發佈時間：09:00 2025-04-13
美容品牌LE D'OR BEAUTÉ老闆娘陳君宜（Qinnie），兩年前開始飼養第一隻鸚鵡後，熱情便一發不可收拾，現時家中養了5隻鸚鵡，包括白色的葵花「Lucky」、綠色的亞馬遜「富貴」、一對紅色的吸蜜閃電「火火」和「焱焱」，還有小太陽「Rainbow」。她說：「我覺得鸚鵡智商高，亦好有靈性，一見到人就會自動High，不斷講嘢同唱歌，見到佢哋就開心；加上飼養鸚鵡後，成間屋都熱鬧咗，亦令阿仔變得有耐性和有責任感，所以就越養越多。」她的鸚鵡除了識講「Hello！街！街！」，最叻嗰隻仲會唱〈我是一隻小小鳥〉，犀利！
狂唱〈我是一隻小小鳥〉
這天甫踏進陳君宜家中，籠內的Lucky已相當雀躍，不斷擺動身體並拍翼說：「Hello！Hello！街！街！」而「富貴」亦唔執輸，狂叫「喂！靚仔、靚女！」又不斷唱歌：「我是一隻小小小小鳥，想要飛呀飛，卻飛也飛不高！」
陳君宜表示飼養鸚鵡兩年多，令全家上下都添上不少歡樂，「佢哋隻隻都唔同性格，『Lucky』就最活躍，最多嘢講，每朝見到我同老公落嚟會主動叫：『早晨媽媽，早晨爸爸！』。阿仔放學返嚟，『Lucky』又會叫佢英文名『Ayden』。佢仲好黐我個仔，有時阿仔打機，『Lucky』就企喺佢膊頭上睇。有次我問阿仔去咗邊？『Lucky』竟然識答：『打機囉！』近排仲學識咗首洗腦神曲〈APT〉，得閒就自跳自唱自high，但我一攞手機拍佢就收聲。」
而綠色的「富貴」把口亦冇時停，鍾意講嘢又鍾意唱歌，「我記得喺雀仔街第一眼見到佢，佢就叫『靚女』，帶佢返嚟時就已經識唱〈我是一隻小小鳥〉，當聽到人讚佢，就會不斷唱。至於紅色呢對『火火』和『焱焱』就好溫馴，點摸都唔會咬你，但唔多講嘢；而喺愛護動物協會收養嘅『Rainbow』就好聰明，鍾意玩波，又識將唔同顏色嘅波分開，有段時間我仲教佢踩單車。其實我仲養過一隻叫『Happy』嘅渣甸鸚鵡，不過有日工人姐姐唔記得閂窗，俾佢飛走咗。」
鍾意沖涼曬太陽
過往一向有飼養動物的陳君宜，最初養鸚鵡亦要惡補相關知職，「未養鸚鵡之前，屋企有養貓、狗，最高峰時屋企共有10隻狗，不過走吓一隻，走吓又一隻，𠵱家得番2隻，而且年紀都開始大。貓狗一般只有10多年壽命，但鸚鵡養得好，有啲品種如葵花可以有4、50年壽命，亞馬遜更可以長達80年。我第一隻養嘅係灰鸚，但因為太細帶返嚟，自己唔識餵奶，3個月就『走咗』。之後呢幾隻，我都係等戒咗奶先敢帶返嚟養。」
她笑言飼養鸚鵡後，發現牠們比其他寵物更易湊，「最緊要屋企有足夠空間嘅籠，我得閒就放佢哋出嚟通屋走，陪佢哋唱歌跳舞，好天就帶佢哋出去花園曬太陽，有時仲會帶佢哋出去踩單車同行山，食飯就揀有露天茶座嘅餐廳，等佢哋都有得參與，每次帶佢哋出街都好開心。」
她說鸚鵡的起居亦容易打理，「由帶佢哋返嚟到𠵱家都未睇過醫生，沖涼就喺花園開個花灑淋吓就OK。至於飲食主要都係一啲榖類食品，有時我會加啲生菜。最緊要俾多啲時間同佢哋互動，鸚鵡好醒㗎，我夜晚喺個籠上蓋塊布，佢哋就知要休息，就算講嘢同唱歌，都會自動將音量收細。」
不過鸚鵡有時都有脾氣，這天見攝影師不斷影，隱若就聽到「富貴」話：「喂！影夠未呀？」
延伸內容：生髮︱ 首做直播3小時推生髮產品 陳君宜搵老公鄭躬明做白老鼠
延伸內容：孖前電台主持Christine首做直播 陳君宜變身KOL分享扮靚心得
延伸內容：修身有法︱孖羅霖拍廣告 陳君宜睇韓國中醫激減20磅
《東周網》訪談系列節目《星桄伴我心》4月重磅嘉賓：
即睇：倪樂琳曾因心口胎記感自卑 爆媽媽鍾意某男星
即睇：黃秋生剖白人生幾段情 愧對亡母，對花槽祭父，大仔生死劫，細仔嗲功攞錢
