發佈時間：17:40 2024-06-27
徐子淇「御用化妝師」Gary Chung，為了工作經常出trip，又要到郊外拍嘢，有時天未光就要出去化妝，所以偶然都會遇到「污糟嘢」。但他有一個簡易「去污」（驅邪）方法，就是用天然硫磺梘沖涼、抹地，再切粒放屋企門邊和陰暗角落。另有高人介紹他用艾油，他稱到酒店後於床頭放杯水滴兩滴，擔保冇「朋友」來騷擾你！
天未光搭𨋢遇怪事
經常要出外工作的Gary，有時天未光就要出發去化妝。早前路經一處要搭𨋢上天橋，他一個人入去後，𨋢門差不多關埋時彈番開，他即刻按關門掣，點知𨋢門都係關唔到。此刻他在玻璃反射看到好似有個阿婆的影子好慢咁飄咗入𨋢，然後𨋢門就關到喇！架𨋢向上移時，Gary只好一路望地板，因為他怕真的見到婆婆呀！
天然硫磺去污驅邪
他坦言人有三衰六旺，就算平時心地善良常做善事，有時都會唔好睬地遇到啲「污糟嘢」。原來他有一個簡易去「污」的方法，就是用硫磺皂沖涼。不過在香港或淘寶買到的硫磺皂，九成都是用化工硫磺，國貨就用工業硫磺，洗衫還可以，但想洗「污糟嘢」就冇乜效，並沒有驅邪作用。
放門邊冇鬼入屋
Gary大讚天然硫磺勁堅，好難才買到天然的，幸好被他在iherb買到天然成分的硫磺皂（Sulphur Soap），用過後真係好明顯的效果。他說：「我久唔久就用佢由頭洗到落腳，shampoo都唔用，仲會將佢切粒，放儲物室等一啲冇陽光入嘅陰暗角落；放門邊或窗邊，冇鬼入到屋。我甚至用佢開水抹地，屋企即刻變得又clean又pure！」
祛痘收毛孔功效
貪靚的朋友，要知道它含有洋甘菊和堅果油，洗面後滑滑兼有祛痘收毛孔的功效，他續稱：「個味好mild，夏天可以常用，但唔建議日日用，因為去污好強，每日用可能會覺得乾，所以女孩子一星期用一次ok喇，不過有暗瘡嘅，可以喺夜晚連續用一星期。」只需大約港幣35蚊，既可美容，又可驅邪，他笑言真係好正！
高人指點艾油旁身
關於驅邪用品，可謂一不離二。Gary每逢出Trip或去效外拍嘢，一定會帶一支艾油，他坦言：「高人大師介紹我用，佢話呢支油係香港本地種植，純天然配方，所以效果好明顯。既可以提神，搽蚊蟲咬又可以止痕，尤其當他feel到有古怪嘢出現時，就即刻搽幾滴；通常搽手腕、頸同耳後，好似搽香水咁就ok。至於帶去酒店用仲正，只要喺床頭放杯水滴兩滴艾油，包冇朋友騷擾你。」不過他提醒要適量用，不能over use，否則會似老婆婆味。而很多本地藥房都買到，大約港幣$28一支。
