發佈時間：19:08 2025-11-03
萬聖節參加派對尋開心，結果竟變受難！有女網民日前在社交平台Threads發長文大控訴，指付款550元參加萬聖節派對結果中伏。她力數七大「災區」，不僅沒有人控場，全程零氣氛，且60多名參加者只獲安排3盤食物共享，現場雜物更多到「以為自己去咗垃圾崗」。最後她向主辦方投訴並要求退款，卻反遭到人身攻擊，讓她氣憤不已。
據事主指，她於上周五（10月31日）萬聖節當晚，與友人同到尖沙咀山林道一餐廳，參加「沉浸式恐怖廚房Halloween Party」。兩人共支付1,100元，人均$550，較單人報名費580元略為便宜。宣傳指活動包括「恐怖懸疑廚房打卡位起，靚女學廚＋猛男主廚NPC，酒水任飲，小食到會，Catwalk show，Game，DJ，Lucky Draw，Clubbing」。
力數現場現7大災區
女事主表示，「見佢個介紹都講得好似幾吸引咁，個地方又好似唔差，諗住唔會伏啦。」結果當晚二人於7時多到場準備化妝，卻見化妝師竟仍未開始工作，「連啲搞手、MC、NPC自己都未化妝」。按活動流程，化妝時間應為下午6時至晚上8時，最終「啲人等化妝等到八點幾、九點先化到」。她指這是遇到的第一個「災區」，「搞到啲時間嚴重delay，同你哋所謂嘅rundown有冇match過？」
最離譜災區：60人share三盤嘢食
第二個「災區」是活動內容大縮水，原定三場抽獎「縮到得一個」。第三個「災區」則是餐飲﹕「60幾個人，佢哋準備咗咩？一盤三文治、一盤魚蛋、一盤薯條。」三盤食物「好快俾人搶晒」，她質疑「你覺得60人share三盤嘢食合理？你收緊我哋五百幾蚊，你畀呢啲質素我哋？」她更以其他五百多元活動作對比，「人哋係講緊去酒店餐廳食自助餐，搞生日party，人哋包起晒成間餐廳，都抵過你哋依家做得咁肉酸。」
此外，活動雖聲稱酒水任飲，但現場「大部分都收費」，「仲要擺個PayMe code出嚟，我畀完$550，仲要再另外加錢飲你啲酒」？
第四個「災區」是「成個party連音樂都冇」，主辦方「淨係搵個後生仔彈結他唱慘情歌抒情歌，唱足一個鐘！完全無萬聖節氣氛可言」。
第五個「災區」便是活動主打的「沉浸式恐怖廚房」體驗。據女事主指，她們「辛辛苦苦逼入個廚房，睇佢哋班NPC做戲，地方細，又多人到乜都睇唔到就走出嚟」，質疑主辦方「收咗咁多人錢但冇控制人流」。
而MC搞手的「零分」控場能力就成為了第六個「災區」，她怒斥﹕「啲MC搞手完全唔識hold場，成日靜晒冇人控場，尷尬到一個點，成晚都唔知發生咩事。」
最後第七個「災區」是場地雜物多到「似垃圾崗」，「啲袋求其擺埋一邊，又唔安全又唔organize」，她曬出和朋友影的相片，背景均有雜物，「啲雜物多到我真係以為自己去咗垃圾崗」。
要求退款 搞手：你就當呢$550係請人食飯啦
女事主表示，她之後向主辦方投訴並要求退款，獲一名搞手電話回覆，對方聲稱自己只是幫手，「中間好多流程都唔清楚，冇見到，經常行開咗」，又聲稱「活動完結後feedback係一面倒好評」。女事主遂又再以千字文向主辦方投訴，獲書面回覆指「可能臨時都會有好多不足嘅地方」，並向事主表示「唔好意思」，「未來會參考多啲意見做得更好」。
事主：我萬聖節係去enjoy，唔係做善事！
惟對方再度迴避退款問題，女事主只好再作申訴，搞手再度致電給她指「今次活動賺唔到錢」，又稱「錢就一定退唔到㗎啦，你就當呢$550係請人食飯啦」。事主怒斥：「三唔識七我做咩要請你食飯？……我萬聖節係去enjoy，唔係做善事！」她又要求對方出示單據。
搞手卻反而質疑她「之前有冇搞過活動呀」、「可能你覺得自己好高質」，女事主認為主辦方「疑似想用經驗值嚟躂我」，「無啦啦屈我自視過高，睇唔起佢哋活動」，該搞手最後仍堅決地表示「絕對唔會退到錢」。
網民籲向海關消委會舉報：好搵過KK園
事件引發熱烈迴響，有網民以活動主題揶揄主辦方，指「得3盆要搶，個廚房夠晒恐怖」、「冇講錯啊：『沉浸式恐怖經驗』」。有人則批評搞手叫事主「當請人食飯」，「都幾搞笑喎，而家係買服務喎，咩叫做當俾錢請你食飯呀」。
不少網民認為主辦方「食水深」，「好搵過KK園，下次改名再搵過第二班水魚」，「呃一次就夠食走人」，並質疑主辦方違反商品說明條例，建議事主向海關及消委會舉報。
來源：iris.c_official＠Threads
