2003年港姐季軍戚黛黛（Priscilla），最近因為參加了《中年好聲音2》，而備受矚目！
現年42歲的黛黛坦言，這一次是她在演藝路上的尾班車，加上有飛機師老公的大大力鼓勵，明知輸硬，都要一試，她無奈的說：「喺呢一行做咗20年，好似做咗好多嘢，但又冇一樣嘢成功，希望能夠藉着這個比賽挑戰自己。」結果，她未能晉級60強。
雖然事業失意，但幸好愛情得意；然而，結了婚7年的她卻慨嘆：「你睇我好，我睇你好，結婚之後，我哋一直都想有小朋友，可惜我子宮有事，生晤到小朋友之餘，仲每年都要做手術。」在黛黛身上，確實能體悟到人生又怎能盡如人意呢？

最後機會

2003年，戚黛黛（Priscilla） 因為參選《香港小姐》 ，並且獲得季軍而為人熟悉。其實，16歲時，她曾參加1998年的「全球華人新秀歌唱大賽」，可惜未能發揮最佳表現而落敗。
黛黛憶述25年前參加新秀時，由於未能唱到自選歌曲彭羚的〈彷如隔世〉，故沒有將最好一面表現出來，結果可想而知！「我係真心鍾意喺台上表演嘅一個人，當年我只係得16歲，第一個回合，佢哋要我唱張惠妹嘅一首快歌〈You make me free 〉，仲俾咗對好高嘅高踭鞋我着，搞到我想跳舞都跳唔到，心情又緊張，結果未唱到自選歌曲就已經俾人叮走咗。其實，我一直對呢件事耿耿於懷，因為我覺得，我未能夠發揮到自己最佳嘅狀態。」
為了圓夢，黛黛最近參加了無綫的唱歌比賽《中年好聲音2》。海選時，她以陳曉東的首本名曲〈心有獨鍾〉上陣。雖然她表現緊張，還被評判之一的伍仲衡指有懶音，但亦順利進入108強。她直說：「 我對唱歌仲有一團火，今次應該會係我企上舞台表演自己嘅最後一次機會。其實，上一屆我已經想參加，但當其時中咗新冠肺炎，失去咗個機會。」
她續說：「睇到我嘅好朋友曹敏寶玩得咁開心，今次我當然唔想錯過啦！不過，我始終唔係一個素人，有好多包袱，所以我都有啲擔心。好彩我老公好鼓勵我，佢話你未試過又點知呢，如果你失敗咗，你咪返嚟做番師奶囉！」可惜，黛黛最後仍是因為太緊張，而未能晉身60強。

蛋糕情緣

其實，黛黛的演藝路並不平坦，選美入行後工作不多，由2005年到2007年只參演兒童節目《DaDaDeDe精靈樂園》，人工微薄加上收入不穩定，令她產生退居幕後工作的念頭，後來幸得向海嵐搭路簽約經理人公司，輾轉地又過檔了亞視。
黛黛表示，在亞視初期的工作量真的很多，可惜換了內地老闆王征後，工作越來越少之餘，更被勒令上一些公關的課程，她直言：「換咗老闆之後，佢哋要我返去上堂，又要簽到，日日如是，有一日，人人跟老闆去跳『騎呢舞』，我見到咁樣，梗係唔去啦！跟住，有人打電話嚟話：『你真係唔過嚟，後果自負！』唔去跳舞都明知冇運行啦，自此之後，我直頭唔去上堂，佢哋話我唔履行合約，最後當然就係俾人炒啦！」
上天閂了黛黛一扇窗，但竟然給她開了另一道門。2012年，她遇上了長期飯票、靚仔飛機師Calvin Yeung，她開心的說：「其實，我性格好內向；不過，好彩我有一個夠outgoing嘅朋友沈穎婷，去咗做空姐。有一次佢同我𠵱家嘅老公一齊飛去加拿大，佢哋認識咗之後，於是叫埋我一齊出嚟玩。當時，我覺得呢個男仔嘅思想好細個，成個小朋友咁，心諗唔使識佢啦！其後，佢知道我鍾意整蛋糕，於是去加拿大做嘢嘅時候，幫我買咗好多整蛋糕嘅用品返嚟，就係咁樣，我哋就開始傾偈，互相了解。」
拍拖3年多後，兩人於2016年在意大利的一座古堡結婚行禮。當年，他們宴請了80位親友見證，姊妹團一行10人，由黛黛妹妹擔任伴娘，另外「港姐姊妹團」，包括：陳茵媺、曹敏莉、李施嬅、朱凱婷、張嘉兒等。婚禮後，夫妻隨即在當地度蜜月兩星期，sweet到暈！

天意弄人

婚後，黛黛與老公不設防努力「造人」，可惜天意弄人，5年前，她發現自己生了朱古力瘤兼子宮內膜移位，以致阻礙生育。她無奈的說：「每一次月經都會好痛、好痛，個子宮好似俾刀割一樣，我覺得應該就好似生仔咁痛！我裏面生咗一個10 cm嘅朱古力瘤，攞完出嚟都仲有好多手尾跟，因為尿道收窄咗，要用支架撐返開，𠵱家我每一年都要做一個小型手術，要做麻醉去換支架，雖然老公好想生B，但係咁嘅狀況都好難，唯有順其自然。」現時，黛黛經常與老公周遊列國，生活無憂，只要活在當下，一樣可以好開心！