發佈時間：12:00 2026-09-29
現年41歲的張致恒（Steven），與粉絲區燕雯（雯雯）結婚7年，4年抱4。可惜，兩人婚後欠債纍纍，令關係惡劣，搞到雯雯不停在網上炮轟老公，兼多次大吵大鬧要離婚，夫妻因而被網民封為「離婚界KOL」。
日前，Steven和雯雯接受獨家訪問，他直認欠債逾百萬，並曾到財務公司借錢，期間竟然慘遭對方玩弄，提出即席獻唱〈死性不改〉，便可以減免數千元利息。雖然被玩使他深感難受，但二仔患有自閉症及過度活躍症（ADHD），生活再艱難，仍然要咬實牙關挺下去。現時的Steven洗心革面，腳踏實地做地盤、搬運等，努力搵錢養家，稍後更會重返樂壇，寧可靠自己，也堅拒領綜援，竭力將自己由「廢男」煉成「鐵男」！
堅拒離婚
2019年，張致恒（Steve）與粉絲區燕雯（雯雯）拉埋天窗，婚後4年誕4子，分別是7歲的天寶、6歲的天牧、4歲的天朗及3歲的天樂。可是，一家6口並不快樂，雯雯長期在社交平台放負數臭老公及狂呻要離婚。而Steven則備受「極度財困」與債務風波纏繞，兩公婆各自被嘲諷是「離婚界KOL」和「借錢界KOL」。
日前，兩公婆首度一齊接受本刊和頻道的訪問，大談近年飽受的辛酸。昔日外表俊俏的Steven，隨着歲月和生活逼人，髮鬢和鬍鬚都開始斑白，臉上也多了幾分成熟滄桑。對於近年洗心革面做人，有乜撈乜，收工便回家湊仔，他直說︰「生仔後，都努力改變自己，先有個好將來。呢7年，我係有做錯嘅時候，但都一直有諗點做個好爸爸、好丈夫，但夫妻嘅磨合，真係需要時間，否則好難行落去。（太太經常放負批評？）係攰嘅，當溝通唔到，有冇諗點解唔一早離婚？但小朋友已經出世，就諗點改變去迎合個家庭。」至於成長於單親家庭的雯雯，因懷孕而結婚，但婚後捉襟見肘，有怨無路訴，才在網上發洩。對於是否想離婚？她不諱言經常都想，但無奈「冇能力帶走4個，惟有頂多一日得一日。」
相反，Steven體諒雯雯連續生4個兼要打理屋企，還因自己而承受公眾壓力，所以「鬧不還口」，並斬釘截鐵的說︰「離婚一定唔會講，結得婚，就做好丈夫責任。有時係想放棄，好多次向耶穌祈禱帶我走，我唔想煩，要維持一個家庭係好攰。但做咗老竇，一家之主，原來係高難度。以前我鍾意飲酒，但雯雯最憎酒氣，我𠵱家連飲酒放鬆自己都唔敢。真係好多次想去自殺，但諗起小朋友，就放棄呢個念頭。」
跪地狂喊
不死就得求生，Steven便擔起養家的重任，可惜之前一腳踏五船的負面形象，令星途大受影響，他只得放下「藝人光環」，靠出賣勞力搵錢，但收入有限，難以應付屋租、日常生活等，每個月生活費至少3萬元，長期入不放敷支。雯雯坦言︰「佢一句冇錢，車費都冇，啲仔換咗校服都坐晒喺度，我真係崩潰！」
最惡劣的是，窮到4個兒子都冇飯開，Steven只得硬着頭皮向身邊人借錢，但長貧難顧，借無可借，惟有走到旺角向財務公司借。豈料竟慘遭奚落，他憶述：「第一次上財務公司，人哋一開門︰『嘩！大明星嚟借錢？』但最唔開心係，佢叫我唱〈死性不改〉，免你幾千蚊（利息）啦！被人玩嘅感受，真係好難受。事後，我冇唱但有借，我亦有去過其他財務公司，卻遭拒絕，徬徨到跪埋一邊喊，真係唔知點算？」
欠債百萬
因財困消息通天，就連租屋都屢遇麻煩，更被地產公司列入黑名單，他說︰「試過租到屋，但後來業主知道租畀我，就向中介要求我哋漏夜搬走。當時，我喺內地登台，最終佢哋凌晨3、4點去咗我阿爸觀塘嗰度，我就清早call定貨車搬嘢走⋯⋯亦有遇過唔友善嘅鄰居，叫一大班人夜晚嚟搵我，我𠵱家租屋，好多時都要一畀就畀半年租金。」
逆境多年，Steven欠的債由幾百到幾十萬皆有，總共逾百萬元，他自言每一個名、每一條數，都清楚記下，「感激幫過我嘅人，先有我呢條命。我成日都諗搵錢返嚟，好想有日喺IG講還晒錢。我亦好真心多謝我老婆，7年生咗4個小朋友，仲發生咁多嘅事。佢想買咩、食咩都畀佢。」不過，所謂的食，雯雯只是想食一碗「譚仔」米線而已。
由於家庭開支大，Steven已有5年冇添衫褲鞋襪，大部分花費都用在四個兒子的身上，一家人大多留在家中，最多是攞紙皮做玩具、睇Youtube跳舞耍樂，冇去過主題樂園，難得出街食飯，有剩餸必會打包，慳得就慳！他表示︰「既然生咗佢哋出嚟，唔好話畀資源，至少令佢哋快高長大，健康成長。我曾經同大仔講Daddy做錯事，令到媽咪好嬲，Daddy𠵱家好窮，買唔到好多嘢畀你，希望你大個後，我可以畀番多啲嘢你。佢都生性嘅，見到同學有個Labubu，同我講想買一隻，但我話幾百蚊可以買到幾罐奶粉，佢就答︰『唔緊要啦，我自己畫。』希望佢哋將來會原諒我。」
夫妻分房
對於未來，Steven期望重回樂壇打拼。相反，雯雯則覺得娛樂圈工作不踏實，寧願攞綜援：「佢講一套，做一套，講到好完美。我唔想佢做呢行，因為唔保證下一月係點，我唔想周圍求人，但綜援每個月穩定。加上，我一個人湊唔到四個，𠵱家嘅情況，大仔有情緒問題，比較焦慮同敏感；二仔有自閉同過度活躍症，唔識表達，現時仲要飲奶、用尿片；三仔係最穩定，四仔稍後都要評估，佢哋幾個有時仲會打交。為咗方便照顧啲仔，我哋𠵱家分房瞓，各自帶兩個。我𠵱家冇咩想法，只想每日湊好佢哋。」
Steven卻不想行這一步：「（攞綜援）只會依賴，之後就唔可以出去做嘢。我唔係發明星夢，真係想喺呢個圈搵錢，呢個係我老本行，我唔使重新適應，當然一定要減個身形先，企上台唱歌，就可以搵錢。」現正從底谷爬上來的Steven，表示絕不會再跌下去，並感恩近來獲貴人支持，稍後亦會出歌及登台。人誰無錯，大家會否畀機會佢呢？
延伸內容 : 張致恒現身《玄戰》認感情出現問題 陳定幫師傅以「一樣嘢」比喻命格
延伸內容 : 張致恒談到二仔病情難掩心酸 老婆雯雯再放負 恐要「妻離子散」
