發佈時間：19:41 2025-11-11
拖篋搭扶手電梯真的太危險！有網民日前在社交平台Threads上載兩張相片，並發帖指在港鐵屯馬綫一車站的扶手電梯上，疑因有兩人拖了三個大行李篋，結果其中一個篋滾下來，「前面幾個老人家骨牌咁冧」。事件引發網民關注，紛紛指責拖篋的人罔顧他人安全，直斥「靠害」，不少人更分享自己的驚險遭遇。
樓主：前面幾個老人家骨牌咁冧
樓主於本月7日發帖時仍心有餘悸﹕「黐線差啲夾死，咁大個gip（喼）上扶手電梯，一上扶手電梯就有人叫救命，前面幾個老人家骨牌咁冧，好彩有人即刻啪停條梯，有人抽返我出嚟。」據樓主指，「職員嚟到啲人就散晒，目擊者話係兩個人拎3個gip失手跌gip」。隨後再補充稱，「兩個人拎3個gip，另外兩個gip都只係細少少」。
樓主分享的兩張照片中，其中一張顯示扶手電梯上站滿了乘客，個個面色緊張，還有人也拖着喼。另一張相則拍到了疑似涉事的行李篋，而旁邊是往屯馬綫屯門方向的月台。
網民鬧爆：靠害
事件引發網民熱議，有人估計現場是鑽石山站。不少人則討論着搭扶手電梯的安全問題，紛紛指「仲要咁大個喼，得兩個人拎好心就搭𨋢啦，靠害」、「唔好話跌喼，前面啲人行得慢，或者塞咗喺度唔行都已經好危險」、「好心搭𨋢喇，平時兩手fing fing（揈揈）就走去搭𨋢，攞咁多嘢就搭扶手電梯，係咪傻㗎」。
有人則認為「喼都好啲，BB車。入面有個真人嘅BB車，跌嗰陣時，大人顧得自己，定車仔，定車入面個BB呢……，非常、超級、極之、自私又無公德心」。另有網民表示，「通常我見到咁大個喼上扶手電梯我一定唔會搭住」。
網民分享親身經歷
其他網民則分享了類似的驚嚇遭遇：「一模一樣的情況我在尖沙嘴地鐵看到過！！好危險！」「我之前喺鑽石山站都見過一次，不過還好人唔多，又係幾個遊客嘅大gip跌落去撞到人⋯⋯」「之前喺啟德上SOGO嗰條電梯已經係啦，後面有人推住架BB車，可能夾到條罅，個電梯自動停咗，嚇鬼死，好在我哋已經上到頂冇跌親 ，好心搭𨋢。」
有網民更憶述事發時自己正懷有身孕﹕「放產假前返工喺香港站搭扶手梯上行。已經等啲阿毛阿伯gip神上先。點知前面阿嬸拉住個買餸車未扶穩就喺度摷孭袋，順勢架車仔（喺扶手梯咗邊）向後look（碌）。我即刻貼到最右邊。但阿嬸想捉住車仔自己又失平衡，成個人瞓落嚟我度。我一手護住個肚一手推佢上去，好彩自己夠大力冇俾佢責親。嚇到我個心離一離。自此到臨生前我去邊都係搭升降機上落了。」
資料來源：q0w0p.ha＠Threads
