發佈時間：18:48 2025-04-07
走進香港大學圖書館的展覽廳，映入眼簾的是一場跨界的多元創作盛宴。65歲的鄭文雅，將她由當選79年港姐後，慢慢蛻變成藝術家的雕塑、篆刻、書法、陶瓷、攝影等作品，帶到這裏舉行個人作品展，同時推出新書《風箏不斷綫》。
有今日的成就，鄭文雅自言是勤能補拙，「每樣嘢要做得好，都要花時間去練習，冇捷徑。朋友形容我『藝高人膽大』，唔係話我藝術技巧高，而係話我不怕任何批評，乜都勇於嘗試。」抱着童心看世界，她希望自己能夠做到，同時不斷學習。
閉關3個月寫書
鄭文雅的作品展，由即日起至本月11日舉行，今次是她相隔34年後再辦個人作品展，為港大圖書館籌款，而新書《風箏不斷綫》更特地選在三八婦女節當天面世，對於身為女性藝術家的她而言，別具意義。
「91年辦完個展後，感覺好辛苦，因為我展出嘅唔係較輕嘅卷軸書法或畫，而係全部重到不得了嘅陶瓷。今次仲加埋石頭，運輸同包裝花咗好多時間，有啲喺屋企搬嚟，有啲喺工作室。」
她閉關了3個月去寫書、揀配相、催朋友交稿、揀展出作品、燒製275隻「小風箏」方形碟義賣，如果未試過，她真的不知道原來自己的小宇宙可以去到幾盡。
「今次展覽有超過200件作品，因為淨係千字文，都有84塊泥板。主要分雕塑、篆刻、書法、畫畫、陶瓷、浮雕同埋攝影作品這幾類，希望大家睇完，知道文化傳承嘅重要性，中國人係有責任延續落去。藝術同生活係結合嘅，唔係話要創作一啲偉大嘅藝術品出嚟，所以我展出埋一啲日常用品，好似果仁盤、花插等。」
畫觀音祝願平安
由跳高運動員、港姐、拍戲，到轉跑道去整陶藝、雕塑、書法、打高爾夫球、唱粵曲等，瓣瓣掂，鄭文雅表示要多得自己在15、16歲時去模特兒試鏡，認識了伯樂、著名攝影師宗惟賡（宗伯伯）。對方送了一部Pentax相機給她，撻着了她的藝術細胞，訓練到她有camera eye，看事物有自我一套的角度，對書法、畫畫、構圖，甚至好細隻的篆刻圖章都有特別的審美觀。
鄭文雅直認勇於接受挑戰，抗拒被框框局限，「我諗同我細個喺（元朗）鄉村長大有關，媽媽俾好大自由度我，我會去山溪玩啲大自然嘅嘢，好似捉青蛙，𠵱家啲人見到都會驚啦，哈哈！可能影響到我𠵱家鍾意做就去做，當然都要丈夫支持。」
談到首度展出的心經觀音系列，她透露創作於19年疫情期間，當時她身邊不少朋友都傳來壞消息，「我希望畫觀音來祝願大家平安，嗰時自己都好驚中招被捉去隔離，所以一早準備咗個篋，入面擺晒紙、墨汁、筆，有咩事最緊要攞個篋入營，廿幾日喎！」
刻字刻到白內障
展覽會上掛起的一幅《蘭亭序》木刻，令鄭文雅印象深刻，不得不推介。「嗰塊本來係要送去堆填區嘅麻雀板，我拎嚟刻咗王羲之嘅書帖，有好多空中落筆真係唔容易，尤其佢係一塊好硬嘅白酸枝板。我刻咗第一個字，已經有啲後悔，因為用晒全身丹田氣力落刀，都差唔多刻唔郁，所以一日頂多可以刻一、兩個字，整咗成年，隻手都傷埋。「刻字期間又唔可以出錯，要打醒十二分精神，隻眼好攰。疫情期間畫埋觀音，我嘅老花同白內障都嚴重咗，醫生問我幾時去做白內障手術，我話搞埋個展覽同本書先，哈哈！」
雖然創作幾乎冇停手，但鄭文雅坦言享受過程，唔覺得攞苦嚟辛。她會日日睡足8小時，戒暴飲暴食、戒消夜和拉筋來養生。
問她今後有何大計？她笑說：「收拾心情，做一個總結，因為始終我啱啱攞咗長者卡！我見到差唔多年紀嘅朋友，都有好多維修要做，好似做白內障、換關節等，所以我會以健康為首位，創作就隨緣。」有健康的身體，才可以走更遠的路，送上祝福。
延伸內容：上流貼地日常│霍詠盈、鄭文雅體驗農夫生活 曾昭怡企街食腸粉
《東周網》訪談系列節目《星桄伴我心》3月重磅嘉賓：
即睇：喬寶寶細仔不良於行 陪伴中風病母 感觸落淚：見得幾耐得幾耐
即睇：65歲林漪娸親揭與某藝人不和內幕 笑談老公鐵漢柔情 分享美魔女秘訣
即睇：倪樂琳曾因心口胎記感自卑 爆媽媽鍾意某男星
