當全城同賀港隊在巴黎奧運奪佳績時，別忘記香港還有很多青少年為了向夢想進發，投放無數努力及汗水！香港首隊少兒街舞團FUNKY HEROES，為香港舞者親自寫下既振奮又鼓舞的一頁，在《World Of Dance》國際總決賽躋身五強！

位列日本美國中國之前

由九位青少年組成、電影《狂舞派》演員「奶茶」劉敬雯擔任教練的本地街舞青少隊伍FUNKY HEROES，於7月底遠赴美國洛杉磯參加世界舞蹈大賽《World Of Dance》國際總決賽2024，躋身青少年組的TOP 5，位列日本、美國及中國等世界級強隊之前，並於成年組青少年組混合賽的最終決賽中勇奪TOP 10！

《World Of Dance》世界舞蹈大賽是全球最大的舞蹈巡迴賽，自2008年初創以來吸引逾千個來自世界各地的舞蹈團體參加，《World Of Dance》知名度與認受性堪稱「舞蹈界奧運」。是次赴美參賽，是「奶茶」劉敬雯及FUNKY HEROES多年來的夢想，他們更是整個比賽中唯一一隊的純街舞團，可見其實力非凡。

FUNKY HEROES是2015年成軍的香港首隊少兒街舞團，專門跳街舞Locking，創辦人兼教練是資深Locking舞者奶茶劉敬雯。團隊於本港的舞蹈比賽，早已奪得超過20場的冠軍，亦曾於2019及2023年贏得《World of Dance》香港決賽青少年組冠軍。

奶茶曾自責不夠好

劉敬雯笑言替FUNKY HEROES排舞期間，曾非常擔心自己排的舞步不夠好：「因為排舞佔一半以上嘅分，真係好擔心我會拖累佢哋，試過喺男朋友面前爆喊，不過原來盡力做就得㗎啦，今次入到五強，已經好好。希望將來有更多隊伍能夠參與國際賽，因為香港舞者、年青人甚至小朋友，真係做得到！」

看着FUNKY HEROES成長的劉敬雯，對於能成為世界青少年舞團的TOP 5，她既感動又感觸：「我哋真係用街舞打入《World Of Dance》！其他地區每隊有成20個人，我哋係9個人咋，真係好唔容易，我覺得佢哋同我自己都好叻，哈哈！」

為了比賽，FUNKY HEROES的九位團員在半年內進行密集式訓練，同時亦要兼顧學業，劉敬雯說：「撞正考試期，有啲團員要考呈分試、有啲團員讀中三要揀科，所以佢哋自己都好大壓力、好緊張。但係大家嚟到練舞，就會見返佢哋眼中嗰團火，講真，我自己好辛苦嗰陣，都係諗返呢啲畫面去繼續做。」

跳到嘔！

九位團員從未缺席訓練，展現的是讓人鼓舞的決心與毅力，劉敬雯指團員「有人跳到嘔」、「有人跌倒」：「有幾個女仔比較遲入團，為咗追返啲時間，要不斷咁苦練一個轉身動作，冇軟墊都照練，中途會係咁撻落地，撻完吸啖氣，忟一忟又再做，我自己睇到呢啲畫面係眼濕濕嘅，佢哋嗰份堅毅同埋好想做到件事嗰團火，係令我好動容。我都會問自己，14、5歲嗰陣有冇咁硬淨呢？」

錢，永遠是最現實的問題。劉敬雯直言由於要自費到美國比賽，對部份來自基層家庭的團員，的確有壓力：「係困難㗎，唔係每個家庭都負擔到，所以都要想盡辦法，睇吓點樣呢度減啲、嗰度減啲，用咗好多方法先成到事。」

劉敬雯作為教練，經常被FUNKY HEROES團員間的愛所感動：「佢哋真係感情好好，唔係跳完就講拜拜嗰啲，係會互相扶持。自問呢個年紀嗰陣都唔係好多朋友，見到佢哋覺得自己細個做唔到嘅嘢，真係喺佢哋身上實現咗。」

感謝Lokman支持

劉敬雯更坦言曾經覺得電影《狂舞派》的宣傳金句「為咗夢想，你可以去到幾盡？」好鬼老套：「但係見到佢哋咁努力去追呢個美國比賽夢，令到我都有返團火。雖然我已經好多傷患，唔可以再比賽，但係我會用自己嘅十成功力推佢哋上世界舞台！今日，我哋做到啦！入到TOP5大家都嚎哭，雖然有人會覺得五強啫，又唔係攞第一，但係中間真係好不容易，個個都係喺香港高壓環境下成長，真係好叻！我都會繼續將呢個『狂舞』精神傳畀佢哋！」

劉敬雯特別感謝男朋友的支持，以及好友兼Mirror成員Lokman楊樂文的打氣：「之前FUNKY HEROES同佢拍咗《如果電話亭》個MV，我已經好多謝佢，讓呢班小朋友得到呢個咁好嘅經驗，今次Lokman開緊工都拍咗條片幫我哋打氣，真係好感激佢！」