今年環球經濟如首富李嘉誠預言：「山雨欲來風滿樓」，而港股則係「無風無雨也無晴」地一路向低，上月恒指更一度跌穿萬七點，創逾一年以來新低。券商結業潮由去年延續至今，按港交所數據，今年至今有超過三十間券商停業，當中不乏老牌經紀行。
金融服務界立法會議員李惟宏（左）。
金融服務界功能界別立法會議員李惟宏（Robert）日前同我分享業界境況，確實過往三年有近過百間券商退場，尤其免佣市場當道下，傳統券商所面臨嘅挑戰更甚。但Robert提出，證監會持牌人士及公司數目並無大變，原因係隨住政府推出開放式基金型公司（OFC）制度，有較多傳統券商轉型成資產管理公司，近期9號牌數目上升速度頗快，從呢點可以見到行業開始朝多元化轉型發展。
另外，除咗透過同業併購求存之外，佢建議券商開拓更多元產品，如債券、衍生工具、貴金屬、虛擬資產等，減少單一依賴證券業務收入，以擴大生存空間。
行業升級轉型需要政策助攻。政府八月成立促進股票市場流動性專責小組，希望以組合拳重振股市。其中業界引頸以待嘅股票印花稅減免終於拍板落實，稅項由百分之零點一三調低至百分之零點一，回復至二○二一年加稅前水平，但喺全球主要市場仍屬較高水平，對北水南下同高頻交易構成一定影響。作為小組成員嘅Robert坦言減幅力度固然越大越好，但考慮到近年政府財政壓力增加，今次減稅已見到政府誠意。
至於新股市場，據港交所最新季度業績，今年首三季香港只有四十七隻新股上市，按年跌六成七。為吸納更多新資金泊港，近月政府大刀闊斧改善交易機制，如降低市場資訊費用、檢討股票買賣差價、惡劣天氣下交易安排等。至於GEM板，今年上市宗數仍未破蛋，Robert認為過往監管機構對中小企上市申請嚴苛，但樂見近日港交所終開綠燈，擬引入簡化轉板機制，並取消季報規定等，希望有助激活交投量。
股市以外，近年政府積極探索債匯市場發展潛力，如推動雙櫃台模式，強化離岸人民幣業務；另推亞洲首隻沙特基金落戶港交所。Robert認同東盟潛力吸引，兩地合作可進一步豐富本港金融產品，當中伊斯蘭債券大有可為，憑藉過往三次發債經驗可為市場開路。
近年投資市場頻頻有詐，其中虛幣平台JPEX和HOUNAX騙案更成為城中焦點。睇返警務處統計數字，今年首三季錄得超過三千五百宗網上投資騙案，按年飆升約一點六倍。Robert認為，詐騙根源並非在於投資產品或監管制度，而係缺乏投資者教育。佢提醒市民可循監管機構網頁查證持牌名單，唔好輕信網紅宣傳而誤墮騙徒陷阱。
雖然外圍風雨無法掌控，但期望業界能自強不息，加上政策支持，風雨過後香港仍然係國際金融中心現址。
