發佈時間：19:21 2026-09-30
日前一宗馬鞍山求助個案中，一位救了75隻貓的義工不勝負荷最終患病入院治療，出院無期，各方義工合力救出這個只有300呎擠逼戶的貓貓，其中17隻患病，朗朗是其中一隻最嚴重的貓，肺炎及眼睛長期潰瘍幾乎盲，目前與重肺炎搏鬥中，希望能捱過這一關，穩定下來才進行眼手術，希望可以挽救僅餘的視力。
動物救援組織「有尾無尾拯救隊」（ARP）日前接獲一名馬鞍山居民求助，指其貓義工弟弟因重病入院治療，出院無期，家中救回來的75隻貓無人照顧，希望義工能接手救援。由於貓數量太多，義工經多日聯絡各方支援，目前救出大部分貓隻，其中17隻患病的最早接走送到診所治療。其中一隻名叫朗朗的情況最嚴重。
呼吸困難 與死神搏鬥
「有尾無尾拯救隊」（ARP）今日在面書發帖交待朗朗的情況：
「我叫朗朗，係前日馬鞍山求助入面嘅其中一隻貓。
唔知由幾時開始，我嘅每一日都係喺痛苦同窒息之中度過。
我嘅眼睛由發炎、流膿，去到而家眼角膜潰瘍、慢慢黐埋一齊……我已有無數個黑夜忍受住呢種椎心刺骨嘅痛楚，只可以慢慢習慣喺模糊同黑暗入面生存。醫生幫我檢查過，可能係先天眼瞼發育異常，令到啲眼睫毛日復一日倒插眼睛，又或者係感染咗病毒，一直冇人幫我醫治，所以隻眼發炎潰爛。
我唔可以好似其他兄弟姊妹咁，舒舒服服咁趴低瞓覺。我只可以日以繼夜咁呆坐喺度，擘大個口抖氣。我自己都唔知點解…..
前兩日，有義工姐姐入嚟屋企，我好開心咁第一時間去門口迎接。我望唔到姐姐係咩樣㗎，但係我好希望姐姐會睇到我，摸下我。我用盡全身嘅力氣，撐起身，將我個頭仔輕輕頂下姐姐隻手。 最後，義工姐姐帶左我去診所見醫生。
前日喺診所，醫生話我病得好重，有嚴重嘅肺炎同呼吸道感染。其實我好攰、好痛，但我真係好想活下去。我唔識講野，所以我好努力食飯，乖乖咁比姑娘打針餵藥，我只係想講你哋唔好揼低我好唔好？我唔想死……
我而家必須要留喺醫院醫好個肺炎，保住小命，先可以再做手術救返我對眼。我應承你哋，我一定會好勇敢、好勇敢咁撐落去……直到我睇到睛朗為止。
—— 渴望看見光明的 朗朗」
ARP緊急呼籲，希望善心人支援，成為朗朗活下去的奇蹟。
「朗朗自己都未放棄，我哋又點可以因為「冇錢」而宣判佢死刑？
接手75隻貓嘅龐大醫療開支，已經令ARP陷入極度嘅困境。
懇請大家，哪怕只係一餐飯嘅錢，一杯咖啡嘅錢，集腋成裘，幫呢個堅強嘅小鬥士度過難關。請大家畀朗朗知道，佢嘅世界，以後都可以好晴朗！」
ARP目前為朗朗緊急籌募醫療貴，善心人可透過以下途徑捐助(捐款時請註明：支持朗朗)
* 轉數快 FPS：130965445
* PayMe：53636623
* 銀行轉帳：796-241024-883 (恆生）
* 戶口名稱：Alliance for Rescues and Preservation Limited
完成捐款後，麻煩 INBOX 入數紙畀我哋，等我哋可以妥善紀錄。
你嘅每一次 Share，每一蚊捐款，都係朗朗呼吸落去嘅希望。求廣傳！😭
慈善牌照號碼 : 91 / 20347
有尾無尾拯救隊有限公司
Alliance for Rescues and Preservation Limited
善款捐助港幣＄100 或以上可獲退稅收據 ，需要收據憑證，請inbox ARP。
要欲進一步了解ARP救援，可瀏覽以下社交專頁
