發佈時間：14:10 2025-08-16
很多人營營役役，也找不到自己喜歡的工作。公關公司老闆周美鳳的女兒蔡欣熹（Florence）比較幸運，大學畢業後，在拍賣行工作過，又曾創立珠寶品牌、到畫廊打工，之後再飛到泰國上藍帶課程學整餅。兜兜轉轉，她開始接觸冷熱治療，叮一聲之下，決定投入wellness（身心健康）這行發展。「嗰時返到香港有啲唔開心，因為試咗好多嘢，都搵唔到自己鍾意嘅方向。𠵱家搵到，仲報讀緊YTT 200小時瑜伽導師訓練課程，學多樣嘢冇壞吖！」事業搵到出路，愛情亦然。她透露與男友Spencer拍拖7個月，甜蜜蜜。
棄珠寶設計
走進Florence位於中環的水療中心ACME Wellness，窗外一片綠油油的景觀，配合室內柔和的音樂，可以想像在這裏交替做冷熱治療，焗完紅外線桑拿，再浸凍池，或者直落做埋聲音療法，是一件很療癒的事。
「我非常鍾意做spa，我嘅wellness journey由泰國開始。泰國喺呢方面好先進，有好多地方俾你養生。冷熱療程喺外國好普遍，對身心靈好有效，好似之前有個明星朋友浸完凍池喊，其實我第一次都係咁，因為佢會逼你放鬆，幫你減壓，好似掉咗啲垃圾咁。」
33歲的Florence，當年17歲前往美國哥倫比亞大學修讀藝術和歷史，被逼要學會獨立，搬宿舍、煮飯一腳踢，「因為校園太大，唔主動約朋友係會見唔到，真係超級唔慣。我同媽咪呻，話想休學一年返香港，但佢唔俾。」
畢業回港後，她學以致用，在藝術館、拍賣行工作，之後更為自家珠寶品牌Florence T設計了不少靚靚首飾，可惜競爭太大，無奈要放棄。
「𠵱家冇做喇，之後返番畫廊做，再去泰國學整餅，都係一種藝術。讀完後，我發現唔係特別鍾意整餅，只不過為咗圓兒時夢想。嗰時喺泰國都有做spa，返港後有人介紹我嚟呢度，識咗老闆，就同佢一拍即合，做咗拍檔。」
拍拖7個月
Florence和母親周美鳳有如餅印，兩母女出名感情好。訪問這天，做完運動的周美鳳前來，跟女兒說了幾句後，便熟練地入房做療程，果然如Florence所言，媽咪也「中毒」。媽咪事業出色，問她有否受到影響？
「媽咪係一個非常叻，又好勤力嘅人。我性格同佢唔同，我比較chill，但見佢咁辛苦賺錢，俾心機做好每件事，令我都想做得好啲。」
言教不如身教，在她的回憶中，媽媽非常偉大。「我細個有弱視，一隻眼要戴眼罩，會被小朋友取笑似海盜。有次媽咪拖我過馬路，旁邊有個媽咪見我咁，可能歧視我，扯開佢個小朋友。媽咪見到即刻開聲鬧，令我好感動。」
Florence曾說過希望30歲結婚，如今仍未兌現，難道自己唔心急，媽咪冇催婚？她說：「某程度上有催嘅，但呢啲嘢冇得逼，我有拍拖，但想專注事業先。」
她一臉靦腆，續說：「我男朋友叫Spencer，從事珠寶行業，我哋上年9月喺中環海旁音樂節撞返，拍咗拖7個月喇，佢份人好好，同我性格一凹一凸。重遇嗰陣係我人生低潮，佢對我好有耐性，冇放棄我，會陪我。」
緣份天注定，她甜絲絲地說，差不多時候會見家長，看來周美鳳要實現嫁女心願，應該不遠了。
延伸內容：駱遊敦煌 周美鳳
《東周網》訪談系列節目《星桄伴我心》8月重磅嘉賓：
即睇：譚輝智親解拉姑寵愛之謎 爆喊陪最愛開刀「望住手術室盞燈，我真係好驚！」
