早兩年電子消費品行業突然進入下行周期，需求急速下滑，但撞正覆銅面板（laminates）行業擴張期，導致市場產能過剩，價量齊跌，業內多間企業需要減產甚至停工。去年，作為全球覆銅面板龍頭嘅建滔集團（0148）業績雖受影響，但喺覆銅面板領先優勢下，出貨張數反微升百分之三。

建滔集團主席張國榮（中）和執行董事張家成（右）。

今年電子業谷底回升，建滔系兩公司上月公布中期業績，各業務全線反彈。建滔集團和建滔層積板（1888）由上游到下游，業務覆蓋化工、覆銅面板和印刷線路板（PCB）。集團整個產業鏈銷售向上衝，兩母子純利均錄增長，截至今年六月底止，建滔集團按年多賺百分之八至逾十五億元（港元，下同）；建滔層積板純利更躍升七成二至近七點三億元。

電子業回暖，建滔集團執行董事張家成（Eric）留意到冷氣機、光電板等傳統電子市場率先展開升浪，另外電動車、人工智能、高速運算方面嘅需求亦大幅上升。當中同政府提振政策有關，例如內地推出家電「以舊換新」政策，八類家電補貼百分之十五，電動車消費補貼最高更可達兩萬元人民幣。由於電動車比汽油車多用三至五成線路板，因此電動車賣得多，建滔越受惠。

全球供應鏈重組，唔少跨國公司採用「中國加一」戰略，將生產線局部轉移至東南亞或印度等，以分散營運風險。而建滔早年已走出國門，喺泰國、越南、緬甸等地設廠，近年考慮應歐美客戶要求，積極加碼泰、越產能，進一步拓展海外市場。

新質生產力係今年國家發展重中之重，強調傳統產業高端化、智能化、綠色化轉型。事實上，建滔早年已洞悉減碳趨勢，陸續於工業園區建設太陽能光伏發電站，實現節能減排。目前累計投資七億元於綠色電力，單計今年上半年已間接減少約三點六萬噸碳排放，慳咗五千四百萬元電費，幾年落嚟共慳電費一億七千六百萬元。加埋熱能回收所慳開支，建滔綠色投資回報極佳。

我一向佩服集團主席張國榮（Paul）做人做事既進取亦穩守後防，例如多年前投資內房，大部分用內部資源，且集團有龐大工業基礎，即使動用銀行貸款亦能享優惠息率，因此昆山剩餘住宅單位已經係零負債，即使減價促銷都有少少錢賺。集團五年前已停止買地，因此可較輕易淡出物業發展，淨持有倫敦、華南、華東、香港投資物業，每年收租十四億元。

對於生意同投資張兄擅用逆思維，雖然目前銀行定存息高，但佢就選擇趁低吸納高息藍籌股，賺股息之餘，若主營業務有資金需求，亦可立刻套現調動資金，笑言好過問銀行借貸。長實（1113）主席李澤鉅早前業績會上提到「邊個賭香港長期差都錯」，而張兄更坦言家在香港，成副身家喺度，對本港前景充滿信心。