發佈時間：15:59 2026-09-10
演藝圈表面風光，背後苦況真係不足為外人道！現年37歲、憑電影《點五步》一戰成名的男主角林耀聲，日前突然喺社交平台貼出地盤工作照，仲晒出一張手指受傷、血痕累累嘅相片，雖然無寫任何隻字片語，但慘況令人心酸。
轉行做搭棚工人而獲封「職安真漢子」的吳浩康（Deep），隨即轉發帖文隔空打氣：「林耀聲，有一日我會喺大銀幕見返你，一定會，辛苦曬。」間接幫手證實林耀聲已經投身地盤界！其實林耀聲早在上月尾就曾發文自嘲：「地盤真係一個好好減肥同鍛鍊意志嘅好地方」，透露端倪。
出道即做男主角 惜星途坎坷做散工
17歲在球場被導演麥曦茵發掘的林耀聲，當年憑《烈日當空》出道即做男主角，可惜星途坎坷，一度經歷長達8年的空白期。為維持生計又不敢做全職，他多年來做過跟車、侍應、裝修、磨雲石甚至壽司學徒等足足30份散工，被封為「散工王」。最慘時，他試過一星期每日只靠4蚊買一塊光酥餅充饑，名副其實「行屍走肉去追夢」。
林耀聲感激吳浩康比機會維持生計
林耀聲轉行一事曝光後，即有不少網友留言同他打氣，留下鼓勵說話，而他於今日 (9月10日)就在社交網站留言：「多謝大家支持同鼓勵，其實我都係趁未有工開嘅日子，番吓地盤姐，唔覺得係咩大事，我同每個人一樣都有面對自己人生既挑戰，我只係為左可以繼續我既演員路走得更長遠，更好，都多謝阿Deep可以比機會我可以維持生計！學MC仁話齋：『夢想係攞黎成真，如果唔行動淨係諗果啲叫妄想。』我相信我會再同大家喺銀幕上或者其他媒介見面，嗯！我真係相信！無咩事我繼續番工先。」
延伸內容 : 朝做「地盤KOL」 夜教唱歌 吳浩康 : 最緊要揾奶粉錢
延伸內容 : 任歌唱比賽評判憶出道經歷 吳浩康開建築公司做老闆 無意聘請張致恒
梁朝偉曾讚「年青有為」
直到2016年憑《點五步》再次爆紅，林耀聲演技大受好評，仲躍升為「御用少年版」，在《風再起時》飾演少年版梁朝偉，更獲偉仔親口讚賞：「年青有為！」
由大銀幕影帝接班人，到今日靠雙手做地盤汗水換飯食，林耀聲不畏世俗眼光，正如吳浩康同《造星V》的陳鎮亨（亨仔）一樣，靠雙手撐起生活與夢想。只要留得青山在，相信觀眾好快會在大銀幕見返呢位有骨氣的真漢子！
