發佈時間：18:00 2025-10-27
幸福的女人，從來有樣睇。
2022年再婚的陳煒，在台慶劇《巨塔之后》中，是霸氣十足，爭住登上集團主席寶座的女強人；私底下，正如她話齋：「我是溫馴類動物」，尤其當她致電給醫生老公陳國強時，嬌嗲的一聲：「Honey！」粉紅泡泡即刻塞爆現場每個角落。
2012年，陳煒和台灣商人顏志行離婚，當時她打定輸數，再沒有戀愛機會，但上天往往安排了最好的禮物壓軸出場。單身6年，她邂逅了陳醫生，一次拍戲暈倒標冷汗，對方秒速上門睇症，送上一碗粥，全方位醫好她的身心，3年前正式榮升陳太。
陳煒說，很崇拜老公，「我覺得佢做醫生幫人，好charm。」
更冧滋滋的，是陳醫生滿眼都是她，將她每句說話記在心。
「有次我問佢：『我經常煮飯俾你食，會唔會有一餐你煮俾我食呢？』佢真係肯做，堂堂一個大男人，從未去過街市，走入去買咗啲爛蓉蓉嘅菜心同醃好嘅豬扒，返嚟煮俾我食。雖然唔好食，甚至啲豬扒係生嘅，但我都開心，因為佢為咗我一句話，嘗試去做一件畢生都未做過嘅事。當然我要執手尾啦，廚房搞到好亂。」
有時會碰到陳醫生在油麻地和旺角一帶出沒，陳煒聽見未有皺眉，因為知道老公的目的地並非砵蘭街，而是去看模型。
「佢以前冇呢個習慣，識我之後放縱咗。可能佢細個時，好多模型都係哥哥嘅，所以大個後要彌補番。以前我會幫佢買衫，但自從佢鍾意咗《龍珠》、《北斗之拳》後，就開始自己買呢啲T恤。」
一個將對方的說話放在心，一個令對方變回小朋友，愛情的魔力非同小可，難怪陳煒說：「冇嫁錯人。」
心理學治情傷
51歲的陳煒，最近和宣萱在《巨塔之后》中鬥生鬥死，跟鏡頭外溫柔的她完全兩個樣。她說，演戲最好玩的地方，就是可以過第2個人生。平時她會在家出動丹田氣，去練習一些比較毒辣的對白。
劇中她有如開時裝騷，保守估計，靚衫隨時超過40套。「我冇統計過，我哋主力喺佛山同廣州開工。開劇之前，我哋專登上去試造型，我試足兩日，其實有好多衫，應該着唔晒。」
為了駕馭這些貼身衫，陳煒在拍攝3個月內幾乎冇啖好食。說到爭視后的機會，她就認為有點困難，「我發揮得唔錯，但篇幅未夠多，始終套劇嘅大女主角係宣萱。」
明年是她入行30周年，如果並非首段婚姻失敗，相信她仍然息影，定居台灣。
「前夫（顏志行）係台灣人，喺當地有生意，嗰時我覺得要放棄事業，嫁雞隨雞係理所當然嘅事。」
愛得義無反顧，可惜婚姻只維持了5年。2012年，前夫提出分手。付出的愛不成正比，陳煒曾經問上天為何這樣對待自己。
「覺得好委屈，但冇辦法，唔可以改變人，只可以改變自己嘅想法。能夠企番起身，都有少少關前夫事，因為嗰時佢介紹我讀心理學入門課程，讀完後開竅咗，知道做人必須要以自己第一身去諗嘢，釋懷後就決定返香港重新面對觀眾，演自己最鍾意嘅戲。」
道聽塗說，陳煒在那段情傷的日子，試過情緒受困，需要看精神科醫生。
「情緒最大困擾反而係我婚前（2005年）拍《美麗傳說2星願》，入面經歷咗角色梅姐走人生最後一段路。除咗開工，其餘時間我都匿喺房，唔想見人。」
老公打爛醋埕
一次的錯愛，不阻陳煒後來再次被愛。相信緣份的她，2018年在黃智賢的公司派對上，認識了現任老公陳國強醫生。她愛老公細心溫柔，說話不多；老公欣賞她不是港女，識照顧人，廚藝高超則是後話。
相識相愛以來，老公的地雷位，她一清二楚。「我哋好少嘈交，但當佢見到一啲唔熟或者唔識嘅人，突然對我大顯殷勤，有少少身體上接觸，佢就會嬲，覺得冇必要。」
呷醋，代表在乎。知道老公要安全感，陳煒當然識做。「我覺得自己幾厲害，會將身邊所有朋友，連合作過嘅男演員，都介紹晒俾佢識。同埋我會交代同咩人去做啲乜，佢又一樣會話番晒我知，大家唔會估來估去。我亦唔容許有人追求我，界線定得好清楚，我會話自己坐車走唔使兜我，拜拜。」
