發佈時間：20:28 2025-02-25
43歲前港姐亞軍朱慧敏，2021年與心臟專科醫生陳良貴結婚後便火速造人。2023年10月先誕下大女「小樹娃」Shera，沒想到今日連細仔都出世了，三年抱兩湊成一個「好」字。她慶幸有了第一胎的經驗，今次佗第二胎輕鬆得多，整體身體狀況很好。
提到她與丈夫當初為人父母感覺如何，她表明兩人需要很大的磨合，更需要「企業化管理」令家庭和諧，令小朋友能健康快樂成長。訪問當日，正值是二人結婚周年紀念，朱慧敏致電老公了解下有甚麼慶祝活動時，陳醫生卻因工作忙碌，只買了她喜愛吃的蘋果批做結婚禮物。
看似普通，但朱慧敏也滿足，她坦言生活就是如此簡單，而且老公收工後幾攰都好，回家總會唧埋剩餘的少少電幫忙照顧女兒，所以她向老公發表愛的宣言更邊講邊喊說：「我會好好照顧自己、好好照顧屋企、好好照顧啲小朋友，等你可以安心咁去做你鍾意做嘅嘢（為人請命嘅醫生）。」陳醫生亦甜絲絲回答：「你都好辛苦，幫我睇住頭家。」是蘋果批給的甜蜜力量嗎？
佗第二胎較輕鬆
朱慧敏表示女兒出世後，仍堅持不請女傭，餵奶煮飯一腳踢，她說：「嚟到佗第二胎，都幾輕鬆，因為第一胎做咗好多資料搜集，例如去邊度買嘢，而今次最大挑戰係，我都郁動大，5日都要帶囡囡去Playgroup，但好在囡囡好合作，肚裏嘅BB都好乖。」加上佗B整個過程尚算順利，冇孕吐、冇腰痛和腳腫，整體身體狀況都好好。
為了迎接BB來臨，她還會教導女兒「小樹娃」：「我肚裏有個Baby，我做產檢時又會帶埋佢去，佢會聽到BB嘅心跳聲，佢覺得好得意，仲叫BB做『耶耶』，然後俯喺我肚上面笑得好開心。」
仍想生夠4個小朋友
曾揚言想生夠4個的朱慧敏，第二胎當然是計劃懷孕的，她直言：「我嘅心願仍然係生3至4個，但今年已經44歳，生唔生倒要睇上天安排，因為我真係好鍾意小朋友，未結婚已計劃一係生一係唔生，要生就要生夠4個，（唔生會領養或助養嗎？）會，其實𠵱家一路都有助養，當時諗或者做寄住家庭。」
朱慧敏的兒子今日出世，問她是順產還是搵高人擇日剖腹時？她訪問當日清楚表示：「娃娃係自己揀時間出世，所以呢個BB我都想佢自己揀，因為咁多高人都唔知邊個係特別高，係咪先？所以最好都係交畀上天同BB自己揀。」至於BB名字就由她操刀，她笑言：「其實4個BB嘅中文名我一早已經改晒，因為啲名係有啲聯繫，好似對聯咁，但先賣個關子，BB嘅名遲啲先話畀大家知。」
育兒心得是BB喊就抱
問她有甚麼育兒心得時，例如BB哭時，有父母免寵壞小孩而拒絕抱抱，但朱慧敏笑言：「我係極抱佢，因為每個人嘅想法唔一樣，我覺得佢只係一、兩歲嘅小朋友，只係需要愛。其實我讀過催眠治療，亦都睇過一啲心理學嘅書籍，3歲以下嘅小朋友，因為佢未有足夠嘅詞彙去表達自己，所以佢喊係代表有需要，可能係賴咗尿、肚餓，或者眼瞓，所以我嘅信念係，呢啲時候要畀多啲愛心同關懷佢，我會一直抱住佢、呵護佢，同佢講媽媽喺度。」
初為人父母兩公婆要磨合
兩公婆由二人世界變了三人世界，現時更變成四人世界，朱慧敏表示與老公最初相處有很大變化。她稱：「有段時間我哋需要磨合，因為佢係一個好喜歡創意嘅人，其實我都係，但照顧BB唔能夠樣樣都咁創新，好似食完奶掃風咁，有啲BB食完1安要掃，有啲可能食完3安先掃，我個BB係要掃得密啲，但陳醫生冇跟我個做法，但我又唔可以話呢樣唔得嗰樣唔得，佢會覺得冇癮。」
收蘋果批做結婚周年禮物
訪問最後環節是朱慧敏致電給她生命中最重要的人——老公陳良貴醫生，原來訪問當日是二人的結婚周年紀念。電話接通後，一開始朱慧敏稱管理處向她表示有花收，原以為是老公給的驚喜，卻是她自己訂的桔、杜鵑和牡丹，而陳醫生在電話稱因工作太忙冇時間買禮物，到睇完病人的症想去買，又唔知買咩好，結果買了朱慧敏喜歡吃的食物。朱慧敏最初估是朱古力、西瓜和薯片，竟然全部都錯，原來是蘋果批，陳醫生更表示買了兩個，一人一個，朱慧敏坦言：「我哋嘅生活好簡單。」
感動老公唧埋少少電陪女兒
蘋果批看似平凡、普通，朱敏慧卻滿足，並表達愛的宣言說：「我覺得感動，係因為你嘅工作真係好長時間，我知道你做嘢好辛苦。好似見你做完手術，尤其係冬天，有兩、三個月你隻手經常爆拆，我睇到好心痛，我可以做嘅係提你搽Lotion或者幫你搽Lotion。」跟住朱慧敏已忍不住哭着說：「我可以做係好好照顧自己、好好照顧屋企、好好照顧啲小朋友，等你可以安心咁去做你鍾意做嘅嘢。」
她續稱：「我知道你嘅工作係你嘅生命，而且真係可以有好多人受惠，有時我知道你好攰，就算你返到屋企後冇電都好，你都會唧埋少少電照顧娃娃，所以好多謝你！」
感謝太太睇住頭家
陳醫生也甜絲絲的回答：「你都好辛苦，幫我睇住頭家。」並承諾會分配好時間，多陪伴太太朱慧敏、女兒娃娃和出世的BB。而陳醫生的愛的宣言是：「就係好似蘋果批咁甜、咁好食，食咗大家會開開心心、甜甜蜜蜜！」
朱慧敏表示其實二人的相處，不像年青時拍拖般，吃燭光晚餐或說些甜言蜜語，反而是怎樣令兩個個體可以互相配合、互相成長，從而令家庭運作得和諧，小朋友可以健康快樂成長，這都是他們的共同目標。是將戀情企業化管理嗎？朱慧敏同意，更表示好Work，真的能感受朱慧敏是蘋果、陳醫生是批的二合一甜蜜力量。
延伸內容：朱慧敏報喜誕子湊成「好」字 巧遇老公陳良貴生日齊慶生
延伸內容：朱慧敏聲音導航Body Talk快速入睡充電法！肥胎不肥人靠食素！飲桑寄生茶令BB皮膚靚靚！
《東周網》訪談系列節目《星桄伴我心》2月重磅嘉賓：
即睇：七仙羽被鬧神棍 爆喊剖白被欺凌 : 個個都笑我騎呢！
即睇：林盛斌Bob曾當選「我最討厭藝人」冠軍，被踩是垃圾 正能量反省：我做錯咗咩嘢？
即睇：李珊珊罕談舊愛錢嘉樂 剖白患驚恐症瀕死感覺 : 我會活好呢一生!
