發佈時間：17:51 2026-05-18
昔日，無綫「五虎將」之一、今年67歲的湯鎮業，與前妻姜坤，育有大女湯愛嘉及一對孖仔：大寶湯君慈（Bruce）與小寶湯君耀（Chris）；而兩兄弟皆遺傳父親的演藝細胞，現已加入娛樂圈發展。此外，Bruce對家居設計亦相當有品味，原來是盡得媽媽的真傳，他笑說：「媽咪布置屋企好叻㗎，佢嗰啲係英國風，好有性格、好有品味！」
讀書畢業後，Bruce和細佬便搬出來居住，有了屬於自己的天地，他便開始發揮設計小宇宙。現時住在港島西區的他，將520呎的單位佈置得極具格調，曾經在社交網放了幾張客廳小圖，其不凡的審美品味，在網絡上引發熱議；然而，這間屋卻令他留下永不磨滅的驚險經歷。
繼承父業
今年31歲的大寶湯君慈（Bruce），中學畢業後，獲得美國加州大學洛杉磯分校（UCLA）取錄，修讀社會學及電影系學士課程；而大學畢業後，他便返港繼承父母的衣缽成為一名演員。
Bruce坦言，由細到大父母都很想他們兩兄弟入行：「因為細個比較怕醜，唔係特別想入行，但係阿爸、阿媽就好想我入行，因為大學副修電影，之後就慢慢鍾意咗呢行，嗰陣時試過一日睇兩套電影，畢業之後就好順其自然入咗行。」事實上，除了父母之外，他的伯父湯鎮宗和堂姐湯洛雯亦是知名藝人，當真是「演藝世家」。
入行之後，爸爸湯鎮業給了兒子不少鼓勵及忠告，Bruce憶說：「佢叫我盡量學多啲嘢，因為永遠唔知道自己幾時用得到。得閒就學吓騎馬、射箭，總言之有時間就搵多啲嘢學啦！同埋一定要有人生經驗，仲有拍多啲拖。不過，我覺得拍拖呢啲嘢要順其自然囉，佢又叫我盡量見多啲人、多觀察其他人同埋同人溝通多啲。」
景色迷人
Bruce獲得古天樂旗下公司天下一的青睞，簽約成為藝人。除了喜歡演戲之外，他自小因為吸收了媽媽的裝修品味，亦對家居設計大感興趣。從來沒有修讀設計的Bruce，靠平日頻睇YouTube及雜誌長知識，他坦言：「我媽咪好鍾意設計屋企，佢嘅風格係以舊英式為主、好古典，例如貼牆紙、用白色牆框等，佢係一個好有品味嘅人。」
他續說：「幾年前，我畢咗業之後，就搬咗去將軍澳住，有咗自己嘅屋企，我就開始將自己嘅設計概念放喺自己嘅小蝸居，我自己係好鍾意有年代感嘅嘢，將嗰度裝修到六、七十年代嘅美式風格。」不過，因為風水的關係，一年前，Bruce同細佬就搬到港島的西區居住，這個520呎的兩房兩廳單位，一眼望出去便是壯麗的無敵海景，令人心曠神怡；還能夠經常見到不同船隻穿梭，更加是目不暇給。
心有餘悸
在客廳的一排巨型玻璃窗，前面特意擺放了兩張單人扶手椅，旁邊置有一個小小的酒櫃，好讓Bruce可以宴請朋友前來，一邊觀賞夕陽西下海上波光粼粼的迷人景色，一邊飲番兩杯，人生一大美事。另外，客廳的梳化選用了大地色系的布面，搭配復古木質書架與櫃子，沉穩又不失溫馨。
至於飯廳的位置則放了一張大理石圓枱，再配搭藤編餐椅，加上天花板懸掛的日式和紙燈籠吊燈，為這個空間注入了一點禪意。Bruce直言：「因為呢度我係租番嚟嘅，所以都仲未做到我最想要嘅裝修效果，例如我想將啲牆身油一啲好鮮艷嘅顏色。」他又表示，希望當演員之外，可以做多一份兼職，不難猜想便是設計師。
由將軍澳搬到港島西區，由於兩處都近海，春天一樣潮濕，所以早已習慣；不過，新居到了夏天打風的季節，這裏便多了一份驚險。自言非常膽小的Bruce，就因為強颱風導致大廈搖晃，令他坐立不安，更一度要伏在地下平復心情。
Bruce憶述當時的情況，還心有餘悸：「呢度打風好犀利，成座嘢會搖㗎。如果打風我就唔會喺度住㗎啦，返去阿媽度瞓，上年打風，我直頭係成個人趴咗喺地下，差啲想喊。我即刻走落管理處，等咗成個鐘先有車，跟住載我去阿媽屋企。好彩打『山竹』我未搬過嚟啫，如果唔係嚇死我，我細佬就照喺度瞓，佢唔驚㗎！」雖然說孖仔孖心肝，但是面對「災難」的反應卻令人猜不到！
