在香港政府未對JPEX採取行動之前，有人向我推銷虛幣，並且話投資地產已經out了，不但動用資金非常龐大，而且受制各項政策以及利息升降；投資虛幣不但本小利大，而且政府不會監管，並不是說政府沒有監管機構，而是監管唔到，所以可以自由發揮，只要向證監處遞一份申請表，便可以同其他投資者牌照在申請中，申請中並不代表冇牌，只是證監處做唔切，出牌只是時間問題。那人咁講我覺得很奇怪，即是一個人遞了考牌申請便可以駕車，理由是運輸處未有時間考牌，並不是那人冇牌。
那人話未來樓價會大跌，我應該賣走部分物業，轉移投資虛幣，不但是我個人投資，仲應該叫埋親戚朋友all in，生意夥伴一齊玩，有錢齊齊賺；他已經賺夠，叫我買虛幣只是益吓我，而且我能夠叫到人買，是有巨額佣金，如果我臉皮薄，他可以代勞。我話自己是一個古老生意人，只相信邊度有咁大隻蛤乸隨街跳，叫我買虛幣的好意，我心領。
較早前收到那人電話，他非常雀躍話準備去獅城參加全世界虛幣大會，有二千人參加，在今次大會之後，有份去獅城開高峰會的幣商就好似攞了牌一樣，如果不合法，就唔容許幣商在獅城開高峰會，香港證監處是否發牌都唔重要，獅城幣商高峰會可以說是一個認證，待他回來之後，可以大搖大擺推銷虛幣。當時JPEX事件已經發酵，所以我話唔好咁開心住，獅城虛幣高峰會未必開得成，就算開得成都冇用。
JPEX出事，有投資虛幣的老友話今次敝幣弊，即是自己擁有虛幣弊傢伙，老友雖然不是投資JPEX，但其他都差不多，自己輸錢唔緊要，最弊連累親戚朋友，而且有佣金收，唔知有冇觸犯法例。我話我不是律師，最好都是請教律師意見，不過，今次香港政府是有備而戰，並不是擊殺JPEX咁簡單，雖然JPEX涉及金額最少十五億港元，以及最少二千五百人受害，但仍然不是政府目的。政府最終是要監管香港虛幣市場，其實，虛幣又點樣監管，虛幣公司根本不會畀真實資料，又點會申請發牌，冇牌就冇得玩。
本來獅城可以藉着一次高峰會成為世界虛幣中心，但香港政府深謀遠慮，在高峰會之前爆出JPEX事件，不但氣氛大減，估計有不少幣商退場，甚至去都冇用，因為一般幣商運作模式與JPEX差不多，JPEX出事，他們也難獨善其身。換句話說，香港政府今次高調擊殺JPEX，目的是獅城的幣商高峰會，我相信在今次JPEX事件之後，幣圈將會偃旗息鼓一段時間，不久之將來，會以一個新的形象出現，如果香港政府做法好似我的推測，真係要畀個like。
