廣東話有一句「唔熟唔食」，用在「非食物」上，100%負面。但將個「食」字改成「做」字，又頓時變了處事箴言。
翡翠要經過多道不同工序才會成品，就是業者也不會通曉全個過程。
所謂「唔熟唔做」，多是指不相熟的事情就不要沾手，箇中道理非常顯淺，毋用我贅言。可惜人類總是高估自己的能力，「唔熟唔做」雖不時聽人講，因「撈」過界而碰壁的事仍時有所聞。
「隔行如隔山」說明了跨行業發展的難度，實情同一行也會因為「工作內容」有異，要求的技能亦有別，不熟悉卻去參一腳，同樣難嚐甜頭。
以我處身的翡翠業為例，裏面都細分不少類別。例如「買賣」這一項，先分成了「原料」（不經雕琢）與「熟貨」（經過雕琢），在「熟貨」一欄下，又有面向行家的「批發」和主攻散客的「零售」兩種。
負責雕刻的玉匠分門更多，有的獨造「手鈪」、有的專雕「素件」、有的精刻「花件」；而雕製「花件」的玉匠裏，又有人擅長於或人物、或瑞獸、或花草、或山水等等。以上工種盡歸納在「翡翠業」裏，但業者絕對不會樣樣皆精瓣瓣掂。
說「安份守己」也好，講有「自知之明」又得，行家們大多趨向緊守自己相熟的範疇，甚少無端跨界。因為大家都知道各工種自有其竅訣，不熟行就亂沾一把手，分分鐘total loss。
像是一向做翡翠「批發」生意的，客戶群基本上是識貨的同行，不需多費唇舌講解。但開店轉做「零售」，面對的客人未必懂翡翠，沒有舌粲蓮花的口才去推銷，舖頭隨時拍烏蠅。
又似從來專注雕琢素件的玉匠，忽然改為雕造花件，雖則同是靠一對手，但思路卻大相逕庭。「素件」講究成品的「形」，務求渾圓飽滿；雕造「花件」則重在「神」，需要呈現氣蘊。將造「素件」的想法「搬字過紙」套用到雕「花件」上，結果無非慘不忍睹，反之亦然。
不要簡單說句換個營運模式或思維就得，有些事「做慣做熟」就好似呼吸般自然，唔係㩒粒掣就shift到。再貼地啲講，條winning formula一直可以糊口養家賺到錢，何苦要冒險涉足不熟悉的領域？
你一定覺得我份人好消極，咩嘢都「唔熟唔做」，唔做又點會熟先？
我勸你「唔熟唔做」，冇叫你「唔熟唔試」嘛，想跨界顯身手並無不可，只是無必要（1）盲目熱血，以為自己無所不能，（2）過份心雄，揮金如土大灑金錢，（3）放棄本業，盡地一煲自斷退路。
記得一位同行前輩講過：「個天俾一樣嘢你搵到食，就要感恩嘞。」能力值爆錶嘅你梗係可以多方發展，小妹資質平凡，「翡翠」能夠做熟、做好已經滿足，其他生意有金執，none of my business啊！
