發佈時間：09:00 2025-02-09
即使戲如人生，但做人從來沒劇本，歲月的流逝，成為各人人生的劇情。相伴30載的姜皓文與殷寧，結婚超過1/4世紀，早已是對方生命中的「最佳男（女）主角」。就在去年10月，二人結婚25周年，殷寧撰寫了一個劇本給老公，作為二人的銀婚紀念禮物，於是成就了二人的「愛情結晶」——電影《哈哈哈新年喜戲》。
55歲的殷寧笑言：「哈哈哈哈！用一個劇本嚟做結婚紀念禮物，因為我呃咗佢一層樓！唔係18周年嗰層，係買咗層新嘅！咁我就要送番啲嘢俾佢，送咩好？就送一個特別嘅角色俾佢就最好啦！」
坐在愛妻身旁、58歲的姜皓文，坦言電影是夫妻二人的突破。「我好少同太太一齊去做一件事，又唔會錫佢⋯⋯」姜太即接上表示：「我平時唔會『侵』佢玩㗎，我會同我姐姐（家傭）玩，譬如我哋突然會換新傢俬！不過，有時佢（姜皓文）又突然間打電話返嚟，話會提早返屋企⋯⋯「因為佢容易焦慮，我唔想佢擔心，就會做好晒所有嘢先。但今次，係除咗結婚擺酒嗰次之外，第一次真正要同佢合作，仲要日以繼夜對住佢幾個月！」
口裏說不，身體卻很誠實，姜皓文凝視太太，衷心地說：「你辛苦嘞！我收到嘅！」殷寧即與丈夫深情對望，沒有劇本，發放無限閃光，一切盡在不言中。
再結婚
以劇本作結婚周年禮物，殷寧也花過心思做資料搜集，畢竟是自己最了解的另一半，要我手寫我心思，不難。「咁啱嗰段時間，佢喺度拍電影，冇理我，咁我就有自己嘅空間，可以日以繼夜係咁寫。其實之前我睇咗好多部電影，覺得好似一人分飾兩個角色會比較特別，可以有無限發揮。不過，今次因為係賀歲片，會有啲掣肘，唔可以見血、唔可以殘忍，而佢嘅演繹都達到我嘅標準，我係收貨嘅！」
是禮物不是驚喜，姜皓文這位收禮者，對太太的禮物也有一定要求。「今次呢個角色，其實係我小朋友時期嘅陰謀論，因為我細個都係喺兒童院長大，冇一個家，於是就成日諗，邊度先係我嘅家？同家人嘅關係又好疏離。所以，我以前喺宿舍裏面嘅陰謀論就係，兒童院嘅社監，會唔會利用小朋友去做一啲奇怪嘅嘢？我就同佢（殷寧）講，然後加喺我哋部戲入面，我演嘅兩個角色就係，喺孤兒院長大嘅兩個人，對之後嘅人生有啲咩唔同嘅睇法。」
機緣之下，二人得到把禮物影像化的機會，惟殷寧也要細心觀察枕邊人微小的情緒變化。「佢由細到大都有焦慮症，每日都同我講好多次辛苦嘞。今次拍呢套戲，佢太關心我，當見到我好忙，要覆好多電話，Group（聊天群組）又多嘢要解決，佢唔知道點幫我；我又驚激發咗佢嘅焦慮症。」
姜皓文則稱：「有時呢啲嘢，會逼到我發揮到潛能。所以後來除咗劇本，我哋決定參與埋歌曲製作。有做開音樂嘅朋友提議不如自己寫，當我聽到插曲〈哪裏才是我的家〉嘅頭幾個音，就已經感動到不得了，每次我用耳機聽，手放喺呢度（大腿上），我老婆就會塞張紙巾俾我，好好笑。」殷寧會心一笑，「今次好似再結婚、再擺酒咁，喺安排上、邀請賓客⋯⋯都好似搞婚禮咁，搞一個Party！」
儀式感
舉行派對，對姜氏夫婦來說，其實並不陌生。殷寧表示：「每年我哋生日、結婚周年，佢都好緊張，送咩蛋糕、咩禮物、咩花，都好上心，好想令我特別難忘；或者有啲驚喜嘢俾我，佢真係有花過心思嘅。」姜皓文再解說：「我老婆生日係10月24號，結婚周年係25號，我嘅生日係26號，一連3日。以前係一次過搞3日Party，𠵱家慢慢縮到一日，唔好搞到太多人，太辛苦嘞！「但係我覺得重要日子，要記得一啲嘢，如果平平淡淡，印象未必深刻，就會嘥咗個特別日子，所以呢啲儀式感，我覺得係要嘅。」
殷寧對老公的心意，了然於心。「呢個係佢對家嘅感覺，佢對家需要一種安全感，咁先有家嘅記憶。」當特別日子遇上特別忙碌的日程，姜皓文就有點自亂陣腳。「上年生日，我喺馬來西亞做緊嘢，所以我同朋友講，買蛋糕同花，搞到啲花同蛋糕送到嚟都好亂，其實我都唔肯定係咪我送嘅。」
