據深圳統計顯示，現時月均五百五十萬港人入境，單月吸金量達約四十億元（港元，下同）。剛過去嘅母親節，雖然並非連假，但仍有大批港人北上「過節」，香港餐飲聯業協會預計業界生意額或跌約一成五，節日前後更接連有餐廳失守退場。

優質旅遊服務協會主席黃傑龍（右）。

本地食肆寒風持續，但好開心見到有餐廳逆境求變，開創新路。其中叙福樓集團（1978）引入嘅日本漢堡扒品牌「挽肉と米」更成為市場熱話，新店選址高檔中環商場IFC，首日開業未開門已吸引三百幾人排隊，千四個訂座名額日日爆滿，更有人將排隊籌號放上網炒至四百元一張。今期就同集團主席兼優質旅遊服務協會主席黃傑龍（Simon）傾下業績同「禦寒」攻略。

作為集團第二代掌舵人，Simon向來擅長打逆境波。創立近四十年嘅叙福樓以中菜起家，高峰期有三十多間中式酒樓，隨後市場漸趨式微，佢接手後銳意跳出傳統框架，以特許經營方式引入多個日韓料理品牌，主攻燒肉同火鍋。至今共營運逾五十七間餐廳，成功帶領集團轉換賽道。

早前集團公布二○二三年全年業績，收入按年升兩成至十二點八億元，純利多賺一成三至八千八百萬元，主要受惠於社會全面復常，促使營業額迅速反彈。期內餐廳數目按年增四間；而特許經營品牌同自有品牌收入均錄雙位數升幅。集團派末期息每股四點零六仙，全年合共派二十一點三一仙，總派息率約為百分之一百九十四。

過去幾年，業界走過疫情低谷後又面臨北上風潮，挑戰不斷。Simon留意到本港市道自去年中起已有暗湧，由於港元對人民幣持續強勢，加上港車北上，深圳熱點商場與口岸無縫接駁等因素，加速港人北上消費，同時本地出現消費降級趨勢。

因應市場變化，集團積極調整營銷策略，如推出平價燒肉套餐；設計全新會員電子平台；降低入會消費門檻等，務求以高性價比吸客。Simon仲不時透過社交媒體宣傳餐廳動向，佢喺Facebook以「獨一無二、風度翩翩嘅牛肉佬」吸引咗五萬幾followers。

近月新加坡有報章評論香港淪為「趕客之都」，其中提到茶餐廳服務煩躁、不合理限時用餐體驗等。Simon慨嘆本地業界人手長期不足，培訓時間自然縮減；而外勞申請程序繁複，由入紙到獲批長達半年，「工搵人」情況持續下，服務質素難以改善。佢喺Facebook寫咗一篇有關服務惡性循環嘅「故事」，講到香港好似一個「江湖」，「人人心中有不滿，卻忘記了自己也是江湖中人」。不過，嚴重缺人之下的確好難要求服務員「江湖中人，當以寬容待人」，因此集團近年積極以餐飲科技代替人力，如收餐機械人、全自動洗碗乾碗、自助點餐等，幫前線同事「降火」。Simon希望新鮮美食、優化運作加上貼市營銷，可以成功留客。