發佈時間：17:00 2025-08-04
現年41歲的譚輝智，2023年參加歌唱節目《中年好聲音2》，成為其中一位五燈歌手，繼而奪得亞軍，順理成章加入娛樂圈。
譚輝智透露，其實在比賽之前，有幾次都萌生退意。「初賽臨比賽前1小時，我仲喺張床度，唔想去比賽，你係咪覺得如果輸咗會好樣衰。」他的太太在床邊鼓勵他，令他扚起心肝出發。
殺入初賽，然後再過關斬將，他依然膽怯。去到比賽的錄影廠，望見PA的時候，他依然腳震震，心想「我一陣間要跳舞喎，實俾人笑一世啦！」譚輝智說，幸好他是排第一個出場，「如果我係之後幾個出場，見到人哋又唱又跳，我一定會靜雞雞走咗去。」
40歲前做一件從未做過的事
這次參加歌唱比賽，譚輝智越戰越勇，也告訴自己，很想在40歲前做一件從未做過的事，亦想將這個經驗送給兩個小孩，讓他們知道爸爸都突破過自己。
有理由相信，譚輝智的唱功，其實遺傳自爸爸譚握籌，因為譚握籌過去曾多次登台演唱，更與「十一哥」何國材在音樂會上表演，「爸爸成日話，以前佢為了養家謀生，選擇咗入商界，耽誤咗佢嘅唱歌才華。」為了支持兒子參加《中年好聲音2》，譚握籌多次現身節目打氣。
譚輝智歌藝精湛，外表亦一臉懵懂，深受師奶輩的粉絲歡迎，其中狄波拉向來是譚輝智的頭號鐵粉，甚至成為他的歌迷會永遠榮譽會長。「拉姑點解會咁鍾意我？可能我個人夠戇直，冇乜商業味。我都成日去佢屋企食飯，亦都喺演唱會唱歌霆鋒嘅歌。」
去年9月譚輝智生日，拉姑出席他的生日會，陪他一起切蛋糕，更淚如雨下剖白：「好多朋友笑我，話我癲咗，我就帶埋朋友過來見譚輝智，點解呢個人令我咁樣！生日快樂，希望大家睇住佢進步！」
去年底譚輝智在《歡樂滿東華》做表演嘉賓，與黃劍文和劉威煌合唱一曲《朋友》，拉姑豪氣為該演出捐出100萬元善款。
譚輝智坦言，自己有交際恐懼，「以前廿幾歲成日出街，晚晚劈酒，甚至可以叫做酗酒。不過生咗小朋友之後，我戒晒所有夜蒲，基本上係冇娛樂。」
「比賽前嘅我，唔鍾意應酬交際，可以叫社恐。比賽完之後，接觸不同的人，個感覺好似回春，個人冇咁悶。」
加入《愛‧回家》 飾演「何守烏」
唱而優則演，譚輝智加入《愛‧回家之開心速遞》，飾演熊家鄰居「何守烏」，與熊樹根（劉丹飾）爭奪大廈立案法團主席之位。
「今次合作嘅卡士，全部都係我由細睇到大，好似丹爺（劉丹）、豹哥（單立文）。拍劇比我預期難，好難適應。以為講幾秒對白好簡單，原來要好有功架。一埋到去就知道距離差咁遠，我初初以為易過食生菜，高估咗自己，輕視咗拍劇呢樣嘢。當我一講完對白，就唔識得再俾反應，就咁眈天望地。
「有時句對白其實唔係好長，我講得到，點知個樣同表情又唔掂，到個樣OK，又唔記得對白。」
不過譚輝智已經培養了對演戲的興趣，「我唔叻，不過會期待，幾enjoy啊！」
正如他最近推出的新歌《熱身要在冧低前》，歌詞勵志，正是他的心聲，「人人生活都好大壓力，我希望大家都可以樂觀面對問題，有正面態度。」
曾幾何時，譚輝智的人生亦都出現一個大波折，令他心生恐懼，甚至悲從中來。「我個大女出世差唔多兩個月，出現咗毛病，去睇醫生，點知個醫生話可能係生cancer，嚇到我兩公婆手忙腳亂。」
後來看多幾個醫生，證實不是患癌，原來是小腸氣，不過情況都幾嚴重，有一天看完另外一個醫生後，需要緊急開刀做手術。
「因為要全身麻醉， BB咁細個唔知能唔能夠承受到，所以當推佢入手術室時，我同老婆都喊咗出嚟。平時我會經常拎電話，嗰次手術大約個多小時，我完全冇睇過電話，只係望住手術室盞燈，期望個女吉人天相。」
風波過後，是陽光明媚的日子，如今譚輝智一家四口，樂也融融，今年更是慶祝結婚七周年。「點解老婆會鍾意我？我覺得佢係貪我個樣囉。」說時忍得到笑，果然經過《愛回家》訓練係唔同啲，高手！
延伸內容 : 許志安鐵粉譚輝智神秘現身《今晚有歌廳》與偶像合唱 張衛健喪窒蘇永康勁爆笑
延伸內容 : 狄波拉 扮靚撐偶像譚輝智
