自從面書出現了一個執笠群組之後，令到移民離開香港，尤其是去了英國的人非常雀躍，因為執笠群組經常報道香港舖頭食肆的執笠情況，甚至未執笠都會預先報道，住在香港的人可能唔覺得，但離開香港的人就以為香港就嚟陸沉。
有移英老友打電話畀我，劈頭第一句就問我幾時離開香港，已經有咁多舖頭執笠，代表有很多人已經或者準備離開香港，我應該早走早着，小心遲走瞓唔着。我話不破不立，雖然有咁多舖頭執笠，但新開張比執笠的還要多，在二〇一八年底，香港有二萬七千萬間食肆，到二〇二三年底，當中經歷社運與疫情，但食肆數目上升至三萬三千五百萬間，今年香港全面復甦，政府又聽從民意全面撤辣，樓市與股市都回復升勢，在咁嘅情況下，食肆數目應該大幅上升而非下跌，樂觀預測，今年底食肆總數有機會接近四萬間，老友聽完我講之後話要去超市，拜拜都唔講就收了線。
新加坡枱底資助Taylor Swift演唱會在當地舉行，最大理由是經濟效益，可以拉高新加坡國民生產總值百分之三，點樣計到出嚟我真係唔知，不過，我相信一定可以拉高GDP，老實說，有咁多人去新加坡睇Taylor Swift，行街食飯住宿坐飛機都會用很多錢，再將消費用的錢輻射出去，條數真係好大，最終的經濟效益達到GDP百分之三亦不出奇，不過，與香港因執笠達到的經濟效益來比較，真係蚊髀同牛髀。
不少人睇執笠是很悲慘，但有很多人認為執笠是商機，如果香港一年冇舖頭執笠，香港的經濟一定會受到影響，而國民生產總值亦會下降。
每年在五一勞動節之前，一定有裝修公司請我們的同事食飯，原因是有租客的舖頭執笠，將租用的舖位交回給我們，一定可以再租出去，如果新租客問我們有冇裝修公司可以介紹，同事會介紹一些比較老實裝修公司，並不是價錢平貴問題，而是可以準時交貨，不會中途加價，在租客來說，由業主介紹的裝修公司有一定保障，很多人不明白這個道理，裝修公司搵到錢，請我們的同事食餐勁亦好應該，無形中執笠帶給食肆生意，是間接的經濟效益。
香港有三萬三千五百間食肆，以每一間食肆平均可以生存五年計算，即是今年有六七千間食肆裝修開張，以平均每間食肆用一百萬元裝修費計算，直接經濟效益達到六十七億，再以十四倍數輻射，所得到直接與間接的經濟效益達到九百三十八億，比Taylor Swift唔知多幾多倍，至於佔香港國民生產總值幾多個巴仙，我又真係唔知，如果冇舖頭執笠，就沒有九百三十八億經濟效益，香港就有機會出現負增長，所以，執笠並非壞事，視乎在哪個角度去看，不過，不破不立永遠是對的。