殷寧再「自補一刀」：「搞笑嘅係，當時我哋喺馬來西亞住緊酒店，因為結婚周年，酒店想幫我哋搞Surprise party，於是幫我哋間房布置。本來我想俾個Surprise老公，但啲酒店職員布置嘅時候，就撞到佢，即刻冇晒Surprise啦！」
雖然驚喜不成，但殷寧更樂於平淡。「𠵱家慶祝，想食吓嘢就算，生日我都想同朋友食吓素，俾大家有一日可以享受素食。以前幾十人嘅Party，𠵱家縮減到得幾個人，舒服啲。」
傻更更
適當的儀式感，屬平淡生活的點綴，二人的婚姻維持超過25載，由昔日的吵吵鬧鬧，到今日的一唱一和，除了愛，還有⋯⋯殷寧笑言：「就係每日傻更更咁（一指姜皓文），你睇佢幾傻。好彩係我都傻，如果我唔傻就死嘞！哎呀！新年唔可以死死聲！哈哈！」姜皓文點頭稱是：「有時，真係好Enjoy睇佢，佢可以好樂觀去睇每件事，我喺佢身上學咗好多嘢，因為我就比較緊張。」
殷寧拍一拍老公，「焦慮症！佢有家族遺傳，佢個妹話，佢成家人都係咁，件事都未發生，就已經諗晒最壞嘅打算。」夫妻大多如拼圖，各自圓滿了對方，姜皓文坦言：「我老婆就唔係，佢每件事都諗到好美滿。我話：『老婆，如果真係唔得咁點算？』，佢都係答我：『唔得先再算！』，所以我喺佢身邊都好開心。」殷寧無縫接着說：「我鞭策住佢，俾佢知道要發生嘅，都係會發生，改變唔到嘅嘢，我哋惟有放鬆啲，點諗都冇用。瞓覺！」
常言道怕老婆會發達，聽老婆話的姜皓文，這些年也先後在香港與馬來西亞置業，他稱：「聽佢講就啱㗎嘞，改變唔到嘅嘢，除咗瞓覺仲可以做咩？聽日都係要繼續行落去。」展望每一個明天，姜氏夫婦也有一些計劃，就今年而言，殷寧搶着說：「梗係票房大賣！」姜皓文即回應：「唔係旅行咩？」殷寧補飛：「旅行我Skip咗。哈哈！可以嘅，要睇吓時間，去南非都唔錯吖！睇吓動物⋯⋯佢鍾意睇動物。咁我哋可以同動物食早餐！同埋我哋好耐冇去旅行，今年真係要去嘞！」
他生再擁抱？
金曲有得唱，「願意今生約定他生再擁抱」，看姜皓文與殷寧一唱一和，自然地問二人一句：如果有來世⋯⋯提問未完，殷寧已急不及待打斷問題：「唔想！唔想見到佢嘞！哈哈哈哈哈！」一旁的姜皓文只是陪笑，姜太續說：「要對吓啲新嘅嘢㗎嘛！對咗佢幾十年喎，再數落去又幾十年喎，（直視姜皓文）咁我係咪要對吓啲新嘢呀？」
姜先生一個轉頭，已笑着流淚。「唔想⋯⋯唔想呀？呢個答法都幾新，我真係笑到眼淚水都標出嚟。」殷寧輕拍口是心非的老公。「放心啦！我哋一家人嚟嘅！」拭着傷心的眼淚，姜皓文表白：「但係我下世都想對番佢㗎。」殷寧笑𠱁老公：「我成日都𠵱𠵱哦哦㗎喎！」姜皓文即時滿血復活：「我識得點嚟點隔（作耍拳狀）吖嘛。」
輕耍花槍後，他重返認真Mode，一指太太表示：「佢唔喺度，我已經冇晒方向，好似失去平衡，冇咗個舵咁。」同為性情中人的姜太，意圖專移視線：「佢好好笑㗎，有次佢喺大陸拍戲，到埗落機打開行李，因為好凍，佢要攞Cream搽，其實全部嘢我Pack起晒俾佢，等佢要用嘅時候易啲拎。」說着說着，卻流下感動的眼淚。
未察覺的姜皓文續說，「原來佢用咗兩個一樣嘅盒，一個裝護髮素，一個裝Cream，兩個都係黑色蓋白色樽嘅。」殷寧笑老公：「到佢打電話俾我，我先知佢將護髮素當Cream搽。哈哈！」無論今生還是來世，即使生活淡淡似是湖水，只要找對隊友，也可如姜生姜太般，小事也可充滿生氣。
延伸內容：姜皓文蘑菇頭造型超爆 宣萱收緊「珠」腰 陳靜專人服侍 化身印度西施開派對
延伸內容：黑哥姜皓文、宣萱主演《哈哈哈新年喜戲》(Ha Ha Ha Happy New Year)預告片提前睇｜新片介紹
延伸內容：姜皓文黑哥首開金口唱主題曲 急call財神現身MV贈慶
延伸內容：宣萱首次拍賀歲片 多謝姜皓文帶領飲飲食食
