發佈時間：18:04 2025-07-12
MOISELLE太子爺陳柏熹（Harris）前陣子在時尚界銷聲匿跡，坊間傳言四起，有傳他假裝發生車禍，實則整容失敗，又有傳他因生意而避走云云。「我咁嘅樣，唔避都儍啦！」眼前的他，鼻子外觀大變，原來噩夢始於前年他在深圳撞車，拖了年半才去做重建手術。期間他變得「排外」，搬往內地避居。「避囉！撞完車後不停流鼻血，覺得好正常，如果嗰時扚起心肝睇醫生，可能唔使搞咁耐。我突然離開香港，外界好多猜測，有朋友加鹽加醋，話我好似走難走咗去，所以𠵱家我可以見人，即刻行出嚟。」消失了的鼻尖，正慢慢康復重現，加油！
撞車導致毁容
陳柏熹心臟強大，訪問期間像訴說別人的故事，不時哈哈大笑，用「毁容」、「怪物」、「醫生當我博物館」來形容自己。
他大方解釋「失蹤」多時的原因，「前年8、9月返內地做嘢，喺深圳落私家車趕去搭高鐵時，俾一架電動車撞低，表面冇傷痕，淨係覺得好似撞到玻璃門咁好痛、好暈，但我仲爬到起身，趕到去搭高鐵喎！之後個鼻腫起，到10月、11月，無啦啦開始凹落去。食團年飯時除低口罩，爸媽見到話：『嘩！你個鼻咁，好去睇醫生喎！』我就話搵到啲唔使做手術嘅方法試，先知原來有啲嘢碎咗唔會生返，同埋積咗好多黑血喺入面。」
回想起來，他指鼻子消腫兩個月後，每日都在萎縮，但他輕視，直至去年3月在尖沙咀出席品牌活動。
「嗰日一起身，成個鼻扯高咗，但應承咗咪照去，點知啲人覺得好礙眼，引來報道同討論。嗰時內地有戲要拍，客串嘅，媽咪就話我要放低啲嘢，唔可以再拖。」
陳柏熹在媽媽和朋友介紹下，不停遍尋名醫足足4個月，直至今年2月，醫生發出最後通牒，指他的鼻子萎縮多半年便無法做手術，他才下定決心。
「出入咗醫院5次，最大嗰次手術係今年5月19日，一次過做肋骨、口腔入面、鼻竇同鼻軟骨。3個醫生負責，由6個鐘變咗做10個鐘。第二朝起身，我望住醫院張床，望住自己，發現原來呢啲叫開心，可能過去年半，我不斷催眠自己冇嘢。」
手術後3日，他便出院，孖國內朋友坐纜車周圍玩，「結果笑爆咗傷口，要再做小手術，哈哈！」
家人感情更好
突然飛來橫禍，陳柏熹並不好受，「每次去中環診所覆診，都驚撞到人，會有好多同情嘅眼光，好多人會話：『做乜仲唔整？你好慘呀！』所以我選擇搬離香港，因為如果喺一個好熟悉，或者好多朋友關心嘅環境下，心理上未必承受到人哋望住我怪樣時嘅眼光。
「同埋我好驚見到小朋友，佢哋好直接，記得有次喺深圳飲下午茶，有個小朋友望住我，佢爸爸叫佢唔好望，嗰下我會覺得係咪唔應該出街呢？另一次搭𨋢，有個小朋友又係咁，第一個『傷』係佢叫我叔叔，第二個『傷』係佢問：『你為甚麼沒有鼻子？』我唯有解釋佢聽我撞車，叫佢過馬路要小心。」
這一年半，對他來說非常漫長，他坦言好情緒化，「記得第一次做完手術麻醉藥過後，我喊住嗌要食叉燒包，真係匪夷所思！又試過爆喊打俾阿媽，同佢講：『你成日叫我約見醫生，搞到我錯過咗黃金時間，要等多半年，做多怪物半年呀！』」
家人永遠是最強後盾，陳柏熹形容發生車禍後，跟屋企人的關係是史無前例的好。「有次食飯，阿媽一坐低就祈禱：『神啊，求你賜返個樣俾我個仔啦！』我心諗：『係咪我影響你食慾呀？哈！原來佢咁緊張我嘅。而阿爸面對出面嘅流言蜚語，就幫我『斬斬殺殺』，覺得如果車禍衍生出傳聞話我講大話，就要攞證據，否則出律師信。當然好多人係冇真憑實據，要收口。」
超盈幫手平反
錦上添花易，雪中送炭難。陳柏熹受傷後，嘗盡人情冷暖，有段時間對人非常敏感，當熟悉了深圳的環境後，便搬到杭州。
「嗰時最難受嘅係我突然離開香港，身邊開始有朋友明明知道車禍係真，但又會話假，引起外界好多揣測，朋友又唔幫我平反，我咪直接block加delete佢哋。」
友情面臨大考驗，他說：「第一個感到震驚嘅係何超盈，佢聽到謠言，逐個打電話去鬧人，好友羅君兒（Bossini創辦人羅定邦的孫女）又係。啲人話我假撞車，真整容，又話我生意失敗，好多唔同講法，好正㗎！我一早起身個樣就係咁，我都唔想。」
陳柏熹和東亞銀行後人李家彤，4年前攜手創立時裝品牌AUTOPILOT，對於有傳二人不和，他說：「點解有呢個傳聞？我真係唔知，我聽到6、7個版本。嗰時要揀自己事業、屋企事業，或健康，我邊有咁多時間理會？識咗十幾年，無奈㗎！我哋冇當面對質過，我冇呢個力氣，亦唔重要。個brand好好，安踏集團簽咗我哋做設計，所以我成日要跑大陸。唔知我哋係咪好多嘢兼顧唔到，或者有啲唔開心，我唔知。」
他後來辭退了品牌的職務，但品牌的持有權仍在他手上，「我好記得爸爸話，如果我真係有任何嘢做錯，佢會第一個出嚟公開鬧我，未來我會專注打理屋企間公司。」忙還忙，身體最緊要，今個月底和9月他會再做手術，預祝成功。
《東周網》訪談系列節目《星桄伴我心》7月重磅嘉賓：
即睇：馬國明揭媽媽與張國榮秘密關係 認扮過曱甴陪襯黃子華 爆2千個短訊追求老婆湯洛雯 激罕示愛：希望下一世都一齊
