發佈時間：18:05 2025-12-12
一人動物救援組織「小玉谷」不停救貓孭下沉重醫療費，不過最高興的都是貓貓治療後康復，可以為牠們尋家。其中一隻偽英短面罩貓B生殖器至肛門位置嚴重潰瀾，一度性命垂危，需要進行尿道重建手術，康復路長，但小戰士經清創及控創感染治療後奇蹟康復，能自行排尿及挑便，無須動手術，還整天在籠內彈彈十分活潑，現在可以開放尋家，並帶領小玉谷內多隻3至4個月幼貓一齊登場，希望徵到長期飯票。
偽英短是11月中在唐公嶺垃圾站被發現呆坐在草叢邊，牠的屁股及生殖器附近出現潰爛，且傳出臭味，於是立即帶貓貓到獸醫診所求醫，並求助於小玉谷。
其後小玉谷創辦人馨瑩帶牠到NPV診所進行詳細檢查，由於偽英短獲救時周身屎，所以改名為Poo poo豬。獸醫檢查後發現牠整個生殖器已經爛溶溶，膀胱有一大泡尿，而傷口潰爛的程度嚴重，需接受尿道重建手術。
JJ不懂縮回 流浪時感染潰爛
由於貓貓的生殖器附近皮膚嚴重發炎及潰爛，未必能夠接受尿道重建手術。獸醫為牠先做導尿管手術，以舒緩「谷尿」狀態。
獸醫在進行導尿管手術時，發現貓貓的尿道並沒有阻塞，輕按已可放尿。同時亦發現Poo poo豬的盆骨畸形，懷疑是神經系統問題，令牠不能自行排尿。獸醫之後為Poo poo豬照MRI，以確認神經系統是否有問題，方可作出治療方向。
慶幸在等候影像報告期間，Poo poo豬能自己進食，胃口不錯，又能自行排尿排便。
Poo poo豬於11月26日出院。獸醫指Poo poo豬的生殖器JJ可能因為不能自動縮回，故在街流浪時就受傷感染而潰爛。雖然傷口仍然腫，不過已經比當初好好多，在可以自行排洩前提下，獸醫認為暫無須做手術。現時Poo poo豬一切正常，一個小球已經可以玩一日，十分活潑，可以帶領其他幼貓們一齊徵父母啦。
多位幼貓、成貓佳麗尋家
以下是各貓貓資料，有興趣的可聯絡小玉谷：
第一個 poo poo豬：
唐公嶺爛JJ小朋友：仔、四個幾月大
其實係要覆診多兩次既，不過佢情況穩定，可以自己食飲痾大小都冇問題，就尋下家先。
第二位係EE小朋友：囡、兩個半月大
最初喺街流浪時感冒菌上眼，令到右眼球發大壞死，被好心人執起求助
住院一排之後隻爛眼開始萎縮，評估應該唔使做眼球摘除手術，所以就接回家照顧啦～又可以尋家了
第三個係旗仔小姐友：仔、4個半月大
當初以為係俾狗咬搞到癱癱地，但檢查又見唔到有外傷牙洞，所以又估會唔會係撞車飛埋一邊再咁啱俾狗擔起就俾人發現？
er..anyway佢已經好返啦～好靚既西瓜紋仔仔呀，快啲帶返屋企啦！
第四個係矇豬眼BB：仔、兩個半月
接手其他義工既求助，話佢本來係坪輋入面俾人放養既，貓媽失蹤後佢冇人理差啲死😔本來兩隻眼都發炎腫脹，接手時左眼已經救唔返，右眼好彩最後救得返，所以搵家啦～好鬼活潑可愛嗲嗲豬架！
第五粒小三花：囡、7星期大
寒冷12度天時 坪洋入面既好心人聽到佢慘叫左好耐，原來佢跌左落廢屋污水氹出唔返來，好彩叫得大聲，救起佢後就搵我求助啦～
好靚既一粒囡，冇病冇痛嗲人精神，正呀！
第六位係禾禾小朋友：仔、6個月大
想當日又係打8波風既日子，呢條友仔喺禾合石既山坡邊慘叫，俾路過既街坊聽到再辛苦救起求助，以為佢冇特別，原來尾龍骨斷左😅 不過斷到唔講唔知咁既款，全件食痾玩瞓一切正常，所以都試下幫佢搵家啦～
第七粒藍妹B：囡、4個半月大
呢粒係藍貓case其中一隻，左邊面懷疑受過傷，左眼球同眼簾有啲粘連，不過冇影響視力，可以之後絕育時做埋分割手術。性格頂級嗲，冇難度。
後加第八及第九佳麗，約兩個月大黑貓B兩隻，兩個肚仔都有白色❤️，要一對領養喔🙏🏻
另有多位成貓佳麗徵父母，如有合眼緣的請cap圖聯絡小玉谷。
