發佈時間：22:13 2023-08-07
你想活出怎樣的人生？
陳美齡（Agnes）會答你：「𠵱家每一日，我淨係覺得要維持現狀。」
六十七歲的她，十四歲便出道，超過半個世紀以來，由樂壇到文壇，由以學生身份，進入美國頂尖學府史丹福大學，到三名兒子也成了其母校的畢業生。事業，家庭也順心，但她仍未停步，除了是「維持現狀」，還有一個原因。
「我成日覺得自己唔夠，仲有好多嘢都唔識，又唔夠努力⋯⋯每個身份總有成長嘅空間，歌手、寫作、教育方面都係，要不斷咁學習，不斷鍛鍊自己，因為時代一路喺度變，我嘅狀態都係一路變，所以要一路學習，盡量去成長。」
即使〇七年罹患乳腺癌，也未令陳美齡停下成長的步伐，迎難而上，成功抗癌後，她對回饋社會的決心，更加堅定。
「可能我大病過，仍然活着，係一種恩惠，我唔可以Complain，如果我發現得遲咗，可能都會冇咗啦，係咪？
「如果我命運裏面，仲係要做嘢，仲可以貢獻到社會，或者幫助到一啲人嘅話，咁係唔應該偷懶。我驚我一偷懶就會病，𠵱家每一日，其實都係上天賜俾我，我點樣去報答呢一種恩惠呢？就係勤力啲！」
勞力、努力不是AI，不能輸入數據便唾手可得，要像陳美齡般，維持現狀地活得豐盛，才能真正的笑看人生。
三個男朋友
陳美齡的三名兒子和平、昇平和協平，於史丹福大學畢業後，現都居於美國，已成家的和平是IT公司老闆，昇平則是電腦程式工程師，廿六歲的幼子協平，就於食品科技公司工作，每周也會跟她通電話。說起兒子們，她的笑意更盛。
「我好佩服我啲仔！我會諗，點解佢哋會諗到啲咁嘅嘢呢？好似我細仔，佢喺一間Plant-based食品公司返工，返咗一、兩個月之後，就諗咗用桃同埋草莓嘅Molecules（分子），做一種新嘅雞味（滿足地笑），係咪好神奇呀？佢𠵱家拎咗專利權，仲做多咗四、五種唔同嘅味道。」
她笑言，三名兒子各有所長，但對媽媽也十分上心。「佢哋好Romantic㗎，大仔一賺到錢，就請我去歐洲Road trip，叫我飛去Amsterdam（阿姆斯特丹），佢租咗架開篷Benz跑車，揸去機場接我，我老公都未做過啲咁嘅事！哈哈！
「二仔就帶我去Croatia（克羅地亞），食完飯就話同我行沙灘、傾吓偈，幾Romantic！三仔就同我去咗Prague（布拉格）、Budapest（布達佩斯），佢話要搭巴士、搭電車、去博物館，先體驗到當地嘅文化生活。」
愛的Harmony
人生是一門高深哲學，育兒只是其中一項課題。
陳美齡笑言，要三個兒子入讀史丹福，起步點十分簡單，「係無條件嘅愛，要俾佢哋知道，無論佢哋讀書成績係點，無論佢哋乖定頑皮，媽咪都會永遠愛佢哋、永遠支持佢哋。千祈唔好比較！咁慢慢佢哋就會建立到自信心。」
對於半歲的孫女，「Agnes式愛的教育」也沒有改變。「入唔入到史丹福，我冇乜所謂，當然呢間係好嘅大學，入到梗係開心。不過，做一個快樂、堅強、善良嘅人，更加重要。」
以無條件的愛為大前提，優雅而富少女味的嫲嫲，還是有一個實際的願望，「可以買靚衫俾佢，等佢大個，又可以同佢行街睇戲，幾好呀咁！」
Kawaii呢！
【東周刊】更多精彩 敬請瀏覽
《東周網》：https://eastweek.stheadline.com/
《東周刊》FB：https://www.facebook.com/eastweek.com.hk/
《東周刊》IG：https://www.instagram.com/eastweekhk/
《東周刊》微信公眾號：eastweekhk
