發佈時間：16:50 2025-09-01
人要養生，多做運動，狗狗都一樣！《超級巨聲》出身的劉威煌，日前就帶兩隻寶貝：3歲的貴婦狗女「珠寶」，和比熊犬妹妹「珍珠」，齊齊去寵物休閒店游水、玩滑梯放電。「今次係佢哋第1次游水，估唔到珠寶平時好活躍，居然有少少緊張，好彩一放落水都識游。珍珠不嬲慢條斯理慣，佢懶洋洋咁游，好搞笑，切合佢性格。」98年港姐冠軍向海嵐（Anne），同日亦帶住7個半月大的貴婦囡囡Lulu（猋猋）前來扮靚，牠剪毛時企定定，連早前的下水禮都淡淡定，「可能佢仲係BB，所以天不怕，地不怕。」看着3個小朋友表演「狗仔式」，威煌和Anne都笑到收唔到聲。
劉威煌如珠如寶
「下水禮」這天，劉威煌「父愛爆棚」，望着寵物助理陪同珠寶和珍珠走落恆溫游泳池玩，他不斷為兩個寶貝打氣，又拿出手機影相拍片。
這間結合泳池、酒店、美容等服務的寵物休閒店PAW by PAW，由2019年港姐冠軍黃嘉雯與友人合資開設，會根據狗狗的體重而收取游水費用，每半小時大約380至680港元。
劉威煌說：「今次珠寶同珍珠游咗15分鐘，初頭都有啲擔心㗎，因為平時佢哋除咗沖涼，冇乜掂水。兩隻都乖，仲游得越來越熟，我要帶佢哋游多啲先得，因為好多時狗仔老咗，骨骼同關節會差啲，希望從小訓練佢哋。」
兩隻寶貝一啡一白，劉威煌重視牠們的健康，很大程度是因為牠們8歲的哥哥「Jumbo珍寶」，4年前突然毫無預警下離世。
「嗰時正值我臨開演唱會前半個月，有朝起身，發現Jumbo突然心臟病發離開咗。之前一個月帶過佢去體檢，明明好健康，點知⋯⋯
「𠵱家我照顧佢兩個妹，可以話無微不至，會控制佢哋體重、食supplement 、定時體檢等。佢哋個名都有少少專登改，將『珍寶』個名拆開，變做『珍珠』同『珠寶』。」
愛犬姊妹只差6歲
回憶起Jumbo生前的點滴，劉威煌百感交集。「佢突然離世，我哋成家都以淚洗面，連工人姐姐都唔捨得掉Jumbo嘅狗屋同玩具。Jumbo火化完，骨灰仲擺喺屋企，我哋覺得百無禁忌，直至一年後，覺得要放下。」
能夠遇上珠寶和珍珠，他相信一切是緣份，尤其是牠們的出生日期只相差6日。
「有日太太經過寵物店，影咗張相俾我，話好得意。原來佢見到珠寶沖緊涼，一個職員幫佢梳頭，一個修指甲，一個抹緊身，嘩！3個人服侍佢，好似闊太咁，有如珠寶咁矜貴，於是就抱咗佢返屋企。
「一個禮拜後，我哋想養多一隻，等珠寶有個伴，冇咁悶。因為嗰時Jumbo有分離焦慮症，養佢8年以來，冇一秒唔喺我哋身邊，工人姐姐連落街買餸都要帶埋佢。唯一一次將佢單獨留喺屋企，佢真係嗌足三個鐘。」
眨下眼，珠寶兩姊妹已由3個月BB，變成3歲大個女，「佢哋同哥哥最大分別，係Jumbo好似人，好似一個好乖嘅小朋友坐喺度，好多嘢食擺喺佢面前，佢都唔會食，等你叫佢食先食。但呢兩隻真係狗嚟，有嘢食會即刻咬，仲好鍾意梳毛，性格自由奔放啲。不過除咗緊張佢哋嘅健康，我盡量任佢哋想點就點，開心最緊要。」
向海嵐LuLu好活躍
向海嵐的心肝寶貝Lulu，是她第二隻毛孩，家中早已有16歲的貴婦狗Chloe。Lulu 有個中文名叫「猋」﹙讀音：標﹚，狗如其名超級活躍，見到滑梯就衝，之前第一次游水，心口更掛個「勇」字，游得好快、好enjoy 。
「4、5年前，我開始想養第2隻，但Chloe呷醋。直至今年初，有朋友問我要唔要貴婦狗狗，我一見就鍾意，返到屋企，Lulu同Chloe都好夾。不過Chloe係老人家，細細粒又企唔穩，Lulu就好似大貨車，衝過去會撞低佢，所以𠵱家暫時要分開佢哋。」
Lulu有無窮電力，接回家時只有兩個月大，比較難控制，牙仔痕還試過咬人，她和媽媽都中過招。
「頭兩、三個星期最掙扎，有諗過不如唔養。當時基本上冇得瞓，因為每兩個鐘我要起身一次，睇吓佢有冇需要去廁所，同埋要教識佢。
「初時仲冇得去夜街，因為我要趕喺工人姐姐9點幾瞓覺前，返到屋企睇住Lulu。點知有次我夜返一個鐘，佢就瀨到成身屎尿，要捉佢去沖涼，真係好痛苦。」
向海嵐最終找訓練員出馬，現時Lulu已識得去廁所。下一步，等牠定性一點，希望帶牠去考狗醫生幫助人。
延伸內容：劉威煌參加《中年好聲音2》好掙扎 驚畀人話發明星夢
延伸內容：向海嵐意外入坑盲追Labubu 上月發售第三代「前方高能」系列成功儲齊
《東周網》訪談系列節目《星桄伴我心》8月重磅嘉賓：
即睇：譚輝智親解拉姑寵愛之謎 爆喊陪最愛開刀「望住手術室盞燈，我真係好驚！」
即睇：楊思琦破天荒講跳水前度吳帥：「好多人話我貪慕虛榮！」 親揭神秘老公底細 收$1200傾偈5分鐘解謎 與13歲女兒獨家真情對話
即睇：譚俊彥大爆與李佳芯電話傾心事內容│太太放棄演藝事業下嫁│親解爸爸狄龍與姜大衛不和謎團
