有老友問我有冇食過廖孖記腐乳，我話食過，不過是很久以前的事，當我在加拿大讀書時，有時都會用廖孖記腐乳送飯，返香港之後就未試過，不過又唔能夠講到咁實，出街食飯，叫碟腐乳炒通菜，唔知道飯店會唔會用廖孖記，老友話我就想，廖孖記咁貴，點會用。

食安中心點名批評廖孖記，經過一輪糾纏之後，廖孖記執笠，到最後大家發覺，廖孖記腐乳原來不是在香港生產，有人話可以，但亦有人話不可以冠以香港製造。我認為如果廖孖記以OEM形式在內地生產，是可以話係香港製造，但現在廖孖記是購買半製成品，在香港完成最後工序，所以不能夠話是香港製造。

我講大家未必會相信，OEM出現，間接救了香港，在上世紀六七十年代，全亞洲製成品都是以美國為目的地，老實說，當時美國對香港不錯，以成衣為例，香港有龐大配額，但香港是彈丸之地，有配額都冇用，都唔夠人生產，好彩適逢中國改革開放，製造業可以搬入內地生產，但問題是如果在內地生產，又唔符合配額條件，唔知邊個諗到條好橋，用OEM方法在內地生產，好多人叫OEM做來料加工，其實不夠貼切，應該是原設備製造商。

OEM概念就是商品如果在內地生產，內地只能提供土地廠房以及人手，其他全部由香港供應，當中包括機械、物料，一針一線都是由香港供應，而製成品亦要全部出口，不能內銷，後來改為有小部分可以內銷，這個做法可以消耗大量內地勞動力，而又可以以香港製造出口。全盛時期香港大約有五萬間OEM廠在內地，究竟幫了幾多內地人，大家可想而知。

唔講唔知，OEM對中國現代化亦有所貢獻，OEM工廠所用的生產機械是可以進口，但不能夠轉售，原則上那些機械在退役時是要報銷，同時是要得到官方證明，但法例是死的，不少廠商在進口機械一段時間之後，會將機械轉售畀其他內地工廠，但唔會報銷，所以，有一些工廠，如果睇生產設備報表，可能有五百台機，但由於倒賣，工廠可能只得五台機，由於涉及不法活動，香港人比較膽小，很少會咁樣做，台灣同胞比較大膽，倒賣一輪之後，法人便會返回台灣，中央政府追都追唔到，最後不了了之。但中央政府點解容許倒賣，其實，那些被倒賣的機械是比較先進，對中國的現代化是不可或缺，我唔敢講倒賣是中央政府半默許，最低限度是執法不嚴，對中國現代化的貢獻方面，台灣同胞比香港人做得好得多。