發佈時間：17:23 2025-10-04
早前超級颱風樺加沙襲港，不少藝人加入暫託行列，讓狗狗在家中安然渡過，然而不少暫託失守，導演彭秀慧今天在社交網絡發佈文章，宣告暫託失敗，正式領養颱風期間暫託的「蕭公子」。
彭秀慧今天（10月4日）在社交網站IG及Threads帖文交代自己失守的原因：
「一開始就注定失敗⋯⋯⋯•
我確實係無諗過
我會養一隻『啡色唐狗』我鍾意唐狗呀
只係一直以為會係黑色白色⋯.
仲有我一直唔諗住咁快再養多一隻又一直諗住再養會係一隻金毛尋回犬
咁呢個颱風嘅出現係吹冧咗我既有嘅想法
證明緣份緊要過一切」
蕭公子+芳芳+蕭芳芳
「講下呢個緣份
由洪太接佢返黎 佢係的確一入屋就表現良好
本來都無諗咁多
直到第一晚我朋友望住兩隻狗狗 佢話『嘩！佢兩個加埋咪蕭芳芳？』我就心諗『死嘞。唔係掛....』因為！
當日我幫芳芳改名
正正取自『蕭芳芳』-希望佢好似蕭芳芳咁優雅
點知芳芳嘅性格係『慌慌』
所以我就成日同佢講『你係咪唔記得自己係蕭芳芳呀』
咁呢位『蕭公子』出現— 就好似填補咗啲嘢咁！
自從暫托開始，芳芳唔同咗
為咗證明自己嘅存在同價值
芳芳主動咗 黐我多咗 笑容多咗
雖然呢幾日蕭公子慢慢開始露出真面目
例如搶食 同埋會蝦芳芳
但我相信會搞得掂嘅
始終 佢從來都係『宿一宵』對屋企人邊有概念？
所以我投降了
呢個從一開始就注定嘅失敗
我認命了
呢舖真係
『引唐入室』
#對上一次暫託係玻兒
#知我咩料啦」
來自洪家棣動物村
蕭公子來自「老有所依動物村-洪家棣」，彭秀慧查詢幫忙暫託時，義工介紹了狗場當時剩下唐狗「宵公子」給Karen，並指「宵公子」是出名的野孩子，以前習慣被放養，非常活潑，間中會流口水，有時又撩事鬥非，同其他狗仔「口角」，有養狗經驗可能會好一點，不過其實囝囝好乖好善良，如果可以借宿幾宵就好了。
彭秀慧帶同家中的原居民芳芳一同前往狗場探望，結果芳芳和宵公子合得來，於是帶了牠回家暫託。期間彭有朋友聚會，宵公子竟然表現出待客之道，乖乖陪玩，任由客人將紙牌放在頭上。當時彭導的帖文一出，大家都讚彭導善心之餘，亦祝福她暫託失敗！結果颱風過後，彭導不捨得將宵公子送回狗場，直接收編，並正式正名為「蕭公子」，與原居民芳芳湊成「蕭芳芳」。
多謝彭導，祝福你們一家！
立即追蹤《東周刊》全新WhatsApp頻道，緊貼全城熱話、突發猛料、獨家消息！
https://bit.ly/4gnvlZf
