發佈時間：11:00 2026-09-13
位於深水埗的一間馬來西亞風味麵店，自開業以來憑着無可比擬的正宗大馬風味，迅速躍升為網絡熱討的「排隊名店」。店外不時出現長長的人龍，當中更不乏娛樂圈的熟面孔。
這間爆紅麵店背後的老闆Jimmy，原本是一位在圈中享負盛名的星級蛋糕師，因工作關係與無數明星、名人稔熟。正因為他在圈中的超強人脈，以及對美食的極致追求，這間僅開業一年的麵店，幾乎隔日就有明星幫襯，包括：伍詠薇、廖碧兒、曾比特、王君馨、陳志雲，還有《老夫子》的作者王澤，星光熠熠！
店名來源
經常為天王天后製作慶生蛋糕的「星級蛋糕師」劉志穎（Jimmy ），近年搖身一變成為熱氣騰騰的馬來西亞麵店掌舵人，坦言這完全是機緣巧合：「我去馬來西亞教整蛋糕嘅時候，認識咗一個咖喱麵店老闆，再去當地旅行嘅時候，專程試食過，食完覺得呢個味道應該幾啱香港人嘅口味，所以我就決定帶返嚟香港。」
至於店名「緊張」這兩個字，不少顧客初次聽聞都覺得既特別又新奇。Jimmy娓娓道來：「『緊張』其實係馬來西亞嘅其中一個地區，個地區原本叫『甲洞』，我拍檔個人比較幽默，鍾意將啲字玩少少諧音，變成『緊張』，同埋馬來西亞人好鍾意食辣嘢，好多時佢哋都會將『緊張』代表辣，譬如辣嘅沙甲湯；佢哋會叫『緊張啦啦湯』。所以佢當初就順理成章，將店名取為『緊張咖喱麵』。」
開店消息一出，圈中好友即時紛紛前來探店支持。提到一眾星級好友的飲食喜好，Jimmy如數家珍：「最鍾意嚟我哋呢度食嘢嘅，一定係伍姑娘（伍詠薇）啦！因為佢本身比較鍾意食重口味嘅嘢，同埋佢經常去馬來西亞拍嘢，對當地嘅美食好熟悉。所以佢一知道我哋開咗間麵店，就即刻嚟幫襯！佢仲非常鍾意食我哋嘅『仁當風雲拼』。」
另一位星級食客廖碧兒，也是這店的超級擁𧄌，Jimmy透露：「廖碧兒因為對奶類過敏，所以佢就唔食起司蛋糕，但佢特別鍾意食我哋嘅咖喱湯麵，讚個湯底夠濃郁。」而人氣歌手曾比特的到訪，更在店內引發了一股「粉絲打卡潮」，Jimmy笑言：「曾比特最近都有嚟過，佢嚟完之後，連佢啲爆炸頭粉絲都跟住過嚟點同款嘢！佢個人最鍾意食我哋嘅花膠海鮮麵。」
雖然隔日就有明星、名人幫襯，但Jimmy堅守「人人平等」的原則，就算是巨星光臨亦沒有特別通行證，一樣要乖乖在門外跟普通市民一起排隊。他表示，之前專程前來探店支持的盧巧音與老公蘇浩才（Sammy），由於等候的人數實在太多，最終無奈放棄！Jimmy對此既抱歉又感激，直言希望日後能夠讓每位支持者都能順利品嚐到店中的美食。
正宗味道
這間麵店之所以能在短短一年內，征服一眾挑剔的食客，秘訣全在於對食材近乎偏執的堅持。Jimmy分享說：「我哋個咖喱麵最主要嘅靈魂人物，其實係我拍檔個媽媽。佢喺馬來西亞已經煮咗呢個咖喱汁成40年！當初，我哋嚟到香港，去咗好多材料舖尋找，睇吓可唔可以喺香港本地做番同佢哋本土一模一樣嘅口味，但試過之後發覺，原來有好多年材料喺香港根本買唔到。我哋後來決定不如簡簡單單，直接喺馬來西亞嗰邊進口返嚟！雖然空運嘅費用真係好貴，但惟有咁樣做，先可以還原到同佢哋嗰邊一模一樣、百分之百嘅正宗味道。」
除了靈魂湯底，店內的雞腿與配料同樣大有來頭。Jimmy細心解釋：「我哋個雞腿都係喺馬來西亞嗰邊先煮好，然後再運過嚟香港。咁樣做主要有兩個原因：第一，嗰邊雞嘅肉質同香港好唔同，煮出嚟更具風味；第二，呢啲雞喺嗰邊已經取得咗清真認證，馬來西亞始終係一個穆斯林國家，佢哋對清真認證好睇重。雖然喺香港未必個個講究，但喺文化背景角度睇，我覺得咁樣做會比較完善。」
甚至連麵上面的小配料，Jimmy也絕不馬虎：「我哋碗麵上面有兩塊好似紫菜、日式拉麵裝飾咁樣嘅嘢，叫『朴朴脆』。呢種食材係馬來西亞怡保先有嘅，我哋嘅同事會特登搭車去怡保買，買完再帶番去KL（吉隆坡），然後再坐飛機嚟香港！」這種為了一塊配料不惜跨境奔波的態度，足見其對美食的執着。
