![](https://ew-plus-static.hkhl.hk/prod/image/2024/7/409128d8f11c4956ab104ba5b7961cf0.jpg?x-oss-process=image/resize,w_720,m_lfit)
自今年年初起,美國多項經濟數據一路向好,市場減息預期遇冷,美匯指數持續反彈之下,觸發亞洲貨幣新一輪貶值風潮,日圓、韓圜、印尼盾、菲律賓披索同人民幣等均無一倖免;而印度盧比同越南盾更見歷史新低。
夜遊會安古城,氣氛甚佳。
越南匯率出現大熊市,相信並非單一因素所致。越南作為世界工廠之一,製造業貢獻全國經濟生產總值約兩成五,但近年全球消費緊縮,美國去庫存速度減慢,拖累去年越南進出口貿易額連跌六個月。近月更有外商表示,由於減稅同補貼承諾落空,會凍結當地投資,內憂外患之際,越南盾越貶越低。
亞幣跌跌不休,促使唔少港人跟住匯率去旅遊。除咗中日韓等旅遊熱點,近年越南都成為平遊之選,上月同幾個老友一齊出埠去越南度長周末,同機乘客亦不乏年輕港人。去旅行時間就係金錢,以前入境越南一係辦落地簽證,一係去駐港領事館排隊預先辦理,兩者都費時失事。有鑑於此,上年越南政府推出電子簽證,有效期長達九十日,期內亦可多次入境,確實方便好多。
過去我只係去過胡志明市,今次出走,首遊被譽為「東方夏威夷」嘅峴港(Da Nang),感覺同胡志明市好大分別。呢度由昔日小漁村蛻變為全國第四大城市,有逾五百年歷史,以清澈沙灘同文化遺產聞名。而最令我印象深刻嘅係會安古城,十五至十九世紀,會安係貿易重鎮,多國商船經常進出,因此城內建築具有中、日、歐歷史風貌,更於一九九九年獲列為世界文化遺產。鎮上充滿古色古香氛圍,精品小店、文青咖啡店、古董商行雲集,逛夜市時街上有成千上萬燈籠,氣氛更好。
越南係一個電單車當道嘅國家,公共交通發展仍處起步階段,所以我地出入都係叫車為主,車費每公里只需約一萬越南盾,不過市中心人煙稠密,要有塞車嘅心理準備。當地生活成本低,一般消費物價非常親民,如酒店千呎套房盛惠千四蚊(港元,下同)一晚;我哋五個人去飲咖啡夾埋唔使四十蚊。不過峴港始終係旅遊城市,消費價錢好兩極化,如喺酒店用餐就貴好多。
疫後全球旅遊業出現大洗牌,旅客更着重多元化嘅消費體驗,並傾向沉浸式深度遊,而越南嘅人文歷史同自然資源都好吸引。睇返越南旅遊協會數據,去年國際旅客錄一千二百六十萬人次,按年飆升三點四倍,其中韓國係最大客源市場,佔近三成;中國則緊隨其後,約佔一成四,並目標今年國際遊客達一千八百萬人次。據內媒報道,越南政府正研究對中國實施短期免簽政策,以進一步刺激當地旅遊需求;另擬計劃與其他東南亞國家推出六國聯合簽證,以吸引更多長期停留嘅外國遊客。