發佈時間：12:00 2026-09-13
幸福家庭，很多時候都是一對夫婦，大手牽小手，拖着子女去街街。這個溫馨畫面，有「珠寶界女神」之稱的珠寶設計師莊莎娜（Sarah），有機會經歷了。
去年6月結婚的Sarah，收到上天送來的禮物，現時懷孕6個月，B女預計12月初出世。
「老公Jason好遷就、好照顧我，平時佢唔煮飯，但陀B頭一個月，佢會早啲起身準備簡單早餐畀我，我覺得幾窩心，不過我唔鍾意食，所以之後叫佢唔使再整。」
愛在細節裏，Sarah完全感受到。
乳名叫「蕾蕾」
這一年多，Sarah由人妻變為準媽媽，看着肚皮一天一天地大，感受特別深。懷孕6個月，她得天獨厚，肥胎唔肥人，手腳纖幼，沒有水腫。而極速為金融才俊老公Jason陀B，開枝散葉，都是上天的安排。
「係好驚喜嘅意外！本身諗住享受二人世界同專心工作先，遲啲再認真計劃生育，點知未開始研究，就突然『中獎』。我同Jason都有啲反應唔切，但非常開心同感恩，成個人心態即刻唔同咗，好多計劃都會考慮BB先。屋企人好開心，特別係我外甥女，一聽到消息就尖叫，好興奮。」
肚入面突然多了個小生命，Sarah坦言多了擔心，懷孕過程有少少驚，好彩Jason十分體貼。
「佢好遷就、好照顧我，花好多時間陪我，仲好樂觀咁開導我。𠵱家陀緊B女，我比較鍾意女，老公就冇所謂。我哋已經諗定想幫BB改個有個『蕾』字嘅中文名，乳名就應該叫『蕾蕾』。」
孕後愛吃橙
第一次懷孕，面對身體上的變化，Sarah直言很容易疲倦，「同埋個肚脹氣比較嚴重，胃口唔係太好，但身體冇乜特別唔舒服反應。懷孕後，口味變咗，𠵱家好鍾意食生果，每日都要食橙、蘋果或者車厘子。」
生冷食物、海鮮，她統統戒掉，每日都會吃孕婦綜合維他命和鈣片，盡量多飲雞湯和排骨湯，希望BB出世肥肥白白。
「胎教方面，我有時會唱歌畀佢聽，同佢講嘢。懷孕19周開始，佢成日踢我，呢排仲越踢越大力，踢得比較密。」
以前，湊仔經離她很遠，她也零興趣，現在就變成「問題大肚婆」，經常捉着身邊的媽咪朋友，包括18年港姐季軍丁子田，請教湊B心得。
「佢哋好熱心，分享咗好多唔同嘅referrals同經驗 ，覺得佢哋好偉大，好叻！我同老公最近睇咗好多關於育嬰嘅IG videos同書，遲啲打算上埋育嬰堂㖭。」
設計馬珠寶
Sarah期待小公主早日來臨，平時行街見到衫仔靚，會忍不住買幾件，又會入手一些設計特別的BB用品，例如奶樽。
「好多朋友想送嘢，或者畀一啲舊衫仔我哋，不過應該多數都會買新，BB房都一路布置緊。我打算順產，餵奶粉，暫時諗住生一個先。」
懷孕中的女性最美，Sarah說，待肚皮再大一點，才決定會否影產前寫真，留下美好回憶。幻想12月「卸完貨」，坐完月，她坦言最期待吃沙律和左口魚壽司、染頭髮和去旅行。
「雖然醫生話可以搭飛機，但暫時唔敢。平日我有做普拉提，匹克球打過一次就停。我希望BB將來搵到自己嘅passion，專注去發展，最緊要係人品好、心地善良，有自己諗法。」
怕在家安胎太悶，Sarah選擇繼續工作，「我設計咗關於BB嘅珠寶畀自己戴，係同馬有關，因為我哋一家三口生肖都係屬馬。」
能成為家人，說到底，都是緣分。
