創業夢要追溯至二○一六年，當時Terence喺港大就讀工商管理二年級，佢有次做完義工，發覺全港原來有大量食物品質正常，卻因過咗Best Before而遭棄掉。由此萌生創業諗法，膽粗粗同幾位老友參加初創比賽搞環保超市，最終贏得十萬元（港元，下同）啟動資金。
要令意念落地生根，貨源無疑係首要難題。Terence憶述當時幸得大學教授牽線搭橋，結識首個食品供貨商，Green Price先能夠開張。團隊起初主要喺市集擺攤，勝在租金成本低，到後來偶然下有記者經過採訪，報道出街後知名度逐漸提升，更獲大型轉口商賞識，主動供貨。貨源穩定落嚟之後，幾位拍檔開始轉租觀塘工廈作為超市試點；其後主攻基層市場，選址深水埗地舖設分店。
不過開業不久就發現當區平價超市競爭激烈，加上街坊未接受臨期和Best Before概念，因此銷情未如理想，故團隊隨即轉攻中產客路，並瞄準商場舖。Terence解釋中產雖然無咁價格敏感，但一般環保意識較強，故反而有一定市場；港島區門市更有一半為外國客。芸芸貨品中，名牌化妝品、護膚品係收入主力軍，定價較其他類別高，大多為原價四至五折，故利潤較可觀；而零食則最為暢銷，去貨速度快。
公司主打實體店，線上平台僅佔銷量百分之一，目前旗下十二間門市遍布港九新界，如九龍灣、沙田、元朗、中環、灣仔等。Terence強調店面裝修非常重要，門市以銀綠色為主，燈光格外亮白，務求搣甩平價超市刻板印象。隨業務陸續上軌道，Terence等三名公司創始人喺去年登上福布斯（Forbes）社會企業界別「亞洲三十位三十歲以下精英榜」，確實年少有為。
