發佈時間：16:55 2024-08-15
巴士車長向來是以中年男性居多，惟最近網上瘋傳一張「九巴小背心」的照片，令網民議論紛紛！有網民在討論區連登上載照片及留言：「居然有吊帶妹豬揸九巴」，相中可見一名長髮飄飄、身穿黑色吊帶小背心的年輕女生正在駕駛巴士，車長制服則放在椅背。
九巴清泉
「九巴小背心」一出，大批網民紛紛驚訝這道「九巴清泉」，仙氣爆燈，更封該女車長為「九巴仙氣女車長」：「邊架巴士？一定要坐爆！」、「九巴應該大量聘請呢類車長！」、「巴士女漢子」、「竟然有後生女肯揸巴士，奇！」也有網民質疑該女車長為何在工作期間未有穿制服。九巴回覆指該名車長用膳後返回車廠，駕駛巴士前往巴士總站，準備開出下一班次，期間未有穿回車長制服，當時巴士上沒有乘客，之後該名車長到總站準備開出班次前，已穿回整齊制服；九巴已提醒該名車長在任何情況下駕駛本公司巴士，即使車上沒有乘客，亦必須穿著整齊制服。
IG Followers爆升
都說不能少看網民的能力，未幾該位年輕女車長即被「起底」！該名女車長是負責57M來往屯門及荔景的路線，而其Instagram帳號被曝光，發現自稱為「魔子MoreMore」的她除了是車長外，更是打機直播主，她在IG自稱為「電動遊戲影片創作者」，而IG Followers已有2萬多，現在躍升超過3萬8千。在IG中除了見「魔子」分享養貓、cosplay等照片外，更分享車房日常。原來其父是經營車房，她不單常在車房出現，更懂得修理汽車，勁！看其IG，明顯她是非一般嬌滴滴或「公主病」的港女，尤其近日爆紅變為全城談論的人物，更突顯其我行我素的烈女型爆性格！
>>>按圖睇更多九巴仙氣女車長靚相<<<
九巴仙氣女車長親回
自稱為「魔子MoreMore」的九巴女車長，對於自己突然變為網民熱話，完全未有感到飄飄然，初時曾出post稱發燒生病，其Benz座駕內籠亦因而曝光，之後更連環發文：「得喇得喇！威啦！咁小事都可以出新聞，咪又係人一個！有咩好講？」、「好痴線啊！無啦啦俾啲傳媒套上莫須有罪， 搵餐飯仔食啫！唔知以為我揸緊客機！r（𢲷）哂頭！再重申一次！我唔靚女唔仙 ，普通人一個，俾條生路嚟行！」
遇上hater，是必然之事。九巴仙氣女車長「魔子」被部份網民惡意攻擊，包括批評她的樣貎及指她「扮病」晒Benz。「魔子」完全無懼haters的負評，更在IG Story公開對方的留言：「X！原來咁X樣衰，唔怪得知要咁嘅角度影你啦！好恐怖你個樣。病咗大晒？想扮病博同情？唔好成日po埋晒啲『借啲以（意）晒命』嘅相啦！夠姜（薑）你咪show埋你買Benz嘅證據畀我哋睇！」
「魔子」隨即晒Benz車匙反擊：「我都未見過人Benz都買唔起，發窮惡走嚟X我！你邊隻眼見到我自認靚女呀？瞓醒未呀？夠膽唔好開假ac鬧啦！」之後又再出po啜核回應：「咁厭人富貴厭人貧，努力返工，返多幾份咪有囉！嘥時間做鍵盤戰士，增值下自己好過啦！過馬路唔好衝燈啊！」
>>>按圖即睇九巴仙氣女車長回應<<<
