「Mmm~天氣不似預期，但要走，總要飛⋯⋯」唔知Eason覺唔覺得，現在何止天氣，連季節都不似預期呢？月餅都就食咯，街上行人還是背心短褲，單睇服飾，點似秋天？
眼看未為真，「體感」是朝早夜晚明顯有了涼意，暗中偷換的秋風開始令人皮膚乾燥周身痕，潤膚霜要準備了。
潤膚產品的主要作用是「保濕」和「鎖水」。「保濕」即是吸收水份，令你的肌膚保持柔軟濕潤；「鎖水」就是在皮膚上形成一層保護膜，減少水份蒸發流失。通過這兩大功能，皮膚需要的水份便得以補充和維持，避免因乾燥而出現紅癢、掉皮和龜裂等問題。
以上資料說明了潤膚產品使用對象是「人」，並非「翡翠」，可是我見大家使用lotion時，總愛一物二「潤」，自己塗抹之餘，也不在意翡翠沾上。
你相信幾千蚊一罌潤膚霜，裏面又日月精華、又科技萃取、又納米導入，就算「搽」啲落翡翠度，有好無壞啫！甲之熊掌，乙之砒霜，翡翠有專屬的滋潤用品，你的「保濕神器」還是獨享吧。
潤膚產品多含有油份，翡翠不能、也不會將它們吸收，油份長期積附，翡翠原來清透亮麗的外觀便受到影響。想像不到畫面，可以在一片玻璃上面搽少許你的潤膚霜，玻璃會馬上模糊渾濁，這正等同翡翠沾到潤膚產品後的情況。
假設你一日塗三次潤膚霜，每次也「揩啲啲」在翡翠上，日子有功，翡翠的靈彩就會被完全掩蓋，變得了無生息，暮氣昏沉；更弊是連累戴着的人亦被映得零落憔悴，別人睇見以為秋風秋雨真會愁煞人。
其實戴翡翠又需要塗lotion，最佳方法是先把身上的翡翠除下，搽好之後才把它戴回，過程中避免觸摸翡翠表面。假如翡翠真的沾到了潤膚霜，亦不必驚徨失措，馬上用紙巾清潔就可以。
潤膚產品不會對翡翠構成實質破壞，只是會引發視覺上的災難，if you don't mind，是可以繼續隨意搽lotion，唔使理我講嘅。但一個人會care自己皮膚乾燥爆拆起格仔，又點容忍到戴在身上的翡翠灰濛渾濁冇光彩？So，呵護肌膚時，就有必要在乎埋件翡翠。
我知我知，每次搽lotion，件翡翠又要除又要戴，好似係煩咗啲。然而世間有些叫人艷羨的事物，就係要不厭其煩，長年累月用心經營返嚟嘛，keep一身Q彈水嫰的肌膚是、養一件清徹明麗的翡翠亦是。
「靚」呀，從來冇得求其是旦貪方便，有嘅話，我每日又使咩搞兩、三個鐘先出到門口吖。
任何潤膚產品，都不要跟翡翠同享。
