發佈時間：19:27 2025-04-24
處理飲食，一定要注意衛生！近日有網民以「喺小紅書見到。只知道柴灣老人院」為題，將一段16秒短片轉載至社交平台。片中清晰拍到一名疑似正在舀湯的穿制服女子，在沒有載上手套及使用湯勺的情況下，直接用碗來舀，引發網民熱議，有人直斥﹕「你同洗碗有咩分別呀？」
該名匿名的樓主將短片轉載至facebook群組「香港老人院黑店大全及黑幕踢爆關注組」。片中可見，穿紅色制服的女員工疑似正在舀湯，但無使用湯勺，而是拿著碗直接舀。旁邊一輛手推車上，放有12個白色碗，短片開始時大部分碗已盛滿湯，員工正為餘下的兩個碗舀湯，接著把另外兩碗半滿的添滿，完事後把手推車推走。
由於該短片已在小紅書內刪除，相關拍攝背景及時間等難以稽考，網民便根據短片內容作出評論。有人直接反問﹕「無湯勺？」有人則認為「用湯勺仲快捷，睇唔到有乜好處」。有網民更批評女員工的做法﹕「洗碗咋嘛」、「洗碗水」、「你同洗碗有咩分別呀？」、「嘩……咁都得，啲老人家咪喺到飲洗碗水，老人院無湯勺㗎？」
有眼尖的網民指出，「如果係湯，冇乜料，糖水又唔似」，片中員工亦「唔戴手套」，但有人無奈稱﹕「戴同唔戴都無分別，佢做得出咁樣，我估佢都一對手套走天涯。」
網民無奈：眼唔見就係乾淨
但也有網民奇怪「點解會俾人影片」，而且「角度還那麼清楚清𥇦」，有其他人就回應﹕「即係佢覺得冇乜問題先至會俾人任影？」「其實會唔會以為自己好專業，專登影片俾人睇。」有人估計「多數是自己同事拍攝，如院友家人見到即鬧了」！
另有網民分析指，「睇佢衣著，我估似係外聘職員。唔知我有無睇錯，好似把腰封圍在制服外，仲要掛腰包。正常機構對自己職員穿著制服是有要求的」，又認為「咁嘅手勢舀湯，唔似接受過任何本地訓練，似佢在屋企做開佢平時嘅手勢」。
還有網民無奈地表示「我想講，就算係酒店，呢個情況一樣會發生」、「好多都係咁樣啦，甚至仲衰啲都大把」、「講得好，眼唔見就係乾淨」。
