提振內需同人工智能係今年兩會焦點，針對前者中央安排超長期特別國債三千億元人民幣，比去年加碼一倍，進一步支持消費品以舊換新。另強調推進「人工智能+」行動，支持大模型廣泛應用，並大力發展新能源汽車、人工智能手機和電腦、智能機械人等。
建滔集團執行董事張家成（左）。
作為覆銅面板龍頭嘅建滔系上周公布全年業績，建滔集團（0148）執行董事張家成（Eric）同日上我節目接受訪問。集團二○二四年營業額四百三十點九億元（港元，下同），按年增長百分之九；帳面純利則錄十六點三億元，按年跌兩成一，跌幅主要源於地產業務減值撥備，包括將碧桂園借款同富力地產債券虧損悉數撇清，務求二○二五年可真正反映業務成績。
乘國策東風，加上人工智能熱潮來襲，去年建滔覆銅面板銷售升一成，印刷線路板銷售和利潤更創新高。今年首兩個月，覆銅面板和線路板出貨升勢延續，達量價齊升。Eric指AI風潮蔓延下，帶動雲數據中心、伺服器、機器人及自動駕駛等高速網絡不斷升級，推升下游印刷線路板需求。另「以舊換新」政策亦刺激家電同電動車消費，由於電動車比汽油車多用三至五成線路板，因此電動車賣得越多，建滔越受惠。
集團主席張國榮（Paul）其後補充，回顧過去三年，前年生意最差，上年則處於復元階段，而今年將迎來上升周期，預計將會穩中向好。受惠全球央行減息，金銀銅價陸續破歷史高位，張兄認為價格仲未見頂。雖然原材料價格持續飆升，但集團旗下覆銅面板市佔率逾一成五，位居全球第一，具競爭優勢，故成本升幅可轉嫁客戶。
電子科技一日千里，建滔能穩居行業龍頭多年，除咗靠產能提升，產品研發亦係一大因素。近年集團成功研發多種高頻高速產品，如可應用於AI伺服器內的GPU主板、超薄VLP銅箔、低介電玻纖紗等物料，以迎合AI需求。另旗下車用線路板亦已獲多間汽車客戶認證，有利加速上下游產品銷售。張兄笑言呢一輩人好幸福，只要諗得到，市場就做得到；其實背後有好似建滔呢類公司嘅研發人員日以繼夜投入，令創新意念成真。而研發期往往以年計，如果建滔唔係預早同持續投入，根本無可能應對終端產品推陳出新。
過去建滔涉足地產業務，一直本着「不求做大，只求做穩」宗旨。近年內地樓市回調，集團已連續六年未買新土地儲備，目前手持約七十億元庫存，Eric話中央續推救市措施，預計內地樓市已見底，不過現時內地居民入市意欲仍低，反而租樓需求高，故旗下樓盤採用以租代售策略，以產生固定收入，最起碼可以抵銷物業管理開支。
張兄成日強調「未諗借，先諗還」，故集團財務向來穩健，母公司淨負債比率百分之二十八，子公司建滔積層板（1888）則僅為百分之九；前者現金達三十八點九億元。水喉充裕，派息亦見大方，兩母子末期息連同特別股息分別派一蚊和五毫。
