發佈時間：18:21 2025-03-01
有「香港電競之父」之稱的鍾培生（Derek），和父親鍾仁偉一向鍾情於法拉利跑車，家中車房長期泊着數輛紅紅黃黃的法拉利超跑。繼2021年換入一輛全新SF90黃色戰車，和812 SUPERFAST紅色跑車後，早前Derek又豪擲$800多萬，買入一架黃色法拉利全新研發的Purosangue超級4門跑車，更是全港頭3位獲配車的VIP買家。
「呢架係法拉利第一架出嘅4門、4座、4驅、4輪轉向嘅超級跑車，而且仲係全香港頭3架。有時約埋兩個靚女一齊出街，都可以坐得好鬆動！」而「4」與「勝」，「黃」和「旺」發音相近，他說：「寄望蛇年無論在原有的電競產業，或拳賽項目，及即將在日本開拓的新商機，所有嘢都『大旺全勝』。」
全港首3架配額
這天，鍾培生駕着法拉利新車Purosangue，尾隨司機駕駛的SF90超跑到赤柱周邊的路面試車，車身耀眼的鮮黃色，加上隆隆的引擎聲，惹來不少途人的注視目光。雖然在山路未能完全發揮到超跑威力，但Derek卻滿意地說：「呢架車揸起來好順，因為重心高，似房車，快得嚟比一般傳統法拉利跑車更易揸。我最鍾意後座嘅逆向式開啟車門，撳吓個掣度門就自動打開，再撳一下就閂番。而後座亦相當寬敞，連同副駕，可以坐3位乘客。」
他稱家中過去曾擁有超過2、30輛法拉利，近年每當有新款推出就換車，因為是品牌的超級VIP，所以每次都有優先購買權，「因為爹哋好鍾意法拉利，佢會定期留意有咩新型號，當見有啱心水嘅新車，就會馬上買入。不過好得意，佢通常只會揀入門版，同一啲中上型號嘅跑車，而頂級型號如ENZO和F50、F60就好少買，爹哋話喺香港揸咁勁嘅車好浪費，對上就買過488同Portofino等型號。」
連續2架新車都係黃色，問他是否其lucky colour？他笑說：「法拉利唔係紅就係黃，不過我鍾意比卡超，所以呢兩部新車用咗黃色。而我亦比較『茅』，買車通常交俾爸爸負責，我只係負責搞車牌，好似P1KACHU、HKESOPRT，仲有我同爹哋個英文名縮寫DC和TC等。」
日本買地起酒店
Derek雖然喜歡法拉利，但平日甚少駕駛愛車外出，他說：「揸得最多係架SF90『P1KACHU』，不過通常一個月先揸一次。我揸車通常只有一個目的，就係由A點去B點，係交通工具，好少去遊車河。當然有靚車揸實開心㗎，啲女仔有靚車接仲開心，不過我鍾意飲酒，去玩去應酬，多數會叫司機接送或者搭的士。」
問他那款車是其dream car，想不到他竟然說是勞斯萊斯，「屋企未曾買過，因為車名係外國人名，驚唔夠霸氣，鎮佢唔住，不過真係我嘅dream car。」
近年Derek不斷拓展業務，除了原有電競產業，又每年籌辦拳賽，推廣拳擊運動。去年他更涉足美容行業，和瑞士美容品牌合作，開拓日本巿場，更找來朝比奈彩做代言人。踏入蛇年，他又有新搞作，將在日本發展地產項目。
「我去年開始喺日本睇地，目標係8-30億円，折合4000萬至1.5億港元嘅地，然後起service apartment。喺港區、涉谷區睇咗超過200幅地，當中揀咗10%有潛力發展地段，點知當我了解當地發展條例，和計劃可建造面積時，這批有質素嘅地段已全數被人買晒。嚟緊會繼續留意，我同自己講，睇中，出手就要快、狠、準！」
延伸內容：桃花破財多是非 鍾培生│麥玲玲
延伸內容：鍾培生搞拳賽丨霍哥同周永恆未上擂台先隻抽
《東周網》訪談系列節目《星桄伴我心》2月重磅嘉賓：
即睇：七仙羽被鬧神棍 爆喊剖白被欺凌 : 個個都笑我騎呢！
即睇：林盛斌Bob曾當選「我最討厭藝人」冠軍，被踩是垃圾 正能量反省：我做錯咗咩嘢？
即睇：李珊珊罕談舊愛錢嘉樂 剖白患驚恐症瀕死感覺 : 我會活好呢一生!
即睇：朱慧敏第二胎B仔出咗世啦！分享懷胎湊B心得 收蘋果批做結婚周年禮物 又喊又笑講「愛的宣言」
