發佈時間：12:30 2025-03-08
人生是甚麼？
對41歲的陳柏宇來說，「Life is hard」，是他去年尾推出的專輯名稱，也是其人生觀。
「人生係難嘅，嚴格嚟講係難，因為從頭到尾都難嘅話，我諗嗰個人會好能幹、好有毅力、有好多成就。
「我係每步都難！從來都唔會特別容易，就算𠵱家有老婆同兩個女，都係令我嘅人生有咗意義啫，仲有幸福咗，但唔代表做人唔難。得到咗一啲好嘅嘢，下一步係要保持。
「難，冇人講係唔開心，做人難都可以好開心，尤其係喺艱難中成功嘅話，仲會有一份滿足。容易嘅嘢係人都做到，我唔想做個個都做到嘅嘢，我嘅目標係做一啲自己做唔到嘅，挑戰自己，咁先可以進步。」
艱難的人生，是陳柏宇進步的動力，問他這些年最有進步的範疇，他二話不說：「個樣！哈哈哈！至於把聲，其實我到今時今日，都覺得唱歌係一件難嘅事，對我嚟講係難，要做到我想做到嘅表現，我諗我有排都未到。
「對自己要有一定嘅要求，如果我對自己都冇要求，咁點樣超越自己？對自己一定要Harsh（殘酷）啲，當能夠承受壓力，Push自己去做嘅時候，就應該要繼續做。」
人生，即使艱難，還是要頂硬上！
不悔
陳柏宇於2月舉行了一連兩場演唱會，並對主題《LIFE IS LIVE》，也有一定心思。
「Life同Live，係有雙重意義嘅，可以係一Take過，亦係活着嘅感覺。對我嚟講，我嘅人生從來都唔係得我一個人，仲要有其他人在場，先可以演繹到我嘅角色。
「開Show，咁我嘅角色就係歌手，我會用我嘅歌聲，同觀眾分享我嘅人生，唔止唱我嘅歌，仲會唱其他人嘅歌，咁先會更加立體。」
演唱會於2月15日開鑼，適逢是情人節後，所以跟太太的慶祝，也「在心中！咁我都會將2月14號搬前幾日慶祝嘅。」
有心的陳柏宇，除了提前跟太太慶祝情人節，開Show前也推出了新曲。
「首歌叫〈關於後悔〉，而我就唔係太容許『後悔』喺我嘅字典入面出現，某啲字我唔係好Buy嘅。我呢首歌，其實唔係關於後悔嘅，係關於點樣唔去後悔，因為後悔冇做過，係比你後悔有做過慘。冇做過，連經驗都冇，做咗都起碼叫爭取過吖。
「我覺得後唔後悔嘅嘢，係一種心態，純粹唔後悔就唔後悔，我有些嘢錯過咗，就唔想再錯過，咁咪做多一啲囉；當有慾望想得到某啲嘢、達到某個目標，就要行動㗎嘞！」
緊張
站在台上高歌19個年頭，以為陳柏宇已駕輕就熟？答案是出乎意料之外。
「上台唱歌，我仲係會緊張嘅，呢樣嘢真係天賦嚟嘅，係天賜畀我嘅禮物，到𠵱家都係咁，每一次都係緊張。
「我已經習慣咗同呢份緊張共存，而且我哋相處得好好，佢都未跣過我一鑊甘。我覺得我哋嘅關係係又愛又恨，緊張為我帶嚟一種心態嘅注意，唔使我咁無聊。」
緊張是其努力的動力，最好還有獎座加乘。「我唔會話自己唔恨攞獎嘅，因為呢個係對成個團隊嘅鼓勵，但我又唔會刻意去計會攞到幾多個獎，最緊要都係做好啲音樂。」
事業仍需努力，陳柏宇這個一家之主，面對家中太太及兩名前世情人，也努力盡量做好本分。
「自從要湊女返學，我都係早睡早起，做好嘅爸爸要親自落手落腳做，唔係遙控式咁做。」
說起兩名分別6歲及1歲的女兒，陳柏宇不自覺地嘴角上揚，說女兒們是其餅印，他即笑言：「女係似爸爸多啲嘅，外形上，只不過係證實佢哋係我啲女，佢哋唔使證明係我老婆啲女吖嘛，係咪？哈哈！
「點都係似我多過似我太太㗎嘞，外形上；但性格上就兩個都似，可能因為佢哋同我哋相處嘅時間好平均，我哋兩個都有份教啲女，所以佢哋就兩個都似。」
