發佈時間：16:38 2025-07-23
早陣子扭開電視，見到陳方藤（Meter）帶住陳山聰和阮浩棕在東京捐窿捐罅歎美食，隔住個mon都流晒口水。
Meter有「拉麵陳」之稱，是第一個將沾麵和快餐式一人燒肉帶來香港的人。由去日本讀法律、幫TVB做製片、在當地開公司、娶日籍太太，到反攻香港飲食業，他一路走來，都是整定。
「中學畢業後，諗住去日本學日文一年就返香港，點知讀咗半年，膽粗粗報讀大學，朋友報10間考唔到，我報一間，亞細亞大學就收咗我，真係整定㗎！」
上天自有安排，他在日本一住就住了15年，現時每月都會飛返鄉下十日八日，吸收新事物當養分。
日本讀法律
Meter謙稱不是元祖日本通，但說陳爸爸是香港第一代潮人，他受爸爸影響而愛上日本文化，他就點頭承認。
「嗰個年代，情報唔多，好少人飛日本，爸爸引入產品喺香港大大公司賣，攞咩都大賣。我就細細個開始去日本旅行，後來中學畢業，身邊人興起去加拿大、美國留學，我諗住照跟，阿媽即刻反對，話：『爸爸喺日本，點解唔去？』」
父母開綠燈，他原本打算學一年日文，誰不知無心插柳下獲大學法律學部取錄。以他當年半桶水的日文，何來信心應付得來？
「冇㗎！之前喺香港律師行做過一段時間，幫律師去法庭申請排期之類，覺得做律師好型喎，橫掂咁離奇去咗日本讀書，咪試下讀法律囉，冇諗過之後點，報咗先，冇諗過入到㗎！」
初到日本，Meter未識得玩，放學還要做兼職，直至有次調轉做「遊客」，跟訪日的朋友周圍去，才發現日本原來如此多fun，開始發掘好味餐廳。
「最大契機係99年TVB拍《至叻至嘆系列》，PA好友叫埋我一齊出去玩，嗰時有伍姑娘（伍詠薇）、蔡一傑等，我義務幫佢哋翻譯，friend咗。之後TVB知我駐日，好多音樂特輯同劇集都搵我做製片翻譯，而自己第一個真正做嘅係王傑音樂特輯，一手包辦搵外景同住宿。」
引沾麵來港
Meter的日文突飛猛進，多得3年來在歌舞伎町夜總會做兼職的訓練，同時亦加深了對日本文化的認識。「我負責切水果擺盤，最難忘有次上台唱歌，突然有冰掟過嚟，望真啲，原來係阿叔客人掟，佢隔籬個女仔用中文講：『佢嬲喇，你唔好再唱！』之後個阿叔笑住同我握手，我發覺佢冇咗兩隻手指，代表要話我聽佢係乜嘢人，從此我就知道原來日本人發嬲係冇樣睇嘅。」
兼職驚險，但在大學儲落的人脈，就令他製片的工作不斷。眼見有份好玩又賺錢的工作，加上他自覺樣子後生欠成熟，做律師冇着數，於是決定轉跑道，在原宿開公司，接洽電視、雜誌、時裝等工作，正式與潮流接軌。
「初頭諗住一路做落去，點知09年出書介紹最正嘅50碗日本拉麵時，發現香港竟然冇一間正宗嘅豬骨拉麵店。後來機緣巧合，我喺香港開了第一間豚王，掀起拉麵熱潮。其實我冇諗過返香港，但間舖有錢賺，係咪要返先？」
2012年，他破天荒將沾麵引入香港，在深水埗開設隱家拉麵工場，大排長龍。那碗人氣的番茄沾麵，源自澀谷附近的山手拉麵店，「呢碗番茄麵嘅味道，真係改變咗我人生。我嘅宗旨係香港冇，點解唔可以帶嚟？」
老婆廚藝叻
沾麵、拉麵、一人燒肉，白布烏冬、宗像牛、壽司等，Meter統統開過店。去年在銅鑼灣開沾麵店，吸引前緋聞女友容祖兒、陳奕迅夫婦、佘詩曼等星級顧客前往打卡。「我同祖兒不時有聯絡，佢想食沾麵好耐，同埋佢可能見啲朋友有嚟，咪話：『我唔嚟唔得呀！』」
不過他坦承生意難做，要同時兼顧品質和管理員工有難度，所以現時店舖數量，由高峰期10幾間減至3間，只留下海老名沾麵、Yakiniku燒肉和網上賣家麵，寧願集中火力做到最好。
不進則退，因此Meter每月都會飛往日本視察飲食趨勢，未來希望拍多些介紹節目。「啱啱拍完嘅《人生美食地圖-東京篇》算係第一步，因為好有滿足感㗎！同埋𠵱家越嚟越多人去，變咗個個都覺得日本所有嘢都好，但唔係吖嘛！我想過濾一下，介紹一啲真係夠地道，價錢、食材同環境都合理嘅餐廳。」
他對食有要求，「訓練」到日籍太太一手好廚藝，「佢日式、西餐乜都識，係煮中菜唔夠鑊氣。囝囝就好黐媽咪，識講日文、英文同廣東話，如果我唔同佢講廣東話，會俾老婆鬧㗎！」
明年入「五」的Meter，上半場人生精彩，下半場，相信上天也有最好的安排。
跟住去搵食
Meter有如一本人肉日本美食百科全書，他向《東周刊》讀者推介5大日本東京必食餐廳，跟着他的心水去開餐，性價比一定高！
延伸內容：陳山聰孖陳方藤遊日本搵美食 斷魂辣人氣拉麵辣到喊 行街買衫只食蘋果 排隊排足5個鐘
《東周網》訪談系列節目《星桄伴我心》7月重磅嘉賓：
即睇：馬國明揭媽媽與張國榮秘密關係 認扮過曱甴陪襯黃子華 爆2千個短訊追求老婆湯洛雯 激罕示愛：希望下一世都一齊
