先祝各位讀者新年快樂，闔家安好！上期提到餐飲業以變馭變，今期繼續同大家「搵食」。香港餐飲零售業深陷寒冬，結業潮持續，卻有曲奇餅店逆市擴張，以月租四十萬元（港元，下同）於旺角開分店。本地曲奇品牌曲奇四重奏由前港姐謝寧（Charlene）同兩位好友合夥創辦，歷盡金融海嘯同新冠疫情等風浪，由小店擴展至九間餅店，開業至今十六年從未蝕過一毫。
曲奇四重奏創辦人謝寧（右）及鳳凰邨合夥人蘭茜（左）。
做生意往往講求天時地利，不過Charlene嘅故事反而係三分靠天命，七分靠打拼。佢憶述二○○八年開第一間舖就撞正金融海嘯，當時已經租晒舖、訂晒貨，只好硬住頭皮上，點知短短一個月便成功回本，全因掌握到香港人口味同偏好。過往曲奇喺大眾心目中都係高糖高脂嘅邪惡零食，雖然香濃鬆脆，但同健康沾不上邊。而曲奇四重奏就標榜低糖製作同高質食材，原材料採購自二十七個國家，無防腐劑、添加劑同色素，並提供試食，務求令顧客食得安心，故吸納唔少家長客源。
除咗本地客，餅店喺內地亦打響名堂，品牌蝴蝶酥、曲奇餅等成為遊客搶手貨之一，高峰時一張訂單量可過千盒。不過創業容易守業難，三年疫情一下子將零售業推向懸崖邊，Charlene嘅生意亦唔例外，當時由十間分店縮減至五間，但幸得有班忠實顧客支持，最終捱過疫情低谷。
好多時見到明星或知名人士開店，開頭都能夠吸引一班消費者慕名幫襯，但能否持久都係靠品質？Charlene認同明星效應對做生意有利，但客人口碑先至係最好嘅廣告，並深信即使營商環境點變，只要品牌保持水準，產品依然有捧場客。
雖然近排零售市道吹冷風，但曲奇四重奏今年生意額卻創下歷年最佳成績。Charlene補充，現時旅客同本地客營業額貢獻各佔一半，其中機場店生意特別旺。有見銷售理想，公司今年於旺角西洋菜南街開設第九間分店，另計劃進軍台灣、新加坡、韓國等，擴大業務版圖。旗下兩項產品喺今年六月更獲食品界奧斯卡 Superior Taste Award（頂級美味大獎）評為三星最高榮譽。
人脈無疑係一間公司重要嘅無形資產，Charlene早幾年結識到乾隆皇帝嘅甜品御廚後人，喜獲對方賞識，傳授蛋卷秘方，去年更獲夥拍好友蘭茜，將百年蛋卷品牌「鳳凰邨」重新包裝推出市場，並於天后開專賣店。佢哋強調絕不將貨就價，就連鷄蛋入貨都一絲不苟，因為不論曲奇餅定蛋卷，鷄蛋都係主要原材料，故特意採用含豐富硒嘅雞蛋。硒係人體必需嘅元素，能增強免疫系統韌性，除咗供應餅店使用之外，Charlene話目前香港未見呢款蛋出售，所以直情拎埋代理獨立包裝發售，果然有生意頭腦。