有一個做醫美，又識醫傷風感冒的老公，問陳煒平時的靚樣，是否由老公一手包辦？
她笑笑口說：「其實佢唔係好理我，要我親口講發現邊度有問題，佢先肯出手。喺佢眼中，我冇嘢需要搞，係咪完美老婆就唔知喇。」
有一種靚，叫老公覺得你好靚。而陳煒的靚，連網友都讚，指51歲的她，平時分享的泳衣照索爆，還滲出少女味。
「心得係笑多啲，俾人感覺開心啲，就會少女一啲啩！平時我好懶做運動，最多喺屋企拉筋。少曬太陽，保持美白。我唔會一日一餐，唔使開工嘅日子，我會好正常地食嘢。老公好鍾意捐窿捐罅搵嘢食，我陪佢食都會肥，唯有開工時食少啲當keep fit。」
爸爸鼓勵選美
網友對陳醫生有兩個不解之謎，其一是合照時極少展露燦爛笑容；其二是有一對熊貓眼，臉色灰黑，懷疑他每晚跟老婆陳煒恩愛纏綿，被吸乾冇精神。
陳煒笑住解畫：「唔多笑係因為佢怕醜，一人多嘅地方佢就社恐。佢膚色自細就比較暗啞，你唔可以要求零妝容嘅佢，同化咗妝嘅我一樣咁靚，所以唯有犧牲佢。𠵱家我叻咗，開始幫佢輕輕『執』黑眼圈。」
兩人在2022年9月拉埋天窗，陳煒說，本來婚期會早一點，但因爸爸在同年4月去世而押後。提起爸爸未能見證她這段婚姻，她一度哽咽。
「遺憾㗎！不過起碼我爸爸認識老公。嗰時爸爸住屯門，年紀大，好多時頭暈身㷫，陳醫生好好，就算我開緊工，佢寧願晏晝唔食飯，都由將軍澳撲入去睇我爸爸，等佢知道有人關心佢。」單是這個舉動，已令她認定非君不嫁。
陳煒96年當選亞姐冠軍，原來由18歲開始，陳爸爸一直鼓勵她選美，還取了港姐報名表格。只是她一直耍手擰頭，直到讀珠海書院會計系時，才決定參加。那時候港姐剛截止報名，她唯有改選亞姐。
「爸爸好開心我加入娛樂圈，媽媽就比較擔心，驚個女唔知幾點收工返屋企。嗰時我家姐放工收7點，媽媽已經會企喺街上等佢，所以我後來搬出去住，唔想佢24小時都等我。」
奮鬥多年，她獲頒過「最受歡迎電視女角色」獎。「我諗爸爸以我為榮㗎！佢成日喺朋友面前讚我。𠵱家我都經常夢見佢，係一啲開心片段。媽媽比佢早走，2009年因肝癌去世，所以有段時間，佢去咗台灣同我住，陪伴佢嘅時間比較多。」
相依為命
儀式感好重要，浪漫的陳醫生，幾乎每逢紀念日都會有所行動冧妻，例如有一年寫卡，寫了〈相依為命〉的歌詞：「你不放下我，我不放下你。」
陳煒說：「佢會寫低覺得有意思嘅文字，亦唱過呢首歌俾我聽，歌聲不堪入耳㗎！但佢會嘗試唱，帶歡樂俾我就得啦，佢仲鍾意畫公仔。」
訪問尾聲，要求她致電老公講心底話。由按下撥出掣開始，她已一臉冧樣，接通電話後第一句，就嗌honey。當聽見老公叫她先細數相處多年最感動的時刻時，她即刻撒嬌：「你諗唔到就諗唔到啦！」
陳煒說：「其實冇咩好驚天動地嘅時刻，主要係兩個人一起相處，用心對待。好似剛才佢特登幫我送衫過來，就係呢啲咁細微嘅事。好感謝陳醫生喺我生命中出現。」
電話另一方的陳醫生，亦許下愛的承諾。「我哋仲有好多個3年要相伴，好感恩你喺我生命中出現，因為大家都唔係第一次婚姻，可能會更懂得珍惜眼前人，小心處理人際關係。」
陳煒十分受落：「好啦，錫晒你，快啲做嘢賺錢呀！」笑住收線，閃到核爆。
她手上的婚戒，雖然自言因經常煮飯洗碗，失去光澤，但卻是兩人心連心的最佳證據。
延伸內容：巨塔之后︱ 陳煒正式登場 以3造型展現Fit爆身段 跟宣萱正面交鋒充滿火藥味
《東周網》訪談系列節目《星桄伴我心》10月重磅嘉賓：
即睇：湯令山失戀情歌點擊破1500萬 坦認喊住唱 揭Wyman教做人智慧 爆生得唔高謎團 曾擔心生計做某件事
即睇：鍾鎮濤與范姜「姜濤戀」有火花對談 拍《巨塔之后》床上戲心得
立即追蹤《東周刊》全新WhatsApp頻道，緊貼全城熱話、突發猛料、獨家消息！
