發佈時間：19:07 2025-07-28
港鐵嚴禁乘客攜帶金屬氣球進入車站或車廂，並不時有作出相關廣播。惟有母親卻被目睹手持十多個金屬氣球硬闖銅鑼灣站，被職員攔截時還疑似當著年幼子女面發爛渣。有目擊者昨日（27日）在社交平台Threads上載相片發帖分享事件，大批圍觀網民指責該名母親，紛紛罵道﹕「常識呢！？」「無知已經衰，仲要人品差」。
樓主：有工人跟住
樓主發帖指﹕「港媽大鬧地鐵站，帶10幾個金屬氣球入站，俾人周到發爛渣，仲要喺自己啲仔女面前做壞榜樣，真心係咪第一次搭地鐵未聽過咩叫『請勿攜帶金屬氣球進入車廂』」。從樓主分享的照片中可見，女事主攜帶不同造型的金屬氣球，包括禮物、插有蠟燭的蛋糕，還有幾顆大星星。氣球被抱起時，幾乎觸及大堂天花板。
樓主隨後還在回應欄裡補充，指該名母親操「純正廣東話加有工人陪」。當即有網民留言表示﹕「如果無認錯人，我識呢個女人係做marketing mgr（市場經理）㗎喎，記得佢有車應該唔使坐地鐵㗎喎……」
網民疑似目擊事件前傳
另有網民則詢問現場「係咪銅鑼灣」？接著自爆自己疑似目擊了事件的部分情節，指當日「推輪椅等升降機，部𨋢俾好多氫氣球霸佔住，等咗3轉先有吉位入𨋢」。
事件引發網民熱議，直指該名母親的做法「好危險」、「常識呢！？」、「坐的士喇」、「Call Van（叫客貨車）啦」、「無知已經衰，仲要人品差」、「佢新嚟㗎？地鐵不嬲唔俾帶金屬氣球㗎」。還有人估計「呢啲係咪參加完Party（派對）攞人啲波走嗰啲媽咪呢」，有人則好奇「想知之後點」。
港鐵：金屬氣球可能引致跳掣影響行車
攜帶金屬氣球乘搭港鐵屬危險行為，2016年7月29日，便因金屬氣球殘留物導致「跳掣」，令港鐵東鐵線受阻3分鐘。
《港鐵附例》訂明，「任何人不得致使、准許或容受任何風箏、氣球、模型或其他物件飛進、飛過或越進、越過鐵路處所的任何部分，包括任何鐵路隧道，或飛入、飛行於或越入、越於鐵路處所上空的空間或架空線以致會危及鐵路的正常運作」。
港鐵車站不時發出廣播，提醒乘客「嚴禁攜帶金屬氣球進入車站或車廂」。港鐵亦在《日日安全搭港鐵》小冊子中提到，切勿攜帶金屬氣球進入港鐵範圍，並曾在facebook專頁上載「接觸到鐵路綫嘅高壓電纜而焦黑咗嘅金屬氣球」的相片發帖，「提醒大家切勿攜帶金屬氣球入車站，因為佢哋可能引致跳掣，影響行車」。
此外，機電工程署網頁也有列明，乘搭港鐵時切勿攜帶金屬氣球進入港鐵範圍。
資料來源：wing_ching234＠Threads
