發佈時間：17:34 2026-06-15
遇見就是緣份。一位瑜伽導師日前跑步時在博愛醫院附近遇見兩隻年幼貓B，當時牠們幾乎衝出馬路，於是快手救起帶回家，之後帶往獸醫診所檢查，發現兩個貓B皆左眼失明。診所留下貓B幫牠們尋家，4日後的今天(6月15日)，救命恩人變身愛心家長，瑜伽導師決定收編兩貓咪，給牠們一個永久的家。
跑步偶遇 立即救起
瑜伽導師Ann將這段奇妙的緣份記錄下來，於面書發布。
6月8日偶遇篇：「今朝早練跑，我喺朗河路近博愛醫院附近，執到兩隻目測一個月大嘅幼貓。
佢哋全身有啲濕，當時佢哋差唔多衝出馬路，就俾我衝埋去抱起咗。
我巡過幾次花槽，同埋附近地盤見唔到再多一隻貓我先離開。
喺手忙腳亂之下，我將佢哋帶咗返屋企先。
救咗先，一陣間好大雨，有咩再見步行步。
返到屋企我馬上約見醫生，帶佢哋去診所檢查。
去到診所，醫生話佢哋兩個有嚴重嘅眼疾，有機會各自有一隻眼未必保得住。
基於我係毫無照顧幼貓嘅經驗，醫生建議我擺低喺診所，由佢哋先照顧再交俾貓義工照顧，希望佢哋隻眼保得住。
坦白講，忙咗一大朝早，我到而家心情都有啲忐忑，因為覺得救得佢哋，Part of我係有責任要照顧好佢。
人皆有之惻隱。但係真係無能為力，夾硬嚟反而係害咗佢，佢兩個仲要得一個月大，而家佢兩個安全，希望佢哋好生好運。
喺呢度我要多謝今朝幫忙過我解答問題嘅學生朋友，另外我要多謝我一位好朋友，佢今朝喺百忙中，幫貓咪撲到一罐幼貓奶粉，呢個社區仲係好有愛，一切都是緣份，平安喜樂就好，感恩遇上。」
救貓兩日後，即6月10日，診所在面書專頁為這兩隻左眼失明貓咪尋家，黑白色的是女仔 ，虎紋的男仔。經獸醫診斷後，證實兩隻小貓左眼失明，其他沒有問題，健康一切正常，估計出生日期為五月頭，個性文靜十分乖巧。
今日宣布領養喜訊
瑜伽導師Ann自救貓後，日夜掛念牠們。經過連日來細心考量後，終決定領養這對失去左眼的小可憐，由救命恩人變成家長。今日早上在面書發表喜訊：
「我正式宣布收篇，佢哋而家有名有姓叫『陳跑跑』丶『陳步步』。
因為係我跑步時執嘅。
佢哋不完美，各自有一隻眼睛看不見東西。經過多番考量，我都係決定領養佢哋。
對於我嚟講只係一個舉動，但就改變咗佢哋一生，值得。
喺度多謝晒各位幫助過我嘅學生朋友，佢哋教我點樣育兒湊B，另外照顧佢哋渡過危險期嘅醫護人員亦功不可沒。
人間有愛，希望佢哋健康快樂成長。
現在，下課後我多了重身份～新手貓奴，請多多指教」
祝福兩貓B及新手貓奴Ann。
圖片：Ann Chan - Yoga Now 知瑜之樂@fb
