每逢年尾為傳統消費旺季，受惠於感恩節、聖誕節等節日效應，雙十一、雙十二、黑色星期五等促銷活動漸成常態，但今年雙十一可能成為歷來最長購物節，多個電商平台提前於十月中旬開鑼。其中阿里巴巴（9988）為雙十一始祖，旗下淘寶同天貓均於上周開展首輪促銷，開賣僅僅四小時，超過一點二萬個品牌做出按年翻倍成交額；逾百個品牌成交額破億元（人民幣、下同），「淘」金力驚人。

淘寶天貓港澳事業部負責人陳子堅（右）。

不過以往淘寶賣家只提供國內包郵，為咗慳運費，好多人都會將心水貨品放入購物車，儲夠一定訂單先埋單集運。為迎戰雙十一，淘寶香港上月底宣布斥資十億元送大禮，包括滿九十九元包郵直送到港，逾十億件商品任君選擇，覆蓋全部輕小件商品，如服飾、3C數碼、家居收納及化妝護膚等。為配合包郵

活動，新客更可享達三百元紅包福利，務求「券」住買家。

由於網購一般金額唔高，能夠慳返運費的確係一大誘因。包郵優惠推出不足一個月，淘寶香港商品交易量（GMV）及訂單量錄得雙位數增長；新用戶註冊量按年增逾一倍；日均消費金額更按年飆升五倍。

成交量增大，物流需求亦急增，淘寶天貓港澳事業部負責人陳子堅（CK）同我分享，今次活動並非單單追求GMV，而係旨在改善用戶體驗，故喺物流上亦花工夫，自提點由原本八百個增至過千個，兼延長營業時間，高峰期每日出動四百至五百架物流車，佢期望整個購物流程做到「絲般順滑」。

為求全方位吸港客，集團線下宣傳亦大花心思，於多個港鐵站投放大型廣告，設計上「玩食字」對應每個車站名，非常吸睛，例如「夾單不求人，黃大仙包郵」、「落坊定落老蘭，包郵直落一齊玩」、「我荃都要」、「我全家都好杏福」等，獲網民大讚夠貼地。另於特定車站貼上折扣優惠碼貼紙，為雙十一促銷預熱造勢。

除咗衫褲鞋襪，近年陸續有港人淘寶訂造傢俬，勝在款式多、價錢平。有見及此，CK透露計劃與

信和集團（0083）合作，將於年底至明年初在港開設「香港家具線上線下體驗館」，主力提供大件家具解決方案。

睇返政府統計處數據，前年電商佔本港零售總銷售額近一成，按年升兩成，但隨疫後線下消費復甦，去年電商佔比回落至百分之八。另有市場調查指出，全球電商滲透率方面，目前內地、美國和韓國等已達三至四成，香港僅佔約百分之五至一成。CK話目前首要任務係「做大個餅」，優化支付同物流體驗，以釋放市場潛力。