發佈時間：18:06 2026-08-25
去年走入大館睇臥底展覽，被兩架吊起的車所震撼；今年重遊舊地，再睇《飯氣攻心》導演陳詠燊出任策展人的「拍住
上—光影裡並肩馳騁的我們」展覽，就被大大架的直升機吸引。
陳詠燊說，今年藉着向《黑玫瑰》、《特警新人類》等8部「拍檔電影」致敬，探索香港不同時代的團隊精神，最開心是自肥成功，請來偶像許冠傑（Sam）拍片，「好感動！Sam仲自彈自唱《最佳拍檔》一曲。」
他慶幸入行以來，遇到很多神隊友。提到展期將於10月4日結束，原來他已為一堆心血鋪定後路。
「我諗緊叫古生（古天樂）買晒佢，佢儲咁多玩具，至少買嗰兩隻機械人啦！」
自肥揀《最佳拍檔》
今次展覽的電影，由60年代的《⿊玫瑰》，到前年的《臨時劫案》都有。陳詠燊指入選準則，必須是該年代拍攝的時裝片，反映到當下的社會民生，而每個年代，只會揀一至兩部。
「團隊提議我揀《九龍城寨之圍城》，我鍾意套戲呀！但佢唔係當時創作，冇辦法。本來兩次展覽都想擺我師傅馬偉豪嘅《新紮師妹》落去，仲有《東京攻略》都差啲confirm，但因為同《特警新人類》撞期，我哋想呈現《特警新人類》隻機械人多啲，取捨之下，唯有忍痛放棄。」
8部戲之中，他指私心一定會揀《最佳拍檔》系列，全因他是許冠傑的骨灰級粉絲，是那種睇演唱會，會衝上台前握手那一種。
「展覽有一個對談環節，我初頭打定輸數，冇諗過Sam肯拍片講拍攝感受同自彈自唱。收到片後，我唔敢用手機睇，等到夜晚，叫太太陪我打開電腦一齊睇，一聽見Sam講Hello，我啲眼淚係咁流。記得細細個住牛頭角下邨，舅父喺牆上貼咗張Sam嘅海報，我就係咁鍾意咗佢幾十年。我哋私下未正式見過面，𠵱家我成日打聽Sam幾時得閒嚟睇，期待親自為佢導賞。」
望古天樂認頭
陳詠燊說辦展覽最開心，是感受到香港電影界上下一心去撐一件事，古天樂、鄭秀文、郭富城等大忙人，個個排除萬難夾期錄影對談。「佢哋拎個心出嚟交流，一個斗零都冇收。我仲係第一次見城城，拎埋中學時買落隻《狂野之城》CD畀佢簽名㖭。」
現場還展出一系列珍貴的道具，有真假鎚仔、斧頭、古天樂借出的《明日戰記》裝甲，還有劉偉強導演珍藏、在《風雲雄霸天下》用過的雪飲狂刀、火麟劍和無雙劍等，令人大開眼界。
「劉偉強導演上年借咗好多嘢畀我展覽，今年我問佢借刀，佢話：『我𠵱家喺上海，你幾時要？』我話：『趕㗎！幾日內要。」見佢唔應機，諗住借唔到啦，點知唔夠半個鐘，佢同事就搵我上office攞3把武器。」
他坦言，展覽打卡位的直升機在技術上最難呈現，而上下倒轉畫廊就從《縱橫四海》眾多機關中，幾經考慮挑選出來，結果吸引鄧麗欣、蔡卓妍、張繼聰等交足戲打卡，玩得超開心。
「展期結束後，我諗住叫古生至少買兩隻機械人，仲有直升機。如果個倉裝唔落，我哋就幫佢拆件組裝，希望佢聽到，自己認頭啦！」
