無綫節目《東張西望》於周日（27日）報道苦主吳小姐的母親離世不久，吳小姐的73歲老父竟帶細他28歲的「小三」入宮同居赤柱大屋。和吳爸爸一直同住的吳小姐反對，吳爸爸為了要她搬走，提出要她每月支付20萬元租金，並拒絕向她歸還早年借給他的600萬元！節目播出後即引起網民熱話，吳爸爸被指為「何伯2.0」及「富貴版何伯」，並支持吳小姐告上法庭取回600萬！

相關閱讀：東張西望丨亡妻屍骨未寒73歲老翁迫女兒「7街瞓」？帶細28年小三入宮住赤柱大屋　女兒哭訴：「點解要迫到我咁？」

延伸閱讀：揭Fendi披肩女真身！有米學霸狂晒水着相　揸百萬波子當Hermes係書包！

《東張西望》於周一（28日）繼續跟進，吳小姐指吳爸爸常指責她想趁他未死前分身家：「我真係唔明，點解要為外面一個女人，搞到成頭家散晒。我唔係攞佢啲錢，只係想攞返自己個啲。」主持人林映輝在電話訪問吳父，他說：成日話我有另一個女人！阿媽死咗，我有個女人，就話個女人想吞我啲錢，完全唔係㗎！呢個女人，我識佢都唔係咁短時間，十年八載，但係從來都冇搞過我屋企，但係太太死咗之後，梗係要搵個伴啦，大佬係咪先？」

吳父指和「小三」是做生意時認識：「佢係做股票，我以前幫襯佢咁耐，一齊做生意，做股票，幫我買賣。嗱！一個男人做生意，一個女仔好感嘅話，唔出奇㗎嘛。我夜晚都喺我自己屋企，係咪？我都冇去同佢一齊住，佢仰慕我做生意都唔定，我有好多女朋友㗎嘛。」

吳父聲稱和小三搞離婚

主持人林映輝直問吳父，其太太生前是否知道該名「小三」的存在，吳父說竟然又指已和「小三」結婚又離婚：「我唔知老婆知唔知，應該唔知㗎，佢知道我好多女仔，做生意都有女人㗎啦，我有去夜總會去花弗都有㗎嘛。我太太走咗啦，我要搵個伴，仲有啲身家，將來都可以安安穩穩，七十幾歲，我十年八載我Bye Bye嘅話，我都叫做舒舒服服。到後尾我同佢（小三）結婚，就係因為我老婆過身，咁我個女咪反對囉！好多時係夫妻兩個人嘅嘢，仔女根本唔清楚，佢要加鹽加醋，我都唔知點樣搞。佢唔係我老婆，係我個女嚟㗎。」

對於吳小姐指吳父侵吞亡妻遺產，吳父一口否認，指亡妻的遺產分配，女兒及兒子分別分得12%，全都給了女兒。他更希望透過節目跟女兒說：「而家你老竇搞緊離婚手續㗎啦，因為佢（女兒）唔鍾意，但係我都冇錢，個女人我叫佢走添呀，唔好跟我啦。問題係，我個女肯唔肯相信。」

女兒質疑扮破產

期間吳小姐和攝製隊踩上門到吳父的公司，但吳父不在，最後透過電話對質。電話中吳小姐提出要取回600萬，但吳父稱：「我邊有錢？我要破產。」吳小姐反駁指見他的戶口月結單中，去年有逾1,600萬的款項存入，吳父直指：「你亂噏啦！」

「你明明有錢，你又話要破產！statement冇假喎！一開始阿媽死咗之後，你開始不停講大話，媽咪間屋同遺產你攞咗，跟住又為個女人迫我哋搬，又出律師信迫我哋搬，突然又話冇錢！你要我搬，你都要畀返啲錢我先得㗎！我仲有兩個女要養，唔理我哋生死！你係咪將啲錢搬咗去外國戶口、然後喺香港申請破產、呃政府，咁就唔使還錢？」吳小姐說。

吳父說現在進行破產呈請外，又稱女兒指他性情大變及對外孫女不好等指控全是「一面之詞」，對於女兒急需取回600萬元，吳先生表示自己冇錢，並否認借女兒600萬，他解釋只是向女兒當持牌人的財務公司借。吳父說：「我公司同層樓被銀行攞晒，我所有嘢都冇，佢（吳小姐）都唔信。而家會計師同我check數，已經搞咗成半年。我冇借佢（600萬），係當係投資財務公司（借），間公司係佢做老闆，就攞返嗰10%，通過我呢度一齊夾咗5,000幾萬落去，佢扔咗500萬落去，一次過就畀息口我，我就計返畀佢，其實全部都係公司㗎。我點會問佢借錢？」

女兒：冇良心嘅戲精

吳小姐聽後十分激動，直指吳父是「戲精」，吳父說：「咩戲精呀？你唔好亂嗡。我養咗你40幾年，你咁樣搞我？」吳小姐直指吳父冇良心，又指他那名「小三」根本非剛認識，很多人一早見過：「你周圍講大話，你好意思搵親戚鄰居叫我搬，個個都唔想幫你，個個睇見你都翻白眼，個個都睇唔過眼你點對媽咪，喺出面滾！你仲好意思講呢嘟？我真係覺得，你呢個咁嘅老竇，真係越嚟越核突。」

最後對於吳父指600萬元是向吳小姐持有的財務公司借，吳小姐反駁：「唔合理，間公司係我，我要借錢畀公司嘅話，我係咪直接存入公司戶口？點解我會將啲錢借咗入去佢（吳父）戶口？再勞師動眾，再由佢戶口轉入公司戶口？就係因為由頭到尾我唔係借畀公司，係借畀佢！佢冇句真話，做錯咗嘅嘢佢完全避，一句唔提！我對佢已經心死，我冇辦法﹐可能要搵朋友借錢，要搵地方搬，好迷惘，暫時唔知點。」