發佈時間：12:13 2023-09-01
參選港姐出身的「東張女神」的何沛珈（Roxanne），主持《東張西望》盡顯過人口才，加上樣子甜美，33C、22、35這組魔鬼身材密碼，尤其22吋蛇腰，即穩坐無綫小腰精之位！這位女神叻靚醒，裙下之臣當然多不勝數，早前她被揭和「星三代」阮浩棕秘密交往9個月，《東周網》全程直擊他們在餐廳撐枱腳的甜蜜互動！
高峰期重達154磅
女神唔易做！要長期保持身材健美，懶不得！何沛珈接受《東周網》訪問，親自分享瘦身血淚史！回到做女神前，她說人生最高峰的體重是讀中學時，重達70公斤即約154磅，她說：「當時條腰粗到30吋，又有肚腩，讀中四時立定決心減肥！」
月經不穩
減肥是來回地獄又折返人間的過程，由中學開始視瘦身為另一人生重任後，何沛珈試盡所有方法，吃代餐或減肥藥物當然榜上有名，着厚衫焗汗、全日只吃豆腐但狂做運動等瘋狂方法也試不少：「青春期時只要唔食嘢，好快就跌磅，但隨住年紀漸長，唔可以再用呢個方法。其實瘦身要針對個人體質，人人唔同，胡亂去減，唔夠營養，只會影響健康，我試過有3個月，搞到月經都唔準！」
包膠去水
最瘦的時候是2年前，只有49公斤（約108磅），何沛珈說：「當時真係紙板人咁，瘦得好緊要，條腰幼到得21.5吋。因為選完港姐之後，重咗5、6kg（約11至13磅），上鏡時導演投訴我水腫，所以我喺一個月內，專揀中午最猛太陽時去跑步，我個造型係着住件黑色膠袍，着長衫長褲再加幾條毛巾，就係為咗排汗。」
因緣際會下，何沛珈認識一位健身教練，終於知道如何有效去水腫及瘦身，她說：「我減到成日手凍腳凍，淋巴又塞，教練好好，教我點樣去水腫，同埋話減keep fit要配合心跳頻率、體重同年紀，有啲年紀係你唔需要跑步，只係散步就可以燒脂。」
牛油果不瘦胸
嚴控飲食，何沛珈非常自律，開工時人家吃飯盒，她另購沙律，又或主要選取高蛋白質食物，盡量少飯，因攝取豐富的蛋白質，會大大減低飢餓感，她有時更會買來大堆零食給台前幕後，自己只淺嘗一口。
至於如何瘦人不瘦胸，何沛珈說一定要有油！「好多人減肥唔掂油，始終胸部有75%由脂肪組成，減肥要留意總熱量，適當吸收蛋白質同油脂，例如我會食牛油果，因有豐富蛋白質、維生素同不飽和脂肪酸，有助增加胸部組織彈性。」
靠Plank保蛇腰
平均每周至少一次到健身室做gym的何沛珈，發現平板支撐（Plank）非常易做，可強化身型線條，增強深層的核心肌群，強化腹、背、臀部和雙腿等肌肉，更會提高新陳代謝率，達到燒脂效果，每次以30下為一組，共做4組。
另外，何沛珈也會利用滾輪來健身，令腹部線條更完美外，更有另一個妙用：「我會將個滾輪輕壓腹部，又或者我趴低時利用腹部去推肚，有效幫助排便。」她續說拉筋運動及按摩淋巴也重要，可利用按摩槍及滾輪來按摩腿部：「我嘅心得係，如果怕痛嘅話，可以先做啲運動或焗桑拿令自己個人熱啲，個身熱嘅時候，先至去按摩或拉筋，就會冇咁痛。」
