男友人話小妹性別歧視，專欄話題多集中在女士身上，好似當個地球冇男人會戴翡翠。
對方當然係講笑，卻又說中事實，專欄內容確實是多為姊妹們服務。我內內外外都係個「girl」，講心得、講感受，從女性角度出發都好正常吖。
「從善如流」我識嘅，既然有意見，今期就學啲動漫主角咁玩「性別互調」，變成男人講翡翠，變身！
咳咳！（連把聲都「老牛」咗。）
嗱，我哋男人戴翡翠，唔係求「靚」，「型」先係至重要，最驚戴到似個「油膩大叔」。
我哋係可以戴手鈪、戒指，或者耳環，但唔多會係翡翠。自信同G-DRAGON一個grade嘅，咁你可以試吓，一般男人如我就咪挑戰嘞。戴返吊墜唔會錯，況且翡翠吊墜種類多，唔驚揀唔到！
放首選梗係「平安扣」，翡翠中佢形象最鮮明，兼且最有代表性，加埋祝福寓意又好，仲想要咩？
男人戴「平安扣」千祈咪小家，一定要就返身型揀件大嘅。另外，除非你堅係有美感，否則唔好諗住加啲design去標奇立異，配條繩、織個結戴就可以。
認為圓咕碌嘅平安扣唔夠man，可以搵件「方牌」戴。翡翠方牌大方又易襯，着返件淨色tee墊底，「型」晒。無意做「型男」咯，可以翡翠方牌+文青打扮，「書卷味」濃過你拎住部《追憶似水年華》通街走，係咪好正呢？
想戴有雕刻嘅翡翠，我都有介紹，杯啤酒熱嘞，我飲咗再講。（骨碌骨碌，爽呀~~~）
嗱，操到手瓜大過個頭，叫你戴嗰啲「花鳥蟲魚」嘅翡翠雕件即係整蠱你，點都係「龍」、「虎」、「鷹」、「馬」呢四大穩陣。揀呢種翡翠嘅竅門，就係唔好貪雕得複雜，睇落唔似貓唔似狗仲衰。簡簡單單、清清楚楚睇到雕嘅係咩嘢就夠，咁樣反而先顯到taste。
驚自己個勢「食」唔到呢類翡翠，諗吓「竹」、「葫蘆」、「福果」囉，呢幾樣「植物類」嘅翡翠，同男人都夾。咪話我唔提你，「葫蘆」、「福果」呢啲翡翠要揀厚身，「薄切切」就有形無神，唔戴好過。仲有，厚之餘要手感順滑，巖巖巉巉「un」住個心口，戴得唔舒服冇運行唔好賴我。
揀好咗戴咩，都仲要識點戴。男人戴嘢最棹忌「多」！有一件响身夠晒。想加鑽石嘅話，得！但唔好重手，始終太閃唔係個個男人都carry到。唔鍾意有鑽石但又想「聚手」有手感，suggest你鑲少少金再配條金鏈，一樣有份量。冇呢種追求嘅話，直接織個繩結過頭笠，乾手淨腳之餘，又保留到翡翠嘅原始本色。
兄弟，男人戴翡翠係冇咩特別玩法，但响「冇」之中，你都戴到屬於自己嘅味道出嚟，咪「有料」囉。
先旨聲明，呢啲係細佬個人見解，覺得啱咪照做，唔啱嘅就當冇聽過，我冇hard feeling喎。點都好，呢個「round」我嘅，飲！
喂，飲杯啤都咪吓咪吓，嗒紅酒咩家陣？男人老狗爽快啲，清咗先講嘢！
男士戴翡翠，從雕刻至款式，主打一個「清簡」錯不了。
