一個品牌創立之初，大多由家族或朋友拍檔經營，美國家庭多有車房，於是好多科企創業家，例如大家熟識嘅微軟蓋茨和蘋果喬布斯，都係由屋企車房開始創科之路；微軟現時內部仍有Microsoft Garage項目，鼓勵同事發揮創意。至於香港，礙於地方細當然無車房，但上世紀唔少工業家，亦係由家庭式作業做起，以至搬到工廠大廈，及後北上設廠。當中有喺生產以外創立自己嘜頭，好似李錦記、紅A、駱駝牌、維他奶、保濟丸、雞仔嘜等，嗰時家家都有佢哋產品。

雞仔嘜第四代接班人譚天逸（左一）和譚天韻（右一）。

品牌之路多由家族經營開始，發展落去部分企業嘅家族色彩會淡化，由專業管理人掌管，甚至成為上市公司。不過我最近有機會同雞仔嘜第四代接班人譚天韻(Alicia)和譚天逸(Jennifer)傾偈，兩位不約而同話絕不介意公司係家族企業；雖然管理層都有富零售經驗嘅專業管理人，但佢哋好珍惜公司有「家」嘅感覺。公司團隊有家族成員，有工作廿幾年嘅同事，亦有九十後、○○後年輕梯隊，大家融合得好好。事實上雞仔嘜品牌以家為本，外面有咩挑戰返到屋企就係安全網，因此有咩事就大家商量。

但即使一家人都會有不同想法，點樣磨合？Alicia係銀行出身，而Jennifer之前係品牌顧問，兩位返家族企業之後曾經做過一次presentation，分別勾畫自己對公司發展嘅理念，結果好有趣，Alicia嗰份係數字為基礎，而Jennifer嘅presentation就充滿圖像，充分表現兩人嘅專長和分別。不過，正正因為各有所長，佢哋會用理性討論嚟解決問題，並且尊重各自喺不同範疇嘅決定權，當中有意見或不滿要當日講出嚟，唔好有「隔夜仇」。Alicia講笑話，佢加埋Jennifer同專業管理人三位嘅英文名合拼成「JAM」，正正代表公司團隊嘅管理方式，最重要係目標一致，過程可以即興發揮。

不經不覺兩位「返屋企」工作已經九年，最初兩人都抱住「創業」思維，希望為老品牌帶嚟改革，令佢更年輕時尚。上一代掌舵人默默耕耘，一心做好品質，好少出去宣傳。兩位覺得品牌年輕化之後應該更多人buy，但一開始衝得太快，結果新產品吸納新客唔夠快，而舊客又覺得唔啱自己。於是兩人決定重整思路，想清楚究竟客戶群要乜嘢，而雞仔嘜應該服務乜嘢客？

經過一輪思考討論，佢哋回歸到「家」嘅基本面，從年輕媽咪角度出發，因為媽咪會為成個家庭考慮，買最優質嘅產品，特別係對小朋友，有時自己唔計較衣着，但會買質地好嘅衣物畀仔女。

至於未來發展，雞仔嘜四年前曾經撤出內地市場，當時主要考慮到市場未打響因而未達到規模效益，唯有壯士斷臂。但兩位覺得現時網上宣傳力量日盛，例如之前有人喺小紅書出咗一個post，當日即刻返咗過百張單。時機對，公司亦準備就緒，於是計劃再次衝出香港。除網購外，公司都會考慮開店，等客戶可以親身體驗貨品質素，同時維繫客戶關係。