過節
一屋女生的陳家，得陳柏宇一名男丁，但他樂在其中，並由衷的表示，每天也有過節的喜悅。
「我唔係特別着重大時大節，但我會為小朋友着重，我覺得儀式感係好嘅，但其實我冇咩儀式感，因為對我嚟講，最重要嘅唔係『儀式』，而係我對嗰件事嘅感受。我對節日冇好大嘅感受，但我對節日可以見到嘅人，就有大啲嘅感受，可以因為喺節日同人相處，開心嘅時間係好嘅。
「不過，我對節日嘅冷淡，都係來自節日，我自己一個人過節，係冇意思嘅，我一個嘅話，就唔會因為嗰日係聖誕節而特別開心；但就算唔係過節，我同我鍾意嘅人過，就日日都係過節啦！」
家中沒有「好人、壞人」的角色扮演，但陳柏宇會嘗試跟女兒們講道理。
「當然我會嚴！有應該要做嘅嘢就應該做，要嚴嘅地方我都會嚴，但我嘅嚴，盡可能唔係因為我嘅情緒而嚴，而係因為嗰件事係應該以呢個態度去做。
「譬如我想女兒唔好做一啲嘢，好似細女鍾意咬人，佢咬到我塊面都損咗，但我覺得鬧佢都冇意思，如果佢畀人鬧都只係喊，因為佢仲未識得分析，點解唔可以咬？有時玩嘅時候咬得，一下子又唔畀咬，小朋友鍾意咬嘢，佢緊張，即係佢好興奮。我覺得佢大個就唔會，大個咗都四圍咬人嘅，係要去精神病院㗎嘞。
「有時睇到一啲父母嘅片，好似好多嘢都對小朋友唔好，或者好多嘢要小朋友做，我就覺得冇咁Black-and-white（黑白分明），係要平衡嘅。」
特別號碼係
訪問當天，是六合彩1.28億巨額獎金開彩前一天，陳柏宇亦如一般香港人，早早買了一個希望。
不是鼓吹賭博，一般人也會定期「捐獻」，為自己打開所謂的發達之門。
「我買親都係嗰6個冧把：3、7、9、10、20、25，呢6個都係特別號碼，因為係我一家四口嘅生日，最慘係買啲號碼過唔到30，所以你從最大嘅號碼開始讀，一有冧把過30，就唔使諗嘞。」
冧把有限制，但陳氏一家四口，齊齊整整出埠享受天倫樂，則不在此限。
「對上一次係去峇里，但我冇乜印象，喺嗰度做咗啲咩⋯⋯喺印尼吖嘛，我記得嘞！過咗去嘅，就成為記憶，而我大部分嘅記憶，都變咗一個大感覺，唔係好記得啲細節。
「不過，我都會睇番啲相嘅，我經常J Abi（6歲大女）細個嘅相，好
好J！而且佢長大咗都係咁Cute，好老積。之前佢同媽咪兩個去日本，佢仲嫌佢媽咪影得唔夠多相。我就同細女喺香港，佢婆婆都會過嚟，3人世界。」
寵女達人陳柏宇笑言：「我經常都會幻想一下，但係冇實際嘅定案，因為太遠嘞，我睇唔到咁遠，又唔覺得𠵱家呢一刻佢哋嘅性格，到佢哋10幾歲嘅時候都唔會變，所以都係Go with the flow。」
人生，即使艱難，六合彩又未到你中，隨遇而安，最好。
延伸內容：陳柏宇個唱回勇表現風騷 親吻細女Audrey閃爆全場
延伸內容：陳柏宇率領黃妍、葉巧琳等闖中大校園 千人合唱〈你瞞我瞞〉High 到爆!
延伸內容：陳柏宇節目《陳伯挑你機》玩體能 保錡、嘉盈等爭奪一萬蚊
《東周網》訪談系列節目《星桄伴我心》2月重磅嘉賓：
即睇：七仙羽被鬧神棍 爆喊剖白被欺凌 : 個個都笑我騎呢！
即睇：林盛斌Bob曾當選「我最討厭藝人」冠軍，被踩是垃圾 正能量反省：我做錯咗咩嘢？
即睇：李珊珊罕談舊愛錢嘉樂 剖白患驚恐症瀕死感覺 : 我會活好呢一生!
即睇：朱慧敏第二胎B仔出咗世啦！分享懷胎湊B心得 收蘋果批做結婚周年禮物 又喊又笑講「愛的宣言」